Nefel

[ ÇARŞEM, 2024-12-04 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Helbestvan Paul Eluard

HELSÎNKÎ, 17/7 2011 — Helbestvanê fransî Paul Eluard ko navê wî yê eslî Eugène Émile Paul Grindel e sala 1895-ê li Saint-Denisê hat dinyayê û sala 1952-yê li Parîsê mir. Paul Eluard endamê partiya komunîst bû û di şerê yekê yê cihanê de birîndar bû.

Mijarên helbestên Paul Eluardî pirtir siyasî bûn û ji aliyê saxlemiya bedenê ve jî hertim bi nexweşiya tuberkulosê li sanaturyuman dima.

***

Azadî

Li deftera xwe ya fêrê
li darên maseya xwe
li xîzî li ser berfê
navê te dinivîsim

Li hemû rûpelên nivîsandî
li hemû rûpelên vala
li kevirî li xwînê li kaxezê li xweliyê
navê te dinivîsim

Li wêneyên zêrrkirî
li çekên şerrvanan
li taca paşayan
navê te dinivîsim

Li çolistan û dehlistanê
li hêlîna firrindeyan li nokan
li dengvedana zarrokiya xwe
navê te dinivîsim

Li seyriyên şevê
li nanê sîs yê rojê
li demên dezgirtî hev
navê te dinivîsim

Li zeviyan li qeraxa esman
li çengên çivîkan
li aşê siyan
navê te dinivîsim

Li her hilma elindê
li deryayê li keştiyan
li çiyayê şeyda
navê te dinivîsim

Li kefa ewran
li dilopên xuhokî yên bahozê
li barana tund û bêtam
navê te dinivîsim

Li dirûvên dibiriqin
li demjimêrkên rengan
li rastîniya fizîkî
navê te dinivîsim

Li şiverêyên haybûyî
li rêyên vebûyî
li meydanên di ser kinarên xwe re berfire dibin
navê te dinivîsim

Li lampeya hildibe
li lampeya ditemire
li xaniyên hatî hev
navê te dinivîsim

Li fêkiyê awêneyê
û odeya parvekirî
li doşeka xwe ya vala
navê te dinivîsim

Li seyê xwe yê hesûd û sernerm
li guhên wî yê durhîkirî
li destê wî yê goc
navê te dinivîsim

Li nêrdewana ber deriyê xwe
li tiştên nas
li hurmîna bayê pîroz
navê te dinivîsim

Li rûyê pencereya surprîzan
li lêvên hişyar
li raserî bêdengiyê
navê te dinivîsim

Li stargehên xwe yên ruxandî
li bircên xwe yên hilweşî
li dîwarên bêriya xwe
navê te dinivîsim

Li dûriya bêbêrîkirin
li tenêtiya tazî
li gavên mirinê
navê te dinivîsim

Li saxiya vegerrî
li xeteriya rê lê hatî girtin
li hêviya bêbîr
navê te dinivîsim

Û bi hêza peyvekê
dîsan dest bi jiyana xwe dikim
hatim dinyayê daku te binasim
daku nav li te bikim

Azadî

***

Dildar

Ew li ser qepaxên çavên min radiweste,
pirça wê di pirça min re ye,
wê dirûvê destên min heye,
ew danoqiye nav siya min,
wek kevir nav esmanan.

Çavên wê vekirî ne herdem
û ew rê nade min binivim.
Xewna wê li taveroja tevav
rojê dike xwîsar;
min dikenîne, digirîne û dikenîne ew,
dipeyivîne bêyî ti gotin hebe.

***

Tu radibî

Tu radibî av belav dibe ji qatên te
tu xwe pal didî av dipişkive dibe gul

Tu av î ya ko pişta xwe dide kûriya xwe
tu erd î yê ko rehan digire
û yê ko her tişt lê tê damezrandin

Peqikên bêdengiyê diafirînî li çolistana dengûdoran
sirûdên şevîn distirî li ser kevanên keskesorê
li herderê yî her tiştî diruxînî

Gorî ciwaniya herherî dikî
agirê bêkêmasî yê demê
yê radipêçe siriştê û wê nû
dike
jinê tu diwelidînî bedenekê ya herdem eynî
ya te ye
tu nûbûn î.

***

Bijartin û wergerandin: Husein Muhammed

-----------------------------------

Nivîskar: HUSEIN MUHAMMED humimu@utu.fi
Weşandin: 2011-07-17
Xwendin: 8076