[HELSÎNKÎ, 10/5 2011] — Jiyan me digire hemêza xwe û ji ciyekî dibe yê din; Felek me ji dem û dewranekê radiguhezîne yek dî. Di navbera van herduyan de em girtî ne, em dengên tirsnak dibihîzin û astengên li ser rêya xwe dibînin.
Evîn di hawran û ebayê şermê de di ber me re dibore; lê em ditirsin û jê direvin û di nav tarîtiyê de xwe vedişêrin; yan jî em didin pey wê daku bi navê wê xerabiyê bikin.
Ji me ta yê herî hişmend û bîrewer jî li bin barê Evînê diçeme lê di rastiyê de ew ji bayê lîstok yê Libnanê jî siviktir e.
Azadî bangî me dike ser sifreya xwe daku em xwarinên bitam bixwin û meya çêjdar binoşin. Lê ko em rûniştin ser sifreyê, em bi hesûdî zêdeyî xwe dixwin.
Sirişt û xweza deriyê xwe li ber me vedike û bixêrhatinê li me dike daku em zewq û şadimaniyê ji delalî û bedewiya wê bigirin. Lê em ji bêdengî û aramiya wê ditirsin û em hemî dibizirin bajarên teng û xwe dikişînin nav hev mîna miyên ji gurên har ditirsin.
Rastî bi kenê zarokên bêguneh û bi maçên dildaran gazî me dike û me ber bi xwe ve dikişîne. Lê em deriyan li ber evînê digirin û wek dijmin be em lê dinerin.
Wiha şev diborin: û em bi nezanî dijîn; û roj bi hemêzkirinan me silav dike. Lê şev be yan roj, em bi berdewamî bi tirs dijîn.
Em dest ji dinyayê bernadin tevî ko deriyê Yezdan vekirî ye jî. Di demekê de ko li dilê me xela birsê ye, em nanê Jiyanê di bin piyên xwe de didewisînin. Ax ko Jiyan çend baş e bo Mirov lê ax Mirovî çend ji Jiyanê dûr ketiye!
***
8ê sarmawezê, 1908
Parîs
Maryya delal, dema hest bi bextreşî û xemgîniyê dikim, nameyên te dixwînim. Dema giyana min bi kul û kovanan dagirtî ye, du-sê nameyan ji sandoqikekê dertînim û wan dîsan dixwînim. Ew ezîtiya min a rastîn tînin bîra min. Ew ji min re dibin piştevan ji bo ko hilbikevim raserî wan tiştan ên ko di jiyanê de ne berz û ne bedew in. Jixwe rast e, Maryya delal, ko divê her kesî ji me arimgeh û hedingehek li derekê hebe. Arimgeha min daristanokek bedew e ko li navê ji hebûna te agadar im.
Û niha li hember rengan li ber xwe didim. Ev berxwedan erjeng e, divê ez an ew bi ser bikevin! Hema tê guhê min ko tu dibêjî: - Nîgarkişandina te çawan e, Xelîl? û Xelîl lava dike: - Ka bihêle, ka rê bide ko giyana xwe di rengan de bişom, bihêle zewqê ji rojavabûnê bigirim û bihelim nav bûka baranê.
Profesorên akademiya hunerî wiha şîretan dikin: - Modelan ji wan bi xwe bedewtir nekin, û giyana min dipiste: - Xwezî we bizaniya bedewiya rastîn a modelên xwe bixîçînin. Ango, çi bikm, Maryya delal? Dilê profesor an jî yê giyana xwe xweş bikim? Perwerdekarên qenc pirr dizanin lê giyana min nêzîtirî hişmendiya rastîn e.
***
Roja noelê (25ê berfanbarê - çapa kurdî), 1908
Parîs
Yezdan te bisitirîne, Maryya delal, pirr delal. Bila yê Nenas, ew heman yê ko canê Mesîh jî afirand, dilşadiyek gewre di dilê te de biwelidîne. Herdem ko tu aram û bextiyar bî, vê roja pîroz bîne bîra xwe.
Îro kesek bi qasî te zêde di hiş û ramanên min de nîn e, dosta min ya ezîz. Û ko tu li bîra min î, Jiyanê baştir, berztir û bedewtir dijîm. Destê te dimaçînim, Maryya delal, û bi maçkirina wî re pîroz dikim.
***
New York
Şemî, 19ê gulanê, 1911
Li vir tê dikoşim ko xwebaweriyê bixim dilê sûriyan ko jêrdestên tirkan in. Dixwazim ev reben tê bigihin ko derewa bedew jî hindî ya kirêt xerab e. Textê sultanê mirêsdar li ser xîzek şil hatiye avakirin. Çima perestîş û ayindariya pûtan bê kirin madem esmanek bêsinor li ber çavan hebe.
***
Boston
14ê rezberê, 1911
Bila ez sibê êvarê bêm te bibînim, Maryya delal? Ez van hemû hefteyên bêkefteleft bendewarê vegera te bûme ko bêm te bibînim ji berî biçim New Yorkê.
Havîna bi kar dagirtî, zêde jî dagirtî bûye. Pirtûka xwe Baskên Şkestî ji nû ve dinivîsim, min destnivîsa berê sot û yek nû amade kir. Ax, ez ê çend bextreş bûma heke weşanger ew wek destnivîsa berê bipejiranda. Min çend nîgar çîzandin, hin baştir kirin û çend lib helbest jî nivîsin. Min bi hezaran mijar hene ko bi te re li ser bipeyivim û bi hezaran plan ji bo vê zivistanê hene. Mary, min aniha dest pê kiriye ji Jiyanê hez bikim! Kar pirr e, gelek pirs bersivan dixwazin û gelek jî xwezî û xwestek hene. Dibe sibê bêm te bibînim? Hemû rojê li vir im, bi hêviya bihîstina dengê te bi telefonê.
Xelîl
wergerandin: Husein Muhammed |
