Nefel

[ ÇARŞEM, 2024-12-04 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Hin biwêjên herêma Botan

CIZÎRA BOTAN, 5/12 2011 —

Agir berda heriyê.
Ango fitne kir, fitne dada, fitne germ kir.

Agir kete bin lingê wî de.
Yanê hedar û seqara wî/wê nehat. Dema yek dixwaze bi awayekî lez û bez ji cihê ko lê ye veqete wê demê yê li der dora wê vê biwêjê jê re bi kar tînin.

Ava wan di cûyekê de naçe.
Ji bo wan her du kesên ko ramanên wan ji hev cûda ne û bi hevdu re derbas nakin tê gotin.

Av di neqeba wan de naçe.
Ji bo kesên ko neqeba wan gelek xweş e û pêwendiyên wan dostane ne tê gotin.

Avê daye kuna rovî.
Ji bo wî kesê ko zerareke mezin ya wî çêbûye û ketiye delaveke teng de û tengezariya wî di rûyê wî de xuya dike têt gotin

Avê lê venaxwe.
Yanê wê hema wê biryara xwe bi cih bîne û înfaz bike

Avê li destê wî/wê nake.
Yanê dema yek muqayeseya di neqeba du tişt, yan jî du mirovan de bike û qîmet û hêjayiya yek ji wan li ser ya/yê dî destnîşan bike ev biwêj tê gotin..

Avika rûyê wî teqiyane.
Ji bo wî kesê bêar bûye tê gotin; ewqas ko êdî nizane ka fihêtî çi ye.

Av lê germ dibe.
Der barê wan kesên mezin û yên dikarin îşan bikin de tê gotin.

Bayê xirê de/Di bayê xirê da.
Yanê di demeke gelek kurt de.

Be’de xerabûl Besra
Yanê piştî ko kar qediya. Piştî ko zerareke mezin çûbû.

Beqê req hilgirt.
Dema mirov yekî, yan jî tiştekî jixwe mezintir, yan jî girantir dane ser milê xwe û wî/wê hilgire ev biwêj tê bi kar anîn.

Bênder li erdê ye.
Ji bo wî malê li erdê hatiye danîn, hêj nehatiye rakirin û parvekirin tê gotin.

Bê nan û xwê.
Ji bo wan kesên ko qenciyê nizanin tê gotin.

Bibe tav nade xelkê.
Ji bo wan kesên ko qenciya wan nagihîje kesî tê gotin.

Bibe teyr, ji destê min xilas nabe.
Yanê rizgariya yê reviyayî tune ye, ew bi ko ve here xilas nabe.

Bi dilek kul û şanzdeh birîndar.
Yanê dema yek bi kul û qehra xwe ve û bi awayekî dilşikestî ji derekê vegere, tê gotin.

Bike gustîl biêxe tiliya xwe de.
Ango vê meseleyê ji bîr meke, aqil jê wergirê, ibretê jê bigre.

Bila ew neh jî li ser wan dehan be.
Dema yek ji xwe ketibe zerarekê û îca zerarekî din jî bikeve ser de têgotin.

Bila se goştê wî bixwin.
Ji bo kesên ko ti qîmeta wan ya di nav civakê de neyî tê gotin.

Bi kêrî daseke tûj û werîsekî dirêj tê.
Ji bo wî kesê ko ji bilî karê xizmetêbi kêrî tiştekî din nayê û tiştekî nezane tê gotin.

Binçeng lê rast kir.
Der heqê wî kesê ko bi awayekî têr ji ser sîniya xwarinê rabûyî tê gorin. Yanê têra dilê xwe xwar.

Binê hawina kun kir.
Dema yek demeke dirêj li kesekî yan jî li tiştekî bigere û pirs û pirsiyar bike û di vê rêyê de gelek zehmetiyan bibîne, lêbelê rastî wê neyê ûwî/wê nebîne de tê gotin.

Binê wê da tavê.
Yanê tişta ko di firaxê de heye hemû xilas kir.

Bi qasî pirça serê xwe.
Yanê gelik caran.

Bire serê minarê.
Yanê rezîl û ruswa kir; her tiştên wî yên veşartî aşkere kir.

Birîna wî birîna kêçê ye.
Ji bo kesê ne temakar be û bi tiştên hindik jî qayil dibe tê gotin.

Bizmarê xwe di felekê de quta ye.
Ji bo wan kesên ko gehîştine meqseda xwe û her tişta wan wek xwestina wan bi cih hatiye têgotin.

Bîst li te dikeve.
Yanê kirina vî karî dikeve ser te.

Bîst, te bihîst.
Ev biwêj bi giştî di hejmara pîvanakirîn û firotina dexlî de dihate gotin. Ango dema yê dexil dipîva digot, yek, dudo, sisê… û hinga ev hejmar digehîşte bîstê bi dengê bilind digot “Bîst, tebihîst.”

Bû birê marî.
Ji bo wî kesî ko xizanî ser dehatiye û tiştekî wî nemaye de tê gotin.

Bû çiçikê diya wî.
Ji bo wî kesê ko tim û tim bi tiştekî ve mijûl dibe û bi carekê xwe jê qut nake de tê gotin.

Bû dizê sola xwe.
Gava yek hewl dide ko tiştekî bibêjeyekî, yan jî tiştekî bi wî bide kirin, lêbelê bi bertekek/reaksîyonek dijwar re rûbirû bimîne û juvan bibe û bi şûn de gavê biavêje, wê demê ev biwêj tê bikar anîn.

Bû dîk.
Ji bo wî kesê li ber baranê zêde şil bûyî tê gotin

Bû ‘Elo kamêşa
Der barê kesên ko gelek çixareyê dikêşin tê gotin.

Bû fitîl.
Ji bo wî kesê ko gelek ecizbûyî têgotin.

Bû girara gavanan.
Yanê her tişt têkilî hev bû.

Bû Hemedê Here-Were.
Hemedê Here-Were xelkê Cizîrê ye. Di dema xwe de li nik bazirganên Cizîrê erkdar bû. Her dem li gundên ser bi Silopya, Şirnex û Hezexê ve girêdayî de digeriya û deynên bazirganên ko li dikandarên wan deveran bû dixwest. Ango ji ber ko her dem dihat û diçû ev leqep pê ve ma. Vêca dema yek ser hev diçe derekê û tê ev biwêj jê re tê gotin.

-----------------------------------

Nivîskar: ABDULKADIR BÎNGOL abdulkadirbingol@gmail.com
Weşandin: 2011-12-05
Xwendin: 5649