Nefel

[ ÇARŞEM, 2024-12-04 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Zilma Sedam

CIZÎRA BOTAN, 2/1 2011 — Hin gotin hene di heqîqeta hal de rast in, di der barê rastiya wan de ti guman tune ye. Bes ji ber ko nîyeta xwediya wan gotinan nerast in êdî tu qîmeta îfadekirina wan gotinan namîne.

Yek ji van gotinên ko di heqîqeta xwe de rast, lê belê ji ber şêlûbûna gotinbêjên wan ji qîmet dikevin meseleya dagirkirina Îraqê ye. Wek tê zanîn ew kesên ko xwe li misilmantîyê datînin dagirkirina Îraqê kirine qajikê devê xwe; ax Îraq û wax Îraq. Eger haya yekî ji paşperdeya vê gotinê û niyeta xirab ya gotinbêjên wê nebe wê vê gotina wan weke ramaneke masûmane bibîne û dibe ko wê ramana wan parve jî bike.

Lê belê di gotina wan ya “Çima Emerîka ji wî aliyê dinyê hatiye herêma me û welateke ko gelê wê misilman e dagir kiriye?” de bi gotina dînî tu îxlas tune ye; ne ji bo Xwedê dibêjin. Ango neko hinde dilê wan li ser dagirkirina welatekî misilman dişewite vêya dibêjin. Ecza wan ne Emerîka ye û ne jî dagirkirina Îraqê ye.

Ya rast ew kesana ji wê çendê aciz dibin ko bi dagirkirina Îraqê ya ji aliyê Emerîkayê ve statûyeke nû ji kurdan re çêbûye. Kurdan hin gavên girîng bo azadiya xwe avêtine Îca nikarin rasterast behsa aciziya xwe ya kurdan bînin zimên, ya ji destê wan tê hema tavêjin Emerîkayê. Helbet em jî ji dagirkirina Îraqê aciz in. Lê em çiqas aciz bin em hê zêdetir ji pergala Heccacê Hemdem jî aciz bûn. Ew Hecac û ew pergala wî ya ko welatê me wêran kirî. Welatê me kirî gola xwînê, keçên me kirîn carîye û pêşkêşî welatên ereban kirî.

Gelo bila Emerîka nehatiba herêmê, bila pergala Sedam herûher dewam bikira. Ew bixwe jî dizanin ko eva han dijê zagona Xwedayî ya li ser civakê tecellî dibe ye. Lewra wek tê zanîn, “kufir dewam dike, lê zulim dewam nake.”

Ez dixwazim vêya bînim bîra wan kesên ko li hemberî dagirkirina Emerîkayê derdikevin û dixwestin pergala xwînû bidomiya: Eger zulma Sedamê ko di maweya desthilatdariya xwe de bûye sedema mirina sêsed hezar hemwelatiyên xwe, li Helepçeya şehîd tawana mirovahiyê kirîye, bi navê Enfalê komkujî pêkanîye hêjan bidomiya û welê rehet rehet û bi ecelê xwe bimiraya, bawer im ew misilmanên ko îmana wan zeîf wê di derbarê edaleta mutleq ya Xwedê de biketana gumanê û wê gotibana “Xwedayo! Ma ev zilma hanê wê hetanî kengî bidome, ma wê ev zalim di vê dinyayê de cezayê xwe nebîne?”

Em werin ser zilma herdu desthilatdariyan. Gelo Sedam zalimtir bû yan jî Amerîka? Bila nirxandina wê bimîne bo kesên ko ew zilm jiyayîn, lê dixwazim du mînakan bidim.

Mînaka yekê: Tê gotin ko rojekê Sedam tê serdana Kurdistanê. Xelk jî diçin li axaftia wî guhdarî dikin. Wê dema ko Sedam diaxive de ji nişka ve zêrevanên wî berê reşaşê didin merivekî û hema li wir dikujin. Sedem jî ew bu ko ewê hatî kuştin qaşo karê kuştina wî kiribû û ji bo ko çeka xwe derxîne destê xwe avêtibû pişta xwe. Lê paşê derdikeve holê ko nîyeteke wî ya vê çendê nebûye, ji bo ko kîsê xwe yê tûtinê derxîne destê xwe avêtibûye pişta xwe.

Mînaka dudoya: Serokê Dewletên Yekbûyî yên Emerîkayê George Bush tê serdana Îraqê. Îraq wê demê di bin dagirkeriya wan de bû. Di wê dema ko Buşh diaxivî de rojnamegerekî Îraqî di ber çavê dinya alemê pêlava xwe hilfirande wî.

Yê sûîqest li serokdewletê dagirker kirî piştî ko cezayê xwe kişand derkete derve û vê gavê dijî, lê yê kar kirî ko kîsê xwe yê tûtinê ji pişta xwe derxîne di neqeba çav û birhan de kirin sewik.

Gelo em ferz bikin ko li dewsa George Bush Sedam hatiba Kurdistana Îraqê û li bajarekî kurd de biaxafta. Di dema axaftina wî de rojnamegerekî kurd pêlava xwe hilfirînda wî. Yê ev kiryar kirî deynin alîkî gelo hûn texmîn dikin ko dê qetlîameke çawa li wî bajarî bikira. Belê ka binêrin zilma herî tarî ya kîjan alî ye.

Ez ê weke dawî, nivîseke fermî ya ji aliyê rayedarên pergala Sedamî ve ko bo amirên wan hatibû şandin li jêr deynim. Ka çawa keçên vî gelê misilman, qîzên gelê Selaheddînê Eyyûbî weke carîye hatine şandin bo ereban. Ya girîng ewe ko jixwe hewceyî nedîtine ko vê kiryara xwe ya pîs bi awakî veşarî jî bikin. Belê ew kiryara xwe deynane ser kaxezê û rengekî fermî jî dayinê.

Belê ew nivîs û lîsteya ko di rojnameya Azadiya Welat de hatibû weşandin li jêr e. Bila her kes bixwîne. Dibe ko ev bibe sedema ko çavên wan vebin û wê kîn û nefreta xwe êdî ne ji bo Emerîkayê, bo Sedaman verêşin.

Belgeya bi erebî, bi îmzeya (şanenav) Midûrê Muxabaratê yê Kerkûkê hatiye amadekirin û kurmanciya wiha ye;

Bi navê Xwedayê Rahman û Rehîm…
Hejmar: 1101, Dîrok: 01.12.1989

Ji bo Midûriyeta Giştî ya Muxabaratê…
Mijar: Kar û barên hatine kirin

Bi erka ko Fermandariya Siyasî daye, me pêngavên yekemîn û duyemîn ên operasyona Enfalê pêk anîn. Di van operasyonan de bi awayekî komî keçên ji 14 salî heta 29 salî hatin berhev kirin û desteser kirin. Li gorî fermana we daye me hin ji wan şandin klûbên şevê (meyxane) û kerxaneyên li Misirê. Li ser daxwaza we em nav, paşnav û emrê wan keçan dikin lîste û ji we re dişînin. Em van agahiyan pêşkêşî zanîna we dikin.

Navên keçan:

Gelavêj Adil Îbrahim (12)
Çîmen Nazim Abbas (23)
Leyla Abbas Cewher (29)
Naîma Qasim Omer (18)
Peyam Şukur Mustafa (19)
Hurasan Abdullah Îbrahîm (20)
Qedriye Ahmet Îbrahîm (22)
Kulîlk Îbrahîm Alî (19)
Hevle Ahmet Fehreddîn (25)
Îsmet Qadir Ezîz (24)
Necîbe Hasan Alî (18)
Hasîbe Emîn Hemze (21)
Şilê Hasan Alî (20)
Şukriye Rustem Mehmet (22)
Hasîbe Hamadamin Îbrahîm (15)
Kwêstan Abbas Mewlîd (21)
Sirve Osman Ekrem (12)
Sozê Mecîd Behrem (29)

Ev bi tenê belgeyek e û wekî vê bi sedan belge hene ko behsa kirinên nemirovî ên rejîma Sedam Huseyîn dikin. Min ne bawer e ko dewleteke din bi vî rengî aşkera poltîkayên xwe bi fermî meşandibe.

-----------------------------------

Nivîskar: ABDULKADIR BÎNGOL abdulkadirbingol@gmail.com
Weşandin: 2011-01-02
Xwendin: 7416