Nefel

[ ÇARŞEM, 2024-12-04 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

bactroban
bactroban
Xortbûna me ya navxweyî û derveyî pev re girêdayî ne

STOCKHOLM, 27/10 2005 — Gelek tiştên giring ko peywendiya wan ya dîrekt bi kurdan ve heyîn di meha çiriya-pêşiyê de qewimîn. Bûyer zû dibin û kurd jî hewil didin ko li asta bûyeran bin û rola xwe ya kartêker tê de bileyizin. Hêj gelek li pêşiya me ye, meşa azadiya xelk û welatê me dê berdewam be û hetava hêvî û serketinan bi germiya xwe li destpêka vê zivistanê me gerim û dilxweş dike.

Sedam Hisên yê ko xwe wekî xudêyê erd û esmanan didît, yê ko tîraniya wî hemû sinor derbaz kiribûn, rezîl û bêdesthilat û bi kuştinê tawanbarkirî di qefesekê de di wê qesra wî şahiyên xwe tê de dikirin di 19-ê çiriya-pêşiyê de di dadgehê de amade bû. Ev dadgehkirina ko dest pê kirî ne bi tenê dadgehkirina kesê Sedamî ye yê ko desthilat xerab bikaranî, Sedamê ko xelik kuştîn û berze kirîn û tadarî û zilim û enfal kirîn, lê ev herweha jî dadgehkirina serokên diktator û tîranan e, ev dadgehkirina nifişperistiya ereb e, ev dadgehkirina rijêmên totalîtar û nifişperês e, ev bi rengekî ji rengan dagehkirina dagîrkerên Kurdistanê ye. Ya herî balkêş ew e ko Sedamê ereb li ber destê dadwerekê kurd ko serokê dadgehê ye, bi kuştina erebên Ducêleyê hat tawanbar kirin.

Her di eynî demê de nûnerê hizra neteweyî ya erebî di şexsê sekreterê Yekîtiya Dewletên ereb Emr Mûsayî de hat Îraqê û wî wextê bêtir di serdana xwe de li Kurdistanê derbaz kir. Wî serokê Kurdistanê Mesûd Barzanî dît û çû parlamentoya Kurdistanê û tê de axift û her li Kurdistanê bi serokkomarê Îraqê yê kurd Celal Talebanî jî re civiya. Mebestên hatina Emr Mûsayî û rêxistina dewletên wî yên erebî çi bin bila ew bin, lê ev serdan tiştekê serekî têxe ber çavan ko êdî di pirsa Îraqê û deverê û akincîbûna wan de kurd faktereka giring û xudan kartêkirin in û nabe bi ser wan de bêt gavdan. Emr Mûsayî û rêxistina wî jî ev rastî zanî ye û wî di axiftina xwe de di parlamentoya Kurdistanê de ev diyar kir dema gotî:

— Kurdistana Îraqê ne bes parçeyeka giring e ji Îraqê lê her weha ji cîhana erebî û rojhilata naverast jî.

Encama referanduma li ser reşnivîsa destûra Îraqê jî ya ko li 15/10 hatibû kirin û di 25/10 hat ragihandin bûyereka din ya mezin bû. Dijberên destûrê neşiyan di encamê de dusêka dengan li sê parêzgehan bînin û weha Îraq bû xudan qanûneka esasî. Ji kurdan re pir giring bû ko niho destûr bêt erêkirin û rêberên me gelek dixwest destûr bêt qebûl kirin. Serokê Kurdistanê Mesûd Barzanî bi xwe jî dema ko piştî lihevhatinê li ser reşnivîsa destûrê ji Bexdayê vegeriya Kurdistanê ew giringî berçav kir dema di axiftineka xwe de bo KTV-ê gotî:

— Ez bi vê hilketinê daxwazê ji gelê Kurdistanê dikim ko bi germî bên bo dengdanê li ser destûrê. Ev destûreka gelek baş e û derfeteka weha ye dibe ko ew careka din dubare nebe ve. Divêt ew li ber çavên me be ko ev destûr derbaz bibe yan derbaz nebe hilbijartinên nû tên kirin. Dibe ko di hilbijartinên bihên de ev hevsengiya niho heyî nemîne. Ji ber hindê metirsiyeka mezin heye. Nabe em xelkê Kurdistanê vê derfetê ji dest xwe bidin.

Deweta serokê emerîkî Georg Bushî jî bo serokê Kurdistanê Mesûd Barzanî ko biçe serdana wî bazineka giring e di zincîra van bûyerên mezin de. Serokê yekê yê Kurdistanê bi resmî diçe Dewletên Yekgirtî yên Emerîkayê, ko dewleta herî bi hêz ya cîhanê ye. Ew bi kincên pêşmergetiyê diçe dîtina Georg Bushî. Her çend ew ingilîziyê jî dizane lê ew bi zimanê xwe yê kurdî dipeyvie. Ev di roja me ya îro de gelek wate û îşaretan dide. Dewleta herî mezin ya dinyayê bixêrhatinê li desthilata kurdan dike û her wekî ew pîrozbahiyê li wê desthilata siyasî û rola wê ya kartêker dike. Ev daxwiyaniyek e ji cîhanê re ko pêwîst e hemî wekî Emerîkayê miameleyê digel vê desthilata nû û genc bikin û jê re arîkar bin.

Ev hemî û gelek bûyer û qewimînên din dibêjin ko rast e kurd faktereka bihêz in di miadeleyên siyasî de li devera me û ew filterekê baş in bo reorganîzekirina vê herêmê li ser bingehên azadî û edalet û respekt û wekheviyê.
Ya dimîne ew e ko desthilata me ya siyasî bikare digel vê senga xwe ya giran ya derveyî, digel vê yektîmî û yekhelwêstiya xwe di danûstandinên xwe de li derveyî Kurdistanê, berê xwe, ji caran bêtir, bide navmala Kurdistanî û yekkirina dezgeh û saziyên xwe yên hikûmî û îdarî jî. Ji ber ko hindî Kurdistan di nav xwe de yekgirtîtir û demokrattir be û bêtir desthilat û xelik ji hevdu nêzîk bibin dê ew desthilat bi hêztir û saxlemtir be û weha dê li ser astê derve jî katêrkirin û rola wê zêdetir be.

-----------------------------------

Nivîskar: Sidqî Hirorî
Weşandin: 2005-10-27
Xwendin: 4846