Nefel

[ ÇARŞEM, 2024-12-04 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Federasyona du îdareyên kurdî

STOCKHOLM, 24/9 2005 — Dema li sala 1994-ê rewşa navxwe ya başûrê Kurdistanê dest bi têkçûnê dikir û şerê navxwe li ber qewimînê bû, gelek kesan tirsa xwe ji wê destpêka reş diyar kir. Dema min hîngê helwêst wergirt û ez li dijî hindê rawestiyam û bi dijwarî di nav çend dostan de axiftim û min got ko ev dê bibe egera şerekê navxwe yê domdirêj û akamxerab, ji nav wan dostan yekî got:

— Tu zêde xwe ditirsînî. Ev şer divêt bihêt kirin û baş e ko bibe da ew herdu partî bi vê tecrubeyê jî derbas bibin û ji xwe re îbret û dersan jê bistînin.

Ew şer bû rastî û me hemiyan ew setimîn û karesatên wî şerê navxwe dîtin û ev rewşa niho ya duîdareyîyê û ya monopolkirina desthilatê li her îdareyekê ji aliyê bes partiyekê bi tenê ve, ji verêjên wî şerê navxwe ne.

Xwe wî dostî rast digot ko wan ders ji wî şerî dîtin û ew gehiştin wê rastiyê ko çi aliyek ji wan nikare yê din bi yekcarî û bi hemî ve ji holê rabike û divêt ew herdu hebin û ew wê rastiyê, herçend li nik wan tehil jî be, qebûl dikin. Lê wan îbreteka din jî ji wî şerî wergirt û her aliyekî ji wan herdu partiyan, destên xwe danan ser herêmekê û tê de hikimdariya xwe birêve bir û weha bûn du hikûmetên kurdî yên cîran û hevsinûr.

Lê xelkê Kurdistanê, gelek rewşenbîr û nivîskar û siyasetmedarên kurd daxwaz ji herdu partiyan kir ko ew, herdu îdare û hikûmetên xwe bikin yek û Kurdistan bibe xwedî yekparlamento û yekhikûmet û yekîdare. Min jî hîngê çend nivîsek bi wê naverokê belavkirin. Ew berî dusalan bû û li ser hindê birayê min Fewzî hîngê got min:

— Ev qerebalixa we ji qesta ye û kes guh nade we û bi ya we nake. Mixabin e, lê divêt em xwe ji aliyê nefsî ve amade bikin bo qebûlkirina federasyona du îdareyên Kurdî li başûrê Kurdistanê di paşerojê de. Ji ber ko ya li Kurdistanê diqewime û ya ez jê dibînim me ber bi hindê dibe.

Ev dirêjbûna suhbet û prosesa yekkirina herduîdareyan û gotinên Mehmûd Osmanî di hevpeyivîna Arif Zêrevanî de ligel wî ji bo Nefelê >>heger nekarin yek hikûmetê çêkin hingê du îdare dê hebin<<, analîza Fewzî ya berî du salan bi rast derdixe.

Bê xiş dê kes hebin wekî wî dostê min bibêjin ev federasyona duîdareyan divêt bihêt çêkirin û ew çareseriyek e û dê hebin yên bibêjin de bila ew wê jî bikin û ew jî tecrubeyek e. Lê ev ne rast e, ne şerê navxwe diviyabûya bihata kirin bo ko mirovî ziyan û xerabiyên wî bi çav dîtiban û naskiriban û nejî federasyona duîdareyan karekê dirist e ko bihêt kirin.

Eger bi rastî înyeteka weha hebe û dê projeyeka weha li Kurdistanê serî hil bide û ew ji aliyê hinekan ve mîna çareseriyekê bo problema desthilatê li Kurdistana duîdareyî re bêt dîtin, pêwîst e bo çi û çima jî di hizra me de bin û em tê de bifikirin. Hîngê, bêguman eger rastî bêt gotin, dê bersiv ew be ko ew aliyên desthilatdar li Kurdistanê yên ko çareseriyeka weha hildibijêrin, ew bi hindê diyar dikin ko ew naxwazin desthilatê li Kurdistanê bi rêya sindoqên hilbijartinê û bi terzekê demokratîk û şaristanî û aştiyan e li hevûdu biguhorin. Ew têt wê wateyê ko kes ji wan naxwaze vê desthilata xwe ya siyasî, îdarî û ekonomî ji dest bide. Hîvî dikim ev suhbeta federasyona duîdareyên kurdî li Kurdistana başûr gotineka bê bingeh be û çi rastî ji bo nebe û encam wekî serok û rêberên me hertim berî niho binavkirî yekparlamento û yekhikûmet û yekîdare be.

-----------------------------------

Nivîskar: Sidqî Hirorî
Weşandin: 2005-09-24
Xwendin: 5752