Nefel

[ ÇARŞEM, 2024-12-04 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Divêt HDP xwedîtiyê li dengên miletê kurd bike – firseteka nû ji bo başûrê Kurdistanê

KURDISTAN, 20/6 2015 — Di hilbijartinên heftê hezîranê de miletê kurd li bakurê Kurdistanê bi zêdetirî şeş milyon dengan barekê giran li partiya HDP-ê ya bi serokatiya Selahattin Demirtaş kir. HDP bi dengên kurdan bi ser ket û AK Partî jî bi dengên kurdan xusirî.

HDP-ê di hilbijartinên sala 2014-ê de 2 milyon û 746 hezar deng standin. Di hilbijaritnên vê carê de zêdetirî şeş milyonan (6 058 489 deng ko dike ji % 13.12 yê temamiya dengên Tirkiyeyê û bakurê Kurdistanê) deng standin.

HDP-ê li bajarên wekî Diyarbekir, Şirnex, Wan, Mêrdîn, Mûş, Bitlîs, Dêrsim, Hekarî û hinek bajarên dî yên bakurê Kurdistanê derbeyeka mezin li AK Partiyê da û li bajarên wekî Urfa û Entabê jî dengên xwe duqat kir û li Urfayê nêzîkî ji % 40-ê dengan stand.

Li Stenbolê jî HDP-ê zêdetirî milyonek dengên kurdan stand û li Îzmîrê jî hêza hebûna xwe nîşan da. Hinek çepên tirkan îdia dikin ko HDP-ê "dengên emanet" ji CHP-ê standine lê belê lêkolîneka şirketa Kondayê aşkera dike ko HDP-ê dengên xwe ji AK Partiyê standine û li cihên ko CHP lê xurt e deng ji HDP-ê re neçûne.

AK Partî bi nisbeta neh prosentan daketiye û dengên wê ji HDP-ê û MHP-ê re çûne. Kurdên di nêv AK Partiyê de ji Erdogan aciz bûn û dengê xwe dan HDP-ê û tirkên nijadperest yên di nêv AK Partiyê de jî dengê xwe dan MHP-ê.

Netîceyên van hilbijartinan nîşan didin ko hêdî kurd ji bilî Entab, Mereş, Urfa, Meletya, Elezîz û hinek bajarên li ser tixûbê Tirkiyeyê dengên xwe nadin partiyên tirkan û HDP-ê digel hemî siyaseta wê ya "tirkiyecî" wekî partiya xwe dihesibînin û dengê xwe didin partiyeka "kurdan".

Ev netîce nîşan didin ko ruhê neteweyî yê miletê kurd hêjî li bakurê Kurdistanê zindî ye û heger heta çar salên dî HDP siyaseteka meqûl bimeşîne ne dûr e ko HDP li Entab, Urfa, Mereş, Meletya û cihên dî jî bikare dengên kurdan bi aliyê xwe ve bîne û kurdan bi temamî ji tirkan veqetîne.

Wekî netîce em dikarin bibêjin:

1. HDP-ê bi dengên kurdan baraja ji % 10-ê derbas kir û ev ji bo cidabûna miletê kurd ji miletê tirk baş e.

2. Herçend serkirdeyên HDP-ê behsa "tirkiyecîtiyê" bikin jî kurd hêdî-hêdî xwe didin ser hev û di nêv tixûbên siyasî yên Tirkiyeyê de be jî kurd dixwazin hêza wan yek be da bikarin tesîrê li ser siyaseta dewletê bikin.

3. Heger di hilbijatinên cara bêt de kurdên Entab, Meletya, Mereş, Urfa, Elezîz û cihên dî jî dengên xwe bidin HDP-ê yan partiyên dî yên kurdan hingê hêza bloka kurdî dikare bibe ji % 25-ê hemî dengên Tirkiyeyê û zêdetirî 140 parlamenteran bi dest bixe.

4. Dema ko hemî dengên kurdan li cem HDP-ê yan partiyên dî yên kurdan kom bibin hêdî hîç partiyeka Tirkiyeyê nikare bêyî kurdan hikûmetê ava bike. Partiyên tirkan ji aliyê hejmara dengan û parlamenteran ve bikarin bi hev re hikûmeteka koalîsyonê ava bikin jî mecbûr in digel HDP-ê koalîsyonê ava bikin ji ber meşrûiyeta hikûmetê namîne. Hikûmeteka bêyî şirîkatiya kurdan li Tirkiyeyê dê hikûmeteka ne meşrû be.

5. Hikûmeteka koalîsyonê li Tirkiyeyê firsetên nû dide başûrê Kurdistanê jî. Tirkiyeya bi serokatiya Erdogan gehiştibû qunaxekê ko hêdî reform nedikir û Erdogan di têkiliyên xwe yên digel Kurdistanê û miletê kurd de jî "quretiyeka" ji xwe zêde dikir. Hikûmeteka lawaz ya koalîsyonê dikare firsetên nû bide başûrê Kurdistanê jî û îmkanên danûstenadineka wekhev zêdetir bike.

Vêca mesele hemî ew e ka HDP dê çiqasê bikare xwedîtiyê li şeş milyon dengên miletê kurd bike û li gor wê yekê mafên miletê kurd li bakurê Kurdistanê biparêze û têkiliyên xwe digel başûrê Kurdistanê jî xweş bike.

-----------------------------------

Nivîskar: ARIF ZÊREVAN zerevan@nefel.com
Weşandin: 2015-06-20
Xwendin: 18138