Nefel

[ ÇARŞEM, 2024-12-04 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Divêt nîrê Enqereyê û Qendilê yê li ser siyaseta kurdî bişkê

STENBOL, 17/6 2012 — Divê siyaseta kurdî zincîrên xwe biqetîne. Ji aliyê “îdeolojî” û argumanên siyasetê ve ti sedemên ko Ahmet Turk, Şerafettin Elçi, Osman Baydamir, Galip Enserioglu, Abdurrahman Kurt, Sezgin Tarikulu, Mîr Dengir Firat, Haşim Haşimi û bi sedan navên wekî van li hev nekin û bi hev re di heman xeta siyasî ya rêxistina kurdî de kar nekin nînin.

Di xeta parastina mafên miletê kurd de ti sedema wê nîne ko Gulşen Orhan û Leyla Zana ne mil bi mil digel hev bin. Osman Baydemir carinan hindek gotinên “hişk” an jî li wî nayên bêje jî, li herderê hemî kurd jê hez dikin û şika kesê jê nîne ko ew ne dilsojek û evîndarek yê miletê kurd e.

Leyla Zana dema ko ne wekî berdevka derdoreka “îdeolojîk” lê wekî kurdekê derkeve û biaxive, hingê rastiya dil û hişê xwe ya digel ruhê miletê kurd tîne ziman. Behsa hiş û hestên siyasetmedarên kurd dike.

Galip Ensarioglu û hevalên wî yên di Ak Partiyê de de dibêjin “bila kes me weke kurdên ne ji xwe ve kurd bin av neke, em bi dil û hişê xwe jî kurd in”. Gulşen Orhan dixwaze gaziya Feqiyê Teyran bighîne hemî dinyayê.

Bi kurtasî kesên min navê wan li jor anî ziman heryek ji wan çi “riyeka siyasî” hilbijartî be jî, ji otonomiyê heya federasyon û serxwebûnê yek tenê ji wan, li dijî ti talebeke neteweyî ya kurdan dernekave û dixwazin hemî qedexeyên li ser siyaseta kurdî rabin û piştgiriya hemî daxwazên kurdan dikin.

Her ev hemî piştgir û piştevanên parastina başurê Kurdistanê ne jî. Baweriya van hemiyan li sîstemeka demokratîk ya firepartiyê û bazara serbest ya digel dinyayê heye. Baş e ji bo çi heya niha ev mirov nikarin bi hev re bixebitin? Ji ber ko derfetên siyasetê li bakurê Kurdistanê gelek aloz û têrasteng in. Enqereyê û Qendîlê bi hev re nîr daniye ser stûyê siyaseta kurdî û nahêlin azad bibe.

Helbet sedemê esasî sîstema siyasî, yasayî û serweriyê ya dewleta tirk ya ko hêj li ser kar e; heya niha vê sîstemê bi girtin, kuştin û înkarê xwe li ser lingan girtiye û her heya niha ji aliyê yasayî, hiqûqî û civakî ve rê nedaye ko kurd wekî kurd derbikevin qada jiyan û siyasetê. Lê îro em dibînin ev sîstem li ber rizînê ye û êdî ti derfet û delîlek yê vê sîstemê nîne ko rê li ber siyaseta kurdî û têkoşîna heq û edelatê ya miletê kurd bigire.

Aliyê dî “Qendîl” e. Qendîlê bi sîlehan û darê zorê siyaseta kurdî desteser kiriye. Qendîl kurdan wekî du coreyan dibînê; yên “digel wê” û “yên dijminê” wê. Ji aliyê sîyasî ve jî heya niha kes nizane ka daxwaza siyasî ya Qendîlê ji bo kurdan çi ye? Lê metoda wê ya siyasetê diyar e; tundûtîjî!

Ev nezelaliya siyasî, bêpirensîbî û metodên tundutijiyê di heman demê de destê tundûtîjiyê yê dewleta tirk jî li ser siyaseta kurdî û kurdistanî xurt dike, siyaseta kurdî guç dike û derfetên siyaseta kurdî hem li Kurdistanê û hem jî li himberî dinyayê aloz dike, ji bo çareseriyê jî qet riyekê nade ber ti aliyan.

Riya azadbûna siyaseta kurdî şkandina nîrê herdu aliyan e.

Di encamê de ger kesên ko min navê wan li jor anî ziman û bi sedan kesên wekî wan, nekarin di bin banê heman partiya siyasî de bên cem hev jî, herî kêm dikarin wekî “rihspiyên kurdan” ji hev re arîkar bin û bi piştgiriya hev li riyên çareseriya hêsankirina siyaseta kurdî bigerin.

Îro ya ji bo kurdan herî pêwîst e, hêsankirina siyaseta kurdî ye. Siyaseta kurdî çiqas hêsan bibe, miletê kurd jî dê hêj baştir bikare xwe organîze bike û daxwazên xwe jî baştir bîne ziman û hêj baştir bikare ji dinyayê jî dostan li dora xwe kom bike.

Qendîl û Enqere bi hev re derfetên siyaseta kurdî aloz dikin. Divêt nîrê herdu aliyan yê li ser siyaseta kurdî bê şikandin.

-----------------------------------

Nivîskar: MIHEMED EVDILA mihemedsanri@gmail.com
Weşandin: 2012-06-17
Xwendin: 17697