Nefel

[ ÇARŞEM, 2024-12-04 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Fêrkirinên kujer û kuştina heqîqetê

STENBOL, 15/9 2011 — Dema ko rêxistinek an jî dewletek ji beriya hertiştî berdewamiya hebûna xwe di veşartin û nixamtina heqîqet û edaletê de bibîne, her fêrkirinek ya wê dewlet û rêxistinê wekî marekê kujer dikeve ber bedena mirovan û mirovan dikuje. Hemî gotar û beyanên rêxistin û dewletên weha li ser derewan û kuştina heqîqetê ye.

Lewma di nav pêkhateyên tîranî de pêşiyê heqîqet û edalet tê kuştin paşê jî kuştina mirovan dibe karek ji rêzê û herkes fêrî vî karê ji rêzê dibe û qebûl dike ko kar divê bi vî rengî bi rê ve biçe.

Qeyda hevdîtina di nêvbeyna berpirsên MIT-PKK-ê de kê bi çi mebestê û çawa aşkere kir em nizanin. Çi hevdîtinên dî di nêvbeyna van aliya de hatine kirin em wê jî nizanin, lê ji vê qeydê em dizanin herî kêm ev cara çarê ye ko tên ba hev. Her çi pewendî û hevdîtin di nêvbeyna serokê PKK-ê Abdullah Ocalan û berpirsên ordiya tirk û PKK-ê de hene û çêbûne em wê jî nizanin.

Ihtimala ko ev qeyda di nêvbeyna PKK-MIT-ê de derketî fabrîkasyon be gelek kêm e. Deng, jargon, aksent û formulasiyonên di hevdîtinê de rast-rast xwediyên xwe didin dest. Kesên aşînayê deng û jargona van mirovan bin bêyî ko navê wan hebe jî dikare di cih de wan derbêxe. Lê kê ji bo çi mebestê ev qeyd aşkere kir em nizanin.

Lê em tiştekê dizanin ko heta niha Abdullah Ocalanê rêberê PKK-ê hertim behsa hevdîtinên xwe yên digel eskeran dikir. Demarê esasî di nêvbeyna ordiya tirk û rêberên PKK-ê de ye. Peywendiyên digel MIT-ê nû aşkere bûn.

Berpirs û organên ragihandina PKK-ê heta niha hertim ji kurdan re digotin AKP-yê dewlet xistiye destê xwe û qet nêzikayê li ti rê û metodên aştiyane nake lewma ew şer dikin.

Bi vê qeydê aşkere bû ko serweriya PKK-ê û dezgehên wê yên ragihandinê derewan dikin, rastiyê vedişêrin û heqîqetê dikujin, herwekî çawa dewlet û aparatên wê yên ragihandinê heqîqeta di heqê kurdan de dikujin û vedişêrin.

Berpirsê Îstixbareta Tirkiyeyê (MIT) Hakan Fidan ji birêvebirên PKK-rê dibêje, “Ji ber ko vê mijarê rengek siyasî girtiye lewma serokwezîr xwest dest bavêjiyê û ez bi taybetî vê mijarê ve wezîfedar kirim.” Heman şexis perspektîfeke siyasî jî dide ber birêvebirên PKK-ê û dibêje “Ji Polonyayê heya Emerîkaya Latîn ez gelek li ser van mijaran xebitîme, lê heta niha min nedîtiye ko bizavek hebe bi riyên demokratîk û meşrû negîhabe armanca xwe.”

Yanî nûnerê serokwezîrê dewleta tirk Recep Tayyip Erdogan daxwaza daxistina astê telebên kurdan yên neteweyî ji birêvebirên PKK-ê nake. Lê qet haya birêvebirên PKK-ê ne ji siyaset û ne jî ji telebên kurdan yên neteweyî heye. Ew tenê dibêjin ew xwe ji ”demokratîzekirina Tirkiyeyê” berpisiyar dibînin. Behsa daxistina bendava hilbijartinan dikin.

Sabri Okê berpirsê PKK-ê dibêje “Kurd dixwazin bi zimanê xwe perwerdehiyê bibînin”. Hakan Fidan diyar dike ko ew li ser dixebitîn ko “Wezareta Perwerdehiya Millî” ji navê rakin û mafê perwerdehiyê li gorî sîstemekê dewrî belediyeyan bikin. Daxwazeka dî jî ya berpirsên PKK-ê ya wekî “evîneka bêmirad” heye ko dibêjin “Hon dewlet in hon niha dikarin me li firokeyê siwar bikin û bibin cem serok”. Xanima bi navê Afet Guneş dibêje “kerem bikin ez niha dikarim we bibim.”

Divêt xelet neyê fêm kirin, ti derdê min yê ko ez bêjim çima ev hevdîtin bûne an jî berpirsên PKK-ê çima doza mafê serweriya kurdan wekî federasyon, otonomî an jî wekî serxwebûnê nekirine nîne. Dikin nakin ew bi keyfa xwe ne. Her kurdek bi keyfa xwe ye çi bixwaze an jî çi nexwaze.

Lê derdekê min heye ko ev nêzikî 30 salan e PKK heqîqetê dikuje û paşê jî kuştina kurdan dike karekê ji rêzê û kurdan fêr dike ko divêt ew bên kuştin. Ev kuştin û xwîn hemî ji ber çi, li beramberî çi? Ne diyar e.

Belê pirs ev e, kurd çima fêr bûne ko divêt zarokên wan li çiyan bên kuştin? Bo “demokratîzekirina Tirkiyeyê” çi pêwîstî bi kuştina zarokên kurdan heye? Her madem berpirsên PKK-ê gelek hêsanî hevdîtinan digel berpirsên eskerî û îstîxbarî yên dewleta tirk dikin ko personelên MIT-ê dibin posteciyên di nêvbeyna Abdulah Ocalan û birêvebirên PKK-ê de, çima berpirsên PKK-ê hêjî tenê kuştinê wekî riyeka felatê li ser kurdan ferz dikin? PKK û organên wê yên propagandayê çima hêjî hinde derewan li miletê kurd dikin? Çima kurdan hêjî fêr dikin ko ji derveyî riya kuştinê tu rê dî tune ye?

Pirsiyareka dî, gelo di heman dema ko berpirsiyarên MIT-ê digel Abdullah Ocalanî û berpirsên PKK-ê hevdîtin pêk dianîn de û dixwestin ko PKK şerî rawestine, di heman demê de hêza ko esil li ser “îradeya” Ocalan xurt e û bi salan peywendiyê wê digel Ocalan heye, yanî hêza eskerî ya ordiya tirkan ji Ocalan û PKK-yê dixwest ko berdewamiyê li ser şerî bikin?

Divê em ji bîr nekin ti cînayet bêşahid mamînin.

-----------------------------------

Nivîskar: MIHEMED EVDILA mihemedsanri@gmail.com
Weşandin: 2011-09-15
Xwendin: 10506