Nefel

[ ÇARŞEM, 2024-12-04 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Xwîna ko têt rijandin ya kê ye û ji bo çi ye?

STENBOL, 16/7 2011 — Li gorî jêderên fermî yên tirkan ji destpêka şerê PKK-ê yê tebaxa 1984-ê heya hezîrana 2010-ê hemwelatî, esker, gerîla hemî li ser hev; 41 828 kesan canê xwe ji dest daye.

Her li gorî jêderên asayiş û ordiya tirkan ji van 41 828-an, polîs û korucî jî di nêv de 6 653 kesên mensûbên hêzên ewlekariya tirkan di şerê li himberî PKK-ê de hatine kuştin. Ji van 1 330 korucî ne, ew jî hemî kurd in.

Eskerên ko hatine kuştin jî zêdetirê wan kurd in, ji ber li gorî nisbeta nifûsa wîlayetan, wîlayetên ko zarokên wan herî zêde li eskeriyê hatin kuştin wiha ne: Hekarî, Şirnex, Bingol, Diyarbekir, Mêrdîn û Stenbol di rêza şeşê de ye. Yanî ji 5 000 eskerên hatî kuştin jî herî kêm 2 500 jî kurd in. Eskerên dî yên tirk jî hemî zarokên feqîr û jaran in. Mirovên sivîl yên hatîn kuştin jî 5 000 kes in û ew jî her kurd in.

Beramberî vê, 29 639 çekdarên PKK-ê canê xwe ji dest dane (ji bilî 15 000 kesên ko Abdullah Ocalan dibêje PKK-ê di nav xwe de kuştine).

Dora 6 000 pêşmerge bi destê PKK-ê di şerê li himberî PDK-ê û YNK-ê de hatin kuştin ko di nava 30 salan de encaq ewqes eskerê tirkan hatine kuştin. Xedariya ko PKK-ê li himberî peşmergeyên Kurdistanê nîşan dayî ti caran li himberî eskerên tirkan nîşan neda.

Ji bilî wêrankirina bi deh hezaran gund û koçberiya bi darê zorê ya milyonan kurdan. Û bi 10 hezaran kuştinên bikujên wan nediyar yên ko bi destê çeteyê dewletê hatin pêk anîn.

Heya niha PKK-ê êrîşek tenê jî li himberî serfermanderiyên eskerî an jî baregehên eskerî yên stratejîk pêk neaniye. Ji aliyê siyasî ve jî, ji 1984-ê heya niha êrişek tenê ya PKK-ê nîne ko şikek giran li ser nebe?

Dewleta tirk di şerê li himberî PKK-ê de bi qasî serê derziyê rûmeta xwe di dinê de wenda nekir, tevî ko gelek kiryarên wê dikevin ber tawanên şerî yên li dijî mirovahiyê jî. Ji ber metodên ko PKK bi kar tîne, ne ji yên dewletê paqijtir bûn; wekî êrişên li ser gundan û kuştina sivîlan. Metodên PKK-ê yên qirêj hertim destê dewletê yê bixwîn û qirêj diniximîne. Niha jî dema êrişeke qirêj li ser sivîlan tê kirin kes nizane ew êriş ka ji aliyê hêzên dewletê ve hatiye kirin an jî PKK-ê kiriye.

Murat Karayilanê ko serqumandarekê PKK-ê ye, ewqas ji pîroziya mafê jiyanê yê mirovan bêhaye ko rêzeqetlîamên ko PKK-ê sala 1987-ê li ser gundiyên Şirnex, Mêrdîn, Hekarî û Bingolê pêk anî, wekî “xeletiyên li ser rê” bi nav dike.

Vêca îro dema bayê azadiyê bêyî ko hêzên demokrasîxwaz guleyekê jî biteqînin tîranekê li dûv yê dî tînin xwarê, ko hemî Rojhilata-nêvê girtiye ber xwe, hêj jî bi navê “şerê azadiya kurdan”, çi esker û çi çekdarên PKK-ê bi sedan ciwanên kurd li çiyan didin kuştin. Sêzde eskerên ko berî du rojan li Farqînê jî hatîn kuştin zêdetirê wan kurd bûn, digel kuştina 7 an jî 9 çekdarên PKK-ê. Evqes ciwan jî dewletê bixwe kuştin an jî li çekdarên PKK-ê da kuştin ev jî hêj ne diyar e.

Bi rastî kurd hêjî bawer dikin ko ev şerê azadiya wan e? Bi rastî jî ev şer ji bo azadiya kurdan têt kirin? Kîj kurd hêj bawer dike ko dê bi xwînrijandinê azad bibe?

Her tişt li aliyekî, kurdê ko tenê van hejmarên li jor bide ba hev û hêj bibêje “ev şer û xwînrijandina têt kirin ji bo azadiya kurdan e”, divê mirov şikê ji aqilê wî bike.

Miletê ko aqil û wijdana xwe ji dest bide û pirsiyara aqibeta zarokên xwe jî neke, ti paşeroja wî miletî nîne.

-----------------------------------

Nivîskar: MIHEMED EVDILA mihemedsanri@gmail.com
Weşandin: 2011-07-16
Xwendin: 8216