Nefel

[ ÇARŞEM, 2024-12-04 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Sûrî diheje – bila kurd nehejin

SWÊD, 10/4 2011 — Bihara ereban îsal hêj ko berf li erdê bû destpê kir. Belê, kêm û zêde ji piştî serê salê ve 22 welatên ereban dihejin. Li Tunuis û Misrê bihara demokrasiyê zû gul veda lê belê li Libya, Behreyn, Yemen û Sûriyeyê desthilatdarên dîktator bi hêza çekan rê li ber gulvedanê digirin.

Ezraîl, bi baqekê gulên demokrasiyê di destî de bûye mêvanê dîktatorên welatên ereban. Lê belê ji tirsa ko belkî El-Qaîde li wan welatan cihê lingên xwe saxlem bike welatên wekî Emerîka, Fransa û Brîtanyayê bi sedêsed piştgiriyê nadin wan serhildêrên ko ne El-Qaîde ne û azadiyê dixwazin.

Yek ji wan dîktatorên ko niho Ezraîl çûye serdana wî, serokê Sûriyeyê Beşar Esedê kurê dîktatorê ji xwe xirabtir Hafiz Esedê be‘sî ye. Ev nêzîkî mehekê ye ko li gelek bajarên Sûriyeyê mirovan kefenê xwe çirandine û ji bo demokrasî, azadî û mafên mirovî derdikevin kolaneyan.

Belê, ew tirsa ko partiya Be‘sê xistibû dilê xelkê ji holê rabûye. Gava ko tirs nemîne dîktator jî namînin. Rast e ko mirov tên kuştin. Heta niho di mehekê bi kêmî 100 mirov li Sûriyeyê hatine kuştin û ti kes nizane k açendhezar mirov hatine girtin û di zîndanên Sûriyeyê de eziyetê dikişînin.

Dîktatorê Sûriyeyê Beşar Esed mirovekî durû ye. Ew bi xwe ji Internetê hez dike lê belê ji hemwelatiyên xwe re Internetê qedexe dike. Ew serokê pariyeke siyasî ye lê belê ji hemwelatiyên xwe re avakirina partiyên siyasî qedexe dike. Ew bi xwe di televizyonê de ji hemwelatiyên xwe re dibêje terorîst lê belê heger hemwelatiyên wî jê re bibêjin terorîst wan dikuje.

Beşar Esedê durû van rojên dawiyê lehîstokeke qirêj koo ji bavê xwe fêr bûye pêşkêşî 22 milyon hemwelatiyên Sûriyeyê kir. Meselen, ji nişkê ve bi kurdan re dest bi flortê kir. Serokê Sûriyeyê got ew hemwelatîbûna 300 000 kurdan lê vedigerîne lê belê ew jî ne rast e ji ber Beşar Esed behsa ”tecenusê” dike yanî ”naturalîsation”.

Mana wê ew e ko 300 000 kurd divêt daxwaza hemwelatîbûnê bikin û ne şert e ko Sûriye wan daxwazan hemiyan qebûl bike. Yanî Sûriye wan wekî hemwelatiyên eslî û kevin qebûl nake û dibêje dê hemwelatîbûnê bide yên ko miraceetê bikin û ew jî bi insafa dezgehên dewleta mixaberatê ya Sûriyeyê ve girêdayî ye.

Miraceeta wan kesên ko partiya Be‘sê ji wan hez neke dê bêt red kirin û ew kurd dîsa dê bêyî pasaport bin, nekarin ticaretê bikin, mal û milkî bikirin û bifiroşin û beşdarî hilbijartinan bibin (mixabin ko li Sûriyeyê yek partî tenê heye û ew jî ya Beşar Esedî ye).

Divêt em bipirsin ka çima Beşar Esedî bi sê milyon kurdên binxetê re dest bi vê florta sexte kir û ka çima kurd di van demên dawiyê de kêm beşdarî protestokirina rejîma Sûriyeyê dibin

Wexta ko Ezraîl têt ba mirovekî tawanbar ew mirov hertim dest bi giriyanê dike û poşmaniy axwe nîşan dide bi hêviy ako Ezraîl jê dûrkeve û ruhê wî nestîne. Çîroka dîktatorê Şamê, kurdê zalim Hafiz Esedî jî ev e. Beşar Esed dibîne ko kurd wekî sala 2004-ê li dijî rejîma Şamê beşdarî protestoyan nabin.

Sala 2004-ê dema ko kurd derketin kolaneyan erebên Sûriyeyê ti piştgirî neda kurdan û tew erebên cîranên kurdan bi debance û daran li stadyuman li kurdan dixistin. Min bi xwe dîmenên wan bûyeran gelek caran di vîdeoyê de dît.

Bêdengbûna kurdan planên partiya Be‘sê guhortin. Heger kurd zêde beşdarî protestoyan bibûna hingê Şamê dê şerekî etnîkî di navbera kurdan û ereban de derxista û bi wî awayî temenê dîktatoriya xwe dirêj bikira. Dema ko Beşar Esedî dît ko kurd bêdeng in vê carê xwest wan nêzîkî xwe bike û ji dinyayê re bibêje ko kurd dostên wî ne ji rejîma wî hez dikin, yanî kurd dostê dîktatoran in. Ev lehîstok gelekî xirab e.

Kurd ne dikarin bibin hevalê dîktatorên Şamê û ne jî bibin hevalê mixalefeta Sûriyeyê herçend kurdan Deklarasyona Şamê îmza kiribin jî. Hinek rêxistinên ereban yên ko Deklarasyona Şamê îmza kirine hêjî tehemila navê Kurdistanê nakin.

Ya herî baş ew e ko kurd niho xwe giran bikin û bêdeng bimînin û qurbanan nedin. Ti neteweyan bi qasî kurdan ji bo azadiya xwe qurban nedane. Bihara kurdan jî di demekî nêzîk de dê bêt.

-----------------------------------

Nivîskar: KURDO BAKSÎ kurdo.b@hotmail.com
Weşandin: 2011-04-10
Xwendin: 13540