Nefel

[ ÇARŞEM, 2024-12-04 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Partî bi hemahengiya Mesrûr Barzanî û Nêçîrvan Barzanî dikare xurt bibe

STOCKHOLM, 29/12 2010 — Partiya Demokrat ya Kurdistanê 11-ê vê mehê li Hewlêrê kongreya xwe ya 13-ê bi hejmareka mezin ya delege û mêvanan bi awayekê şefaf li ber çavên raya giştî ya Kurdistanê çêkir. Bi organîzasyona xwe ya modern Partiyê nîşan da ko ew dikare teşkîlata xwe ya hizbî biguhore û temsîla serkirdayetiya xwe jî berfireh û nû bike.

Partî rêxistineka neteweyî ya miletê kurd e ko mohra familyeya barzaniyan û serdarê kurd Mele Mistefa Barzanî li ser e. Di kongreyê de serokê Kurdistanê Mesûd Barzanî behsa familyeya barzaniyan kir û got “rêbaza barzanî” rêbaza “kurdayetî” û “merdayetiyê” ye û ne bi hejmara 1 000 mêrên familyeya wan ve girêdayî ye û got her kesê ko şaşiksor be ne şert e ko pêgirê “rêbaza barzanî” be.

Di kongreyê de Mesûd Barzanî behsa îdiayên hebûna baskên cida di nêv Partiyê û familyeya barzaniyan de jî kir û got zarokên wî û zarokên brayê wî Îdrîs Barzanî wisa nehatine perwerde kirin ko xwe ji hevdu re feda nekin û ji kongreyê xwest ko Nêçîrvan Barzanî wekî cihgirê wî hilbijêre. Kongreyê bi yekdengî hem Mesûd Barzanî wekî serokê Partiyê û hem jî Nêçîrvan Barzanî wekî cihgirê wî hilbijart.

Di kongreyê de 51 kes wekî endamên serkirdayetiya Partiyê hatin hilbijartin, ji %-ê 60-ê wan kesên nû û ciwan in û ji % 40-ê wan jî endamên berê yên serkirdayetiyê ne. Ev rengîniya nesla kevin ya xudantecribe û nesla nû ya ciwan dê hereketekê bêxe Partiyê û têkiliyên Partiyê û xelkê Kurdistanê ji nû ve germ bike.

Mesûd Barzanî rexneyek li hinek endamên serkirdayetiyê yên ko xema Partiyê naxwin û karan bi awayekê bîrokratîk asê dikin girt û got divêt endamên serkirdayetiyê di nêv xelkê de “pirt û belav” bibin û xizmeta xelkê Kurdistanê bikin û ne li dûv berjewendiyên xwe yên şexsî bin.

Ji hejmara dengên ko Mesrûr Barzanî di kongreyê de ji delegeyan girt û kesên ko nû hatin hilbijartin xuya dibe ko qedrekê mezin yê Mesrûr Barzanî di nêv rêxistina Partiyê de heye û gelek kadirên ko wî dixwest bên hilbijartin ketin serkirdayetiya Partiyê. Taybetmendiyeka Mesrûr Barzanî ew e ko kadroyên ko ew destnîşan dike mirovên wisa ne ko bi kêrî xebatê tên û mirovên “pûç” ji nêv wan dernakevin.

Mesrûr Barzanî rêberekê xudanvîzyon e û fikirîneka wî ya stratejîk heye. Mirovekê wekî babê xwe kêmgotin, guhdar û analîzker e. Ew qedrî dide kesên dorûbera xwe û li wan dide fêm kirin ko ew dikarin di karê xwe de bi ser kevin û çareyan ji problemên mezin re jî bibînin.

Nêçîrvan Barzanî bi zeka û bîrtûjiya xwe her di deqîqeya pêşiyê de li kesên ko dibîne dide his kirin ko ew wan nas dike, haya wî ji fikr û kapasîteya wan heye û bi germî wan zeft dike û dixwaze wan têxe hereketê. Bi tecribeya xwe ya serokwezîriyê jî Nêçîrvan Barzanî izbat kir ko ew dikare guhortinan û reforman di civakê de çêke û problemên xelkê safî bike.

Serokê Kurdistanê Mesûd Barzanî di kongreyê de got ji ber karê wî yê serokatiya Kurdistanê pêwistiya wî bi arîkariya Nêçîrvan Barzanî wekî cihgirê serokê Partiyê heye.

Wekî ko min di destpêkê de gotî Partî rêxistineka mezin ya neteweyî ya miletê kurd e û gelek problemên li hemî parçeyên Kurdistanê û Rojhilata-nêvê yekser Partiyê eleqedar dikin. Serokê Kurdistanê Mesûd Barzanî hêj li ser xwe ye û pêwistiya miletê kurd û Partiyê bi rêberiya wî heye. Li gor ko ez nas dikim Mesûd Barzanî mirovekê xemxwir e û li dûv karên ko ew jê berpirs e dikeve.

Mesûd Barzanî serokê Partiyê ye û ya ko li me hemiyan û li Mesrûr Barzanî û Nêçîrvan Barzanî jî dikeve ew e ko em hemî arîkariya xurtbûna Mesûd Barzanî, xurtbûna rêbaza barzanî, xurtbûna Partiyê û xurtbûna miletê kurd bikin. Bi hemahengiya di nêvbera Mesrûr Barzanî û Nêçîrvan Barzanî de serokatiya Mesûd Barzanî dê xurt bibe, Partî dê xurt bibe û miletê kurd dê xurt bibe.

Hêj gelek problemên miletê kurd yên ko divêt bêne safî kirin hene: 1) Meseleya Kerkûkê û deverên li derveyî îdareya hikûmeta Kurdistanê, 2) Meseleya dabeşkirina desthilatê di nêvbera Bexdayê û Hewlêrê de û 3) Meseleya qanûna pertolê û butçeya pêşmergeyên Kurdistanê.

Ji bilî başûrê Kurdistanê bivêt û nevêt Partî tevlî çareserkirina problemên li parçeyên dî yên Kurdistanê jî dibe û niho guhortinên mezin li Tirkiyeyê û bakurê Kurdistanê çêdibin. Ji mêvanên kongreyê jî belî bû ko Partî giringiyeka mezin dide Tirkiyeyê û bakurê Kurdistanê û ji bakur belkî zêdetirî 30 kurdan wekî mêvan beşdarî kongreyê bûbûn.

Têbînî: Ez ji bo dawetnameya ko ji min re rêkiribû spasiya rêzdar Mesrûr Barzanî dikim û beşdarbûna kongreya Partiyê jî bo min şerefeka mezin bû. Hêviya bextewarî û serketinê ji bo serokê Kurdistanê Mesûd Barzanî, cihgirê wî Nêçîrvan Barzanî û Mesrûr Barzanî û hemî miletê kurd dikim.

-----------------------------------

Nivîskar: ARIF ZÊREVAN zerevan@nefel.com
Weşandin: 2010-12-29
Xwendin: 14593