Nefel

[ ÇARŞEM, 2024-12-04 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Tirkiye kanaleka zazakî vedike û klasîkên kurdî çap dike

STENBOL, 19/4 2010 — Serokwezîrê Tirkiyeyê Recep Tayyip Erdogan roja şemiyê li ofîsa xwe ya li qesra Dolmabahçeyê li Stenbolê digel 50 nivîskarên Tirkiyeyê civiya. Wekî nivîskarekê ko tenê bi kurdî dinivîsîne ez jî vexwendiyê wê hevdîtinê bûm û min kitêba xwe »Bingehên rastnivîsandina kurdiyê – kirmancî« îmza kir û da wî.

Serokwezîrê Tirkiyeyê Erdogan ji dilê xwe diaxive û wî di axaftina xwe ya destpêka civînê de bi zimanekê pir edebî û dewlemend bi nimûneyên ji tekstên nivîskar û edîbên Tirkiyeyê yên kevin û nû behsa rewşa berê û niho ya Tirkiyeyê kir û got ew dê statukoya Tirkiyeyê serobin bikin û guhortinên şoreşbar li Tirkiyeyê pêkbînin.

Gelek kesan mereq dikir ka çawa Erdoganî kariye wê teksta hewqasê dewlemend û me‘nakûr binivîsîne. Yalçin Akdoganê şêwirmendê esasî yê serokwezîr Erdoganî ko li tenişta min ya rastê rûniştibû got mielifê wê tesktê ew e û pê serê xwe bilind kir. Yalçin Akdogan bi navê miste‘ar Yasin Dogan di rojnameya Yeni Şafakê de dinivîsîne û gelek caran mijara nivîsarên wî doza kurdan û problema PKK-ê û partiyên legal yên di xeta wê de ye.

Hevdîtina ko nêzîkî şeş seetan berdewam kir ji sedê 80 behsa doza kurdan ya li Tirkiyeyê bû û nivîskarên ko bi eslê xwe cihû, ermenî, tirk û kurd hemiyan dema ko behsa prosesa ”rêlibervekirina demokratîk” dikir mesele dianî ser daxwazên miletê kurd û gelek israr li ser mafê fêrbûna zimanê kurdî li dibistanên dewletê hat kirin û gelek kesan ji wezareta kulturê ya Tirkiyeyê xwest ko klasîkên kurdî digel kurdiya orjînal bi wergera tirkî amade bike û biweşîne.

Roja duşemê 12-ê mehê Huseyin Çelikê arîkarê serokê giştî yê Ak Partiyê Recep Tayyip Erdoganî li Enqereyê telefonî min kir û xwest roja sêşemê min bibîne. Di hevdîtina me herduyan de wî hem ez vexwendim bo civîna digel serokwezîr Erdoganî û hem jî got dê ji bo wergerandina klasîkên kurdî civîneka taybet digel wezîrê kulturê Ertugrul Gunayî bo min amade bike. Roja şemiyê li Stenbolê me hersêyan ev mesele axaft ez hêvî dikim ko rojekê encameka pozîtîv ji vê hevdîtinê derkeve.

Huseyin Çelik bi xwe ji Wanê ye lê belê bi eslê xwe ji bajarokê Tillohê yê Sêrtê ye û kurdiyeka paqij û zelal diaxive. Ew berê wezîrê perwerdeyê bû û niho di Ak Partiyê de hem berpirsê medyayê ye û hem jî arîkarê serokê partiyê ye. Gotina wî li cem Ak Partiyê û li cem dezgehên dewletê giranbiha ye.

Recep Tayyip Erdoganî di civîna digel nivîskaran de behsa astengiyên dezgehên statukoparêz yên dewletê li hemberî hikûmeta xwe û zehmetiyên binecihkirina fikr û stratejiya xwe kir û got:

— Hinek komikên pirsgirêkên ko me ji yên berî xwe dewrgirtine hem tesîreka negatîv li daxwaza pêşketina welatê me dikin û hem jî bi awayekê negatîv tesîrê li hizûr û selameta insanên me dikin. Ne ji aliyê insanî ve, ne ji aliyê demokratîk ve û ne ji aliyê hêjahiyên me yên medeniyetê ve hêdî em dikarin tehemila hebûna van negatîviyan bikin û çavê xwe jê re bigirin. Berdewamkirina statukoyê ne mimkin e û ne jî di berjewendiya Tirkiyeyê de ye. Em îdarekirina ji bo meslihetê, îdarekirina rewşê, mana li ser desthilatê bêyî ko destê xwe bidin av û sabûnê wekî siyaset ji xwe re nabînin û ne xudanê qenaeteka wisa ne. Van demên dawiyê di îdarekirina dewletê de em guhortineka cidî ya paradîgmayê dijîn. Em dibin şahid ko qenaet, siyaset û karûemel yek bi yek tên guhortin. Lê belê hinek pirgirêkên me yên bedensoj hê jî berdewam dikin. Tenê bi yekdestî û yekhêziyê em dikarin rûbirûyê wan pirgirêkan bibin û wan berteref bikin.

Statukoparêzên Tirkiyeyê ne tenê hêzên dewletê yên tirk in. Partiya Karkerên Kurdistanê û BDP-ya di xeta wê de jî di gelek waran de tifaqê digel statukoparêzên tirk dikin û herdu alî bi hev re dijminahiya Ak Partiyê û xebata wê ya reformên li Tirkiyeyê dikin.

Di civînê de nivîskarê kurd Altan Tanî daxwazên herî radîkal bi lêv kir û got heta di nêvbera miletê kurd û miletê tirk de ”şirîkatiyeka wekhev” çênebe bi xêr û xêratên ko ”tirk” li ”kurdan” bikin mesele safî nabe û got vegera hinermendekê wekî Şivan Perwerî jî dê tenê şow be û pêwistî bi şowan nîne. Altan Tanî got hinek hêz li Tirkiyeyê û li derve rê li ber siyasetmedarên kurd yên ”bawermend” digirin û meydanê ji ”kemalîstên kurd” yên PKK-ê û terefdarên wê re dihêlin.

Hinek beşdaran rexne li weşana lawaz ya TRT-Şeşê girt û got divêt ew kanal bêt xurt kirin û di satelîtên wekî Hotbirt û Nile Satê de jî derkeve da kurdên li derveyê Tirkiyeyê jî bikarin lê temaşa bikin û daxwaza programên bi zaravayê soranî jî hat kirin.

Serokwezîr Recep Tayyip Erdoganî di dawiya civînê de got niyeta wan heye ko kanaleka zazakî jî di bin banê TRT-ê de vekin. Heger TRT kanaleka zazakî veke kurdên ko bi zaravayê dimilî yanî zazakî diaxivin dê bibin xudanê kanaleka ko 24 seetan bi zaravayê wan weşanê dike.