Nefel

[ ÇARŞEM, 2024-12-04 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Xwedê sitara mirovî ji hinek kurdên bêperwa û bêheqaniyet bike

STOCKHOLM, 9/11 2009 — Medya desthilat e, lê belê emrazên medyayê di destê hinek kurdên bêperwa de »jehirhilat« e. Îniya borî kurdekê naskirî li Stockholmê bi awayekê »hêj nediyar« hat kuştin û li gor medyaya swêdî tawanbarî bi xwe telefonî polîsê swêdî kiriye û gotiye ko wî kesek bi kêrê birîndar kiriye û bila polîs li hawara wî bêt û gotiye ko birîndar jî »nasê wî« ye.

Paşê birîndarê bikêrê di rêya nexweşxaneyê de mir û tawanbar jî bêyî ko mirovên xwe jî bibîne yekser ket destê polîsan de û heta îro jî hêj ji bilî polîsî ti kesê ew xortê tawanbar nedîtiye û pê re neaxaftiye û ti kurd û nemaze ew berpirsên medyaya kurdî yên »jehirhilat« nizanin ka kê ew mirov kuştiye. Ew li ser esasê texmînên xwe û baweriya xwe nûçeyên jehrawî dinivîsînîn û malikê careka dî li mala kesê kuştî xirab dikin û birîn û êşa wan hêj kûrtir dikin.

Carekê heger ew berpirsên medyaya kurdî xudanheqaniyet û xudanwijdan bin divêt ew bizanin heta ko ew xort yan kesekê dî ji bo kuştina wî mirovî cezayê mehkemeyê nexwe û hikûm li wî neyêt birîn ew ne »bikuj« e û ew tenê tawanbarek e. Lewra jî medyaya swêdî ne navê tawanbarî, ne jî navê kesê kuştî da û heta navê nijada tawanbarî û kuştî jî neda. Ferqa medyaya kurdan û medyaya swêdî yan ya ewropî di warê heqaniyetê û berpirsiyariyê de ev e.

Roja piştî kuştina wî camêrî, dostekê min yê nêzîk ji min re got çima nûçeya kuştina wî mirovî di Nefelê de nîne. Min gotê »ne li hêviyê be û tu wê nûçeyê di Nefelê de nabînî«.

Kesê ko hatiye kuştin naskirî ye û welatparêzekê kurd e. Bûyer bi îhtimaleka pir mezin meseleyeka nêvxweyî ya familyeyê ye û hêj em nizanin ka rastiya meseleyê çi ye. Em bihesibînin ko mirov dizane ka mesele çi ye û belge jî di destê mirovî de hene, cardî jî çênabe ko mirov berî mehkemeyê ti kesî wekî »bikuj« yanî »qatil« bi nav bike û di medyayê de afîşe bike.

Heger ew kesên ko goya bi navê xemgîniyê xwedîtiyê li kesê kuştî dikin xudanrêz bin divêt berî hertiştî nebêjin »filankesê welatperwer bi destê kurê xwe hat kuştin«. Madem hon qebûl dikin ko ew kes welatperwer e û kedeka wî di jiyana siyasî ya kurdî de heye hingê rêzekê ji mirina wî re bigirin û nebêjin »kurê wî ew kuşt« digel ko hêj ne diyar e ka ew çawa hatiye kuştin.

Gelek caran mirovên me yên kurd rexneyan li medyaya tirkî digirin û dibêjin medyaya tirkî kurdan bêyî mehkeme û delîl wekî »bikuj« û »tawankar« îtham dike. Lê belê vê bûyera ko li Stockholmê qewimî nîşan da ko hinek berpirsên medyaya kurdî gelek dereceyan ji berpirsên medyaya tirkî têkçûyîtir û bêperwatir in.

Nemaze dema ko ew kes vê bêperwatiyê di bin kirasê »xemgînî« û »dostaniyê« de bikin. Lê temaşa bikin, yê ko vê bêperwatiyê dike yek jê serokekê berê yê partiyeka siyasî ya kurdan e. Gelo heger desthilatake biçûk jî biketa destê wî, wî dê çi ji hevalên xwe û xelkê di bin emrê xwe de bikira? Yek jê eboqatekê kurd e û dostekê nêzîk yê kesê kuştî ye û li Diyarbekirê bi hev re ketine zîndanê. Wisa diyar e ko mirov eboqat jî be roj têt û mirov heq û hiqûqê ji bîr dike û »tawanbaran« berî mehkemeyê teşhîr dike û wekî »tawankar« destnîşan dike.

Kuştina wî mirovî trajediyeka nêvxweyî ya mezin e ji ber mesele aîlewî ye. Ji bo raya giştî ya kurdî jî ya giring nûçeya mirina wî kesî ye û diviya medyaya kurdî yan behsê nekira yan jî bigota »filankes çû ser dilovaniya xwe« û arîkariya endamên mayî yên familyeyê bikira. Lê belê em dibînin ko hinek malperên kurdî û dostên kesê kuştî »jehrê« dirijînin nêv endamên familyeyê û birîna wan hêj kûrtir dikin.

Hêj em nizanin ka »bikuj« kî ye. Heta ko mehkeme biryara xwe nede ti kes ne »bikujê« wî mirovî ye û kesek dikare »tawanbar« be. Lê belê her ji niho ve em dizanin ko hinek kurd »bikujên« rol û berpirsiyariya xwe ne û wan xencerek li dilê xwe da.

Careka dî dibêjim, Xwedê sitara mirovan û familyeyan ji hinek kurdan bike.

-----------------------------------

Nivîskar: ARIF ZÊREVAN zerevan@nefel.com
Weşandin: 2009-11-09
Xwendin: 12969