Nefel

[ ÇARŞEM, 2024-12-04 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Kurd li asîmanan hene lê belê li erdê nînin

STOCKHOLM, 11/6 2009 — Li gor mîtolojiya kurdan ya kevin dema ko zarokek têt dinyayê taybetî ji bo canê wî zarokî stêrek jî li asîmanan peyda dibe. Li asîmanan stêreka her mirovekî heye. Ev fenomeneka xweş e. Dema ko kesek ji vê dinyayê bar dike stêra wî jî winda dibe.

Çima ez di rojeka têrbaran ya Stockholmê de behsa stêran dikim. Têkiliya stêran û siyaseta dewleta tirk bi hev ve heye.

Resîcumhurê Tirkiyeyê Abdullah Gul berî demekî di balafirê de got li Tirkiyeyê kurd hene û divêt pirsa kurdî bi awayekê aştiyane bêt çareser kirin. Û got di demekî nêzîk de dê gavên mezin bên avêtin.

Serokwezîra berê ya Tirkiyeyê Tansu Çillerê di salên 1990-ê de di balafireke dewletê de bi awayekî pozîtîv behsa pirsa kurdî kir û got divêt ”meseleya kurdan li gor modela baskiyan bêt çareser kirin”. Hingê gotinên Tansu Çillerê pir giran bûn û tirk û Tirkiye pê hejiya.

Gotinên Tansu Çillerê hewqasê bi hinekan giran hat heta hinek generalên tirk li dergehê mala Tansu Çillerê da û bi emr û tehdîdan jê re got dest ji van gotinên xwe berde.

Tansu Çillerê ji bo parastina kursî û serokwezîriya xwe bi dilê generalan kir û doza 20 milyon kurdan ji bîr kir û danî aliyekî.

Li gor modela baskiyan li Spanyayê mafên baskiyan di qanûna esasî de hatine parastin. Zimanê baskî azad e û resmî ye, televizyonên wan hene û parlamentoyeka wan jî heye.

Heger gotinên Tansu Çillerê yên li asîmanan ji dil bûna diviya kurdan îro li herêma xwe parlamentoyek hebûya û navê wê jî Parlamentoya Kurdistanê bûya. Lê belê wekî min gotî, gotinên hingê yên Tansu Çillerê zêde giran bûn.

Belê, min behsa serokkomarê Tirkiyeyê Abdullah Gul kir. Aniha ew zêde xwedîtiyê li gotinên xwe yên ko wî li asîmanan kirin dernakeve. Gelo ew jî dê wekî Tansu Çillerê bike û li gotinên xwe poşman bibe. Li asîmanan wî gotinên pozîtîv ji bo kurdan got lê belê dema ko çû Enqereyê mala xwe bêdeng bû û me zêde tiştek jê nedît.

Dîsa meseleya kurdan bi terorîzmê ve girêdidin, nasnameya kurdan di yasayên xwe de qebûl nakin û gotina ”Kurdistan” jî ji TRT-Şeşê radikin.

Hikmeta vê çi ye ez nizanim lê belê her çi dibe dibe û meseleya kurdan ji asîmanan nayêt xwarê û nagihî ser rûyê erdê. Çi dema ko meseleya kurdan ji asîmanan ber bi rûyê erdê ve têt li Tirkiyeyê herkes dibe nijadperest û mafên kurdan ji bîr dike.

Ev siyaset wiha nameşe. Divêt dewleta tirk rojekê ji rojekê zûtir nasnameya kurdan nas bike û bi lehîstokên biçûk kurdan nexapîne. Eve 85 sal e ko dewleta tirk xwe spartiye kirasê asîmîlasyonê lê belê kurd winda nebûn. Bi milyonan kurd xwedîtiyê li nasnameya xwe dikin û pê serbilind in.

Heger desthilatdarên Enqereyê digel kurdan siyaset û diyalogeka pozîtîv bi rê ve nebin hingê hemî kurd dê stêrên xwe û yên bav û kalên xwe bi agir û pêta wan ve bi ser bêedaletiya Enqereyê de bireşînin.

-----------------------------------

Nivîskar: KURDO BAKSÎ kurdo.b@hotmail.com
Weşandin: 2009-06-11
Xwendin: 14238