Nefel

[ ÇARŞEM, 2024-12-04 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Her tişt ji bo mêran! – suneta keçan!

[STOCKHOLM, 3/1 2009]

Mafê mêran heye ko bi çendîn jinan re bizewicin.

Mafê mêran heye ko li jinan bidin.

Mafê mêran heye ko çarçoveya jîyana jinan daynin.

Mafê mêran heye ko çend gav li pêş jinan bimeşin.

Mafê mêran heye ko serok bin, reîsî cumhûr bin, wezîr bin.

Mafê mêran heye ko ji jîyanê tahmeke xweş bigirin.

Mafê mêran heye ko bi şev neyên malê û bi kêfa dilê xwe bigerin.

Mafê mêran heye cilên xweşik li xwe bikin, wek mêrên mêrane xuya bin.

Mafê mêran hene û hene…

Ma mafê jinan nîne?

Belê, elheq mafê wan jî hene:

Mafê jinan heye ko li malê li zarokan miqate bin.

Mafê jinan heye ko xwarinê çêkin.

Mafê jinan heye ko mêrê wan hewîyekê bi ser wan de bîne.

Mafê jinan heye ko cilên fireh li xwe bikin da ko ji agirê çavên mêrên tolaz rizgar bin.

Mafê jinan heye ko bi destê keçên xwe bigirin û wan bibin ba jineke sunetçî.

Çi? Sunet?

Suneta çi? Ez xewn dibînim, an xeyaleke nîvro ye?

Ne xeyal e, ne jî xewn e, rastîyeke tehl e.

Çima sunet dikin? Çi dikin?

Belê, klîtorîsa wan jêdikin an jî rehên wê tehrîb dikin da ko jin ji cinsîyeta xwe tehmê nestînin, tu carî şad nebin!

Tehmê bistînin dê çi bibe?

Çima naxwazên keçên wan tehmê bistînin?

Dibe ko tevzînokên laşê wan serî li wan gêj bike.

Dibe ko bibin îsyankar.

Ma ev e, tirsa we mêran?

Ji bo serdestî û hukumranîya mêran ya li ser jinan her û her bidome, hûn wisa dikin!?

Nexwe ji cinsîyeta xwe tehmstendin û şadbûn hew mafê mêran e!

Qaşo rojnamevanên me kurdan jî hene.

Lê em agahdarî ji kûderê werdigirin, em meseleyê ji kûderê dibihîzin?

Rojnameyeke emerîkî!

Çend roj berê rojnameya emerîkî ya bi navê Washington Postê nivisî û bi wêne ev meseleya sunetê anî rojevê.

Dunya alem hemî pê hesîyan ko ne tenê li hin gundên Efrîkayê, lê li Kurdistana Başûr jî keçên xwe sunet dikin.

Ma berê kesî nedizanî ko welê dikin?

Gelo haya civata kurdan ya li başûr ji meseleyê tune bû?!

Ma mêran jî sunet nakin?

Belê. Madem wisa ye, çima li hember suneta mêran dernakevin?

Ma gava mêran sunet dikin gelo organê wan tehrîb dikin, an ji bo zêdetir friksîyon çêbe çermê li serî jêdikin?

Ji bo tehma zêde welê dikin ne wisa!!!

Ma tehma cinsîyetê hew li klîtorîsê ye?

Temamê laşê jinan bi erotîzmê dagirtî ye, nezanino!

Karê we dijwar e, divê hûn gelek deverên wan sunet bikin!

Ji hêla din:

Wezîrê mafê mirovan yê Kurdistanê çi dibêje: Em nikarin ji bo her tiştekî piçûk qanûnan daynin!

Nexwe ji bo çîya û newalên mezin qanûn hewce ne!

Pirsgirêka bi hezaran keçên kurdan ne hêjayî qanûnê ye!

Berpirsîyarên li ser hukum, qanûnçêkiroxên civatê!

Çi zilm û eybeke mezin ko hûn hîn jî, li hember vê êş û zilma li keçên kurdan dibe, bêdeng dimînin!

Civatek ko qanûnên pirjinîyê qebûl dike, civatek ko li hember vê êş û azara sunetkirina keçan bêdeng dimîne, civatek ko mirovên wê ne bi ked û xebata xwe, lê bi “parsê” jîyana xwe didomînin, civatek ko li hember qanûnan wekhevîya hevwelatîyên xwe naparêze…

Bêjim çi?

-----------------------------------

Nivîskar: SERDAR ROŞAN rosan21@nefel.com
Weşandin: 2009-01-03
Xwendin: 11040