Nefel

[ ÇARŞEM, 2024-12-04 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Prosesa şirîkatiya desthilatê û TRT-ya kurdî

STOCKHOLM, 22/12 2008 — Miletê kurd ji destpêka avakirina Tirkiyeya siyasî ya îro ve ne şirîkê desthilatê bû û hemî desthilata ko hebû jî bi navê nijada tirkîtiyê û di qalibê tirkîtiyê de bû. Tirkiye îro hatiye li qunaxekê sekinî ye ko hêdî nikare vê dewletê bêyî şirîkatiya miletê kurd di desthilatê de îdare bike.

Heger serûbinbûneka wekî li Iraqê li Tirkiyeyê çênebe şirîkatiya miletê kurd jî di roj û şevekê de hema ji nişkê ve çênabe. Şirîkatî dê gav bi gav pêk bêt. Heger kurd ji îro û pê ve di siyaseta aşkera û sivîl de xwedîtiyê li doza xwe bikin prosesa şirîkatiyê jî dê leztir bibe û ne dûr e ko di paşerojeka nêzîk de kurd li Kurdistanê bibin desthilatdarên îdarî yên welatê xwe.

Partiya kurdan ya herî xurt DTP û serokê wê Ahmet Turk behsa awayekê »xweîdarekirina mehelî« dikin ko ji desthilata serokatiya belediyeyan zêdetir e lê belê ne federasyon û ne konfederasyon e. DTP behsa mafê perwerdeya bi zimanê kurdî û qebûlkirina nasnameya kurdî jî dike lê belê behsa desthilateka îdarî ya xurt nake.

Şirîkatiya desthilatê ne di îdareya serokatiya belediyeyan tenê de ye herçend DTP-ê û PKK-ê niho pir bala xwe dabe ser hilbijartinên belediyeyan. Şirîkatiya desthilatê divêt di medyayê de, di ticaretê de, di siyasetê de, di ordiyê de û di gelek warên dî de çêbe.

Bi rêya TRT-ya kurdî Tirkiyeyê dergeh ji miletê kurd re vekir da di medyaya dewletê de bibe şirîka desthilatê. Ev gaveka pozîtîv e û divêt kurd xwe jê nedin paş. Bi sedan kurd dê di vê kanala TRT-yê de kar bikin û xizmeta kultur û zimanê xwe bikin. Guman tê de nîne ko TRT-ya kurdî dê dijminahiya Tirkiyeyê neke û berjewendiyên wî welatî biparêze.

Gerînendeyê giştî yê TRT-ê Ibrahim Şahînî di heqê siyaseta TRT-ya kurdî de got ew dê kanaleka familyeyî be û dê xizmeta kurdên ko heta îro fêrî tirkî nebûne bike û aşkera jî kir ko TRT-ya kurdî dê propagandeyeka bêtam ya dewletê neke.

PKK-ê van rojan bi daxuyaniyekê ev kanala kurdî ya TRT-yê wekî »kanaleka îxanetê« bi nav kir û ji kurdan xwest ko xwe jê dûr bigirin. PKK di rexneyên xwe de hewqasê tûj bû ko TRT-ya kurdî şibihand medyaya kurdî ya di dema Sedam Hisênî de û paşê got:

— Dema ew [AKP] lêdixebite ko îradeya azadiyê [PKK-ê] bişkêne û dengê wê bifetisîne li hemberî TRT-ya kurdî ko dê bêt wateya dengê îxanetê, divêt hîç kurdekê ko bibêje ez kurd im, şerefmend im, welatparêz im, terefdarê axa xwe, kultura xwe û zimanê xwe me bi vî awayî yan bi wî awayî bi vê kanala îxanetê de ko parçeya planeka xeternak e cih negire û xizmeta wê neke.

Dema mirov van gotinan dixwîne mirov yekser difikire ko armanca PKK-ê ne bidestxistina mafên kulturî û neteweyî û beşdarbûna miletê kurd di desthilatê de ye. Jixwe PKK-ê berê di program û beyanên xwe de gotiye ko ew partiyeka fikrî ye û hîç wextekî naxwaze bibe desthilatdar yan şirîka desthilatê.

Baş e heger PKK daxwaza desthilatê neke çima hewqasê ji TRT-ya kurdî ditirse û wê wekî »kanaleka îxanetê« bi nav dike? Sebebê wê aşkera ye. PKK di daxuyaniya xwe de rexneyan li dewleta Tirkiyeyê yan ordiya Tirkiyeyê nake. PKK rexneyan li hikûmeta AKP-ê dike û dibêje ev planeka AKP-ê ye li dijî PKK-ê û Roj TV.

PKK bi rêya rêberê xwe Abdullah Ocalanî û bi rêya DTP-ê li Tirkiyeyê bi awayên cida şirîka desthilatê ye. Yanî kurdên ko di TRT-ya kurdî de kar bikin dê wekî DTP-ê bibin şirîkên desthilatê. DTP bi parlementerên xwe li Parlamentoya Tirkiyeyê û bi serokbelediyeyên xwe li belediyeyên Kurdistanê şirîka desthilatê ye.

TRT-ya kurdî ji kurdên ko ne terefdarên PKK-ê ne karmendan tayîn dike û heta ko jê têt naxwaze hevalbendên PKK-ê nêzîkî TRT-ya kurdî bike. Sebebê esasî yê dijminahiya PKK-ê jî ev e. Heger TRT-ya kurdî kadroyên xwe ji DTP-ê û hevlabendên PKK-ê bineqanda hingê PKK-ê qet û qet dengê xwe nedikir û nedigot ko ew »kanala îxanetê« ye.

PKK dixwaze li Kurdistanê hemî kurd di sef û kontrola wê de bin. Lê belê hikûmeta îro dixwaze rê ji kurdên dî re jî veke. PKK-ê Roj TV heye û ew têra wê dike. Bila TRT-ya kurdî ji kurdên ne hevalê PKK-ê re be.

***

Têbînî: Ev nivîsar bi soranî di rojnameya Rûdawê de li Hewlêrê û bi kirmancî jî di sîteya Nefelê û sîteya Rûdawê de têt weşandin.

-----------------------------------

Nivîskar: ARIF ZÊREVAN zerevan@nefel.com
Weşandin: 2008-12-22
Xwendin: 10269