Nefel

[ ÇARŞEM, 2024-12-04 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Qanûna dujiniyê dê li ser kurdan û Kurdistanê biha bibe mal

STOCKHOLM, 10/12 2008 — Van demên dawiyê nûçeyên baş ji Kurdistana azad ya Iraqê nayên. Rewşa Kerkûkê ne diyar e û referanduma Kerkûkê her ko diçe paşde dikeve. Sinorên Kurdistana Iraqê (80 000 kîlometreçarçik) hê jî ne diyar in. Danûstandinên Bexdayê û Hewlêrê ne baş in. Tu dibêjî qey Nûrî Malikî brayê Sedam Hisên e.

Elî Kimyayiyê ko Helebçe wêran kir du caran bi cezayê îdamê hat ceza kirin lê belê nayêt îdam kirin. Diyar e ko li Rojhilata-nêvê û li Xerbê di pirtûkên dîrokê de meseleya kuştina şîiyan li Necefê û Nasiriyeyê ji qetlîama Helebçeyê giringtir e.

Mirov dikare bi hêsanî bibêje ko rewşa Kurdistana Iraqê ne zêde baş e. Di rewşeka wiha de mirov dixwest ko partî, miqamên desthilatê û Parlamentoya Kurdistanê karên baş bikin da dostên kurdan yên li cihanê arîkarî û piştgiriya xwe ji bo kurdan û Kurdistanê berdewam bikin.

Gelo divêt kurd çi bikin. Divêt kurd xwe bi ereb, faris, û tirkan re miqayese bikin yan jî li gor bingehên demokrasî û azadiya cihanê hereket bikin?

Belê, ji bo ko mirov baş welatekî fêm bike divêt mirov li çar tiştên wî welatî fedbike: 1) Parastina bedenî ya hemwelatiyan, 2) Mafê xweîfadekirina azad, 3) Rûmetgirtina rojnamevaniyeka azad û 4) Mafên jinan.

Ez dixwazim di vê nivîsarê de behsa xala dawiyê bikim: mafên jinan. Li gor qanûna 1959-ê ya dewleta Iraqê zilamek dikare bi awayekê resmî çar jinan bîne. Îsal hikûmeta Kurdistanê xwest wê qanûnê biguhore. Lê belê mixabin guhortineka biçûk çêbû! Li gor qanûna nû zilamek nikare bi awayekê resmî çar jinan bîne lê belê dikare didoyan bîne! Belê hinek insan li Kurdistanê rûniştine û dibêjin kurd ji ereban bipêşdetir in.

Na ezbenî. Meseleya du jinan dê li cihanê li ser kurdan biha bibe mal. Gelek dostên kurdan yên li Swêdê û Ewropayê ji kurdan aciz bûne. Piştgiriya dostên me her roja ko diçe kêmtir dibe. Bi rastî jî ez ji Kurdistanê hez dikim lê belê nikarim tiştên xelet biparêzim.

Bi çi mantiqê mirov hinek mafan dide mêran û nade jinan? Van rojên ko ji me re piştgiriya cihanê pir û pir giring e divêt em aqilane hereket bikin. Divêt em mafê axaftina zad, mafê rojnamevanan, mafên zarokan û mafên jinan zêde bikin.

Heger em rûmetê nedin mafên hemî kategoriyên civata xwe ti lobî nikare piştgiriyê ji bo Kurdistana azad peyda bike. Rewşa kurdan û Kurdistanê nazik e.

Divêt Kurdistan di warê aboriyê de Swîsreya Rojhilata-nêvê be, di warê leşkerî de Îsraîla Rojhilata-nêvê be û di warê demokrasiyê de jî Swêda Rojhilata-nêvê be da bibe nimûne ji bo dewletên cîran. Çênabe ko em wekî dewletên cîran bifikirin yan jî wekî wan hereket bikin.

-----------------------------------

Nivîskar: KURDO BAKSÎ kurdo.b@hotmail.com
Weşandin: 2008-12-10
Xwendin: 15194