Nefel

[ ÇARŞEM, 2024-12-04 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Hestên neteweyî, newroz û adaptasyon

STOCKHOLM, 17/3 2008 — Tê gotin ko mefûma neteweyê teqabulê xeyalkirina cemaeteke hevbeş dike ko ferdên cemaetê xwe wek endamên grûbeke mişterek dibînin digel ko ew ne nasên hev in jî.

Lê di çarçoweya fikir, parvekirin, hevbeşî û pîrozkirina hin tore û sembolan de, di rojên mueyen de dilê wan ji bo eynî tiştî lê dide û li eynî tiştî difikirin, kêfxweşî an jî xemgînîya xwe bi hev re didin der.

Di şahîyan de bi hev re dikevin govendê, pîyaleyên xwe ji bo siheta hev radikin…

Di rojên xemgîniyê de li karesatên tarîxî difikirin, dibin hevbeşê xemgînîya ferdên civata xwe…

Bi awayên cuda be jî kêm zêde rojine weha di tarîx û kultura hemî miletan de hene. Her yek ji wan li gorî tore û kultura xwe, di wan demên dîyar de, ya hewce pîroz dikin an jî bi bîr tînin.

Her sal di eynî dem û saetê de bombebarankirina Hîroşîma li Japonyayê tê bi bîr anîn.

Her sal di 31 kanûnê, êvara sersalê de, li gelek welatan sersal tê pîroz kirin.

Hersal li gorî roja wan, cejnên misilmanan yên mezin têne pîroz kirin.

Bi kurtî kesek an jî miletek bi kêfa dilê xwe dema pîrozkirin an jî bibîranîna wan rojên dîyarkirî naguhere.

Lê çi mixabin ko li ba me kurdan ne welê ye.

Ev 25 sal e ko li Swêdê, ji alî kurdan ve, newroz tê pîroz kirin lê çi heyf ko carek tenê jî di roja êvara newrozê de ev tişt pêk nehatîye. (Dibe ko bêhemdî carekê di roja wê de bûbe!)

Ma ev xisûsîyet hew li ba kurdên li Swêdê weha ye? Na.

Mirov li dem û rojên pîrozkirina newrozê yên li welatên cuda - ko kurd lê dimînin -, temaşe dike dibîne ko haylo, hin kurd hefteyek berê roja newrozê, hin jî hefteyk an du hefteyan piştî dema newrozê, radibin newrozê pîroz dikin.

Gelo ev çima wisa ye, sebeb çi ne ko em kurd weha dikin?

Ji bo nedirêjkirina nivîsarê ez ê kurt bêjim:

Bi ya min sebebê esasî lawazbûna şiûra wê xeyala hevbeş e ko min li jor behs kir.

Bi gotineke din li ba me kurdan hestên neteweyî û asasê tore û hevbeşîya pîrozkirin an jî bibîranîna rojên weha lawaz e.

Ji ber ko em ne xwedî dewlet û dezgehên dewletî ne, me ”aqileke” hevbeş jî nîne.

Ji ber nebûna dewletê, ji ber dagirkerî û tarûmarkirina kultur û hafizeya me ya hevbeş ya tarîxî û çandî, ji ber asîmîlasyon û şertên dijwar, ew şiûr û hestên li ba milet û cemaetên din, li ba me pir lawaz in.

Em hîn bûne ko xwe li gorî şertên milet û cemaetên din adapte bikin, bikevin qalibên wan, hest û şiûra xwe nedin pêş.

Eger ne weha be, ez fam nakim, gelo çi sebeb heye ko kurd newrozê ne di roja wê de pîroz bikin?

Gelo faris newrozê di meha nîsanê de pîroz dikin?

Gelo we bihîstîye ko kesî ne di 31-ê kanûnê lê di 5-ê çileyê de sersal pîroz kiriye?

Gelo em ê kengî dev ji adaptasyonê berdin û bibin xwedî kultur û şiûreke kurdî?

Gelo em ê kengî bibin xwe bi xwe?

Di 21-ê adarê de newroza we hemîyan pîroz be!

-----------------------------------

Nivîskar: SERDAR ROŞAN rosan21@nefel.com
Weşandin: 2008-03-17
Xwendin: 6504