Nefel

[ ÇARŞEM, 2024-12-04 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Fermana rewşenbîrên kurdan li Îranê

STOCKHOLM, 1/2 2008 — Meha îlona 2007-ê mîlîtan û femînîstên kurdan Ronak Seferzadeh û Hanna Abdî ji aliyê eskerên Îranê ve hatin girtin û niho di zîndaneka Tehranê de ne. Sûcê wan: Ronak û Hanna kampanyayeka bi navê ”yek milyon îmza ji bo mafên jinan” dabûn destpê kirin. Federasyona Enternasyonal ya mafên mirovî heroj Îranê protesto dike lê belê fayde nake.

Roja 15-ê çiriya-paşiyê (januari) xwendekarê kurd Ebrahim Lutfullahi li zîndana Sineyê (Senendej) hat kuştin. Ebrahim neh rojan berî ko bêt kuştin hatibû girtin. Sedema girtina wî ti caran aşkera nebû. Dewleta Îranê got ko Ebrahim Lutfullahî bi xwe xwe kuştiye lê belê ev ji rastiyê dûr e.

Roja 13-ê oktobera 2007-ê laşê doktor Zehra Ban-Ameri li zîndana Hemedanê mirî hat dîtin. Nîv seetê berî mirina xwe wê bi kêf û şahî bi brayê xwe re xeber dabû lê belê berpirsên hikûmeta Tehranê got Zehra xwe kuştiye!

Rojnamevanê kurd yê bi nav û deng Reza Welîdzadeh di meha novemberê de li Tehranê ji ber nivîsarekî hat girtin. Nivîsar çi bû? Belê, roja 28-ê oktobera 2007-ê wî di bloga xwe de nivîsand ko serokkomarê Îranê Mehmûd Ehmedînejad ji bo parastina xwe di programên resmî de çar segan bi kar tîne!

Niho Îran dibêje Welîdzadeh enformasyonên dizî yên dewleta Îranê raberî cîhanê dike. Sedema kûr ew e ko seg wekî lewitî tên hesibandin û vê gavê ayetullahên biqudret wan segan di siyasetê de li dijî Ehmedînejadî bi kar tînin. Heta rojnameya brîtanê The Guardianê jî behsa vê meseleya kûçikan kir.

Gelo Reza Welîdzadeh kî ye? Ew sala 1975-ê li Sineyê ji dayîka xwe bûye û eve neh sal in ko rojnamevaniyê dike. Ew endamê rêxistina navneteweyî ya rojnamevanên cîhanê ye. Heta îro wî di 18 rojname û ajansan de kar kiriye. Wî redaktoriya neh kovaran kiriye. Sala 2002-ê û 2006-ê xelata rojnamevanê herî baş yê Îranê standiye (carekê ji bo reportaja herî baş û carekê jî ji bo krîtîka pirtûkan).

Girtina Welîdzadeh Îranê dihejîne û bi milyonan xwendevan li wî difikirin. Welîdzadeh 32-salî ye û nexweşiya astmayê pê re heye û bêderman maye.

Sê mamostayên ola behaî li bajarê Sineyê hatin girtin. Herwisa sê xwendekarên unîversîteya Amir Kabir li Tehranê meha desemberê hatin girtin û piştî 15 rojan mehkemeya bilind ew azad kirin lê belê heta niho jî di zîndanê de ne.

Belê, ev mînakên li jorê çi diyar dikin? Îran ji rewşenbîran û kurdan gelekê ditirse. Mirovên ko kurd û rewşenbîr bin hema hey hawar! Wekî ko têt zanîn rojnamevanê kurd Ednan Hesenpor bi cezayê îdamê hatiye mehkûm kirin ji ber ko wî rojnamevanî kiriye.

Lê belê roja îniya borî hikûmeta Îranê got ko Ednan Hesenpor ne rojnamevan e! Belê, Îran diheje û cîhanê ji wê tiştek fêm kiriye: Roja 20-ê sibata 2008-ê rêxistina Rojnamevanên tixûbnenas xelata xwe ya azadiya fikrê dide Ednan Hesenpor. Wexta ko lobiya kurdan baş kar dike bi azadiya mirovan re xelat jî têt.

Li dawiyê dixwazim bibêjim ko rewşa 10 milyon kurdên Îranê gelek xirab e. Divêt di platformên navneteweyî, di korîdorên dîplomasiyê û di medyaya cîhanê de em piştgiriya wan bikin û xwedîtiyê lê bikin.

-----------------------------------

Nivîskar: KURDO BAKSÎ
Weşandin: 2008-02-01
Xwendin: 13204