Nefel

[ ÇARŞEM, 2024-12-04 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Ez li kurdekî digerim ko bihesidimê

STOCKHOLM, 8/9 2007 — Hesûdî xisletekê insanî ye ko bi hemî benderihan re heye. Mirov dikare ji nivîskarekî biheside û bibêje xwezî min kitêbeka ji ya wî baştir binivîsanda. Mirov dikare ji muzîsyenekî biheside û bibêje xwezî min muzîkeka ji ya wî baştir çêkira. Mirov dikare ji siyasetmedarekî biheside û bibêje xwezî min ji wî baştir rêberiya miletê xwe bikira.

Nimûneyên wiha pir in û ne hewce ye ko ez behsa hemî kar û janran bikim û bibêjim xwezî di filan warî de min ji filan kurdî baştir filan kar bikira. Van rojan ez lêfikirîm û min çavê xwe li kurdên ”nimûne” û ”berçav” gerand û ji xwe re got gelo ez ji kê dihesidim.

Mixabin min kurdekê romannivîs nedît ko ez bibêjim xwezî min romaneka ji ya wî baştir binivîsanda. Mixabin min muzîsyenekê wisa nedît ko ez bibêjim xwezî min mûzîka stranekê ji ya wî baştir çêkira. Mixabin min siyasetmedarekê wisa nedît ko ez bibêjim xwezî ez di cihê wî de bûma û min baştir rêberiya miletê xwe bikira.

Ez bi xwe rojnamevan û nivîskar im û min berpirsê medyayekê nedît ko ez bihesidimê û min rojnamevanekê ko ez bihesidimê jî nedît.

Kurdên maldar û dewlemendên madî pir in û min dixwest ez ji wan dewlemendtirê milk û emlakê dinyayê bim lê belê mebesta min di vê nivîsarê de ne dewlemendiya madî ye û ez behsa dewlemendiya edebî, hinerî, siyasî, civakî û kulturî dikim.

Min dixwest kurdek hesûdiyê bi min re çêke. Min dixwest kurdek ji min baştir zimanê kurdî bi kar bîne da ez bihesidimê. Min dixwest kurdek ji min baştir ruhê zimanê kurdî zeft bike û hevok û komekan baştir ava bike û îmlayeka serasttir bi kar bîne da ez bihesidimê.

Min dixwest kurdek yan jî rojnamevanekê kurd zimanê rojnamevaniyê bi kurdî ji min baştir, serwexttir, enformatîvtir û konkrettir bi kar bîne da ez bihesidimê. Dema ko ez behsa zimanê kurdî dikim ez behsa kirmancî û soraniyê dikim û di nêv soranîaxêvan de bikarhênerên zimanî yên ji kirmancîaxêvan baştir nînin û bila soranîaxêv xwe gelekê payedar nekin ji ber ez ji hîç benderihekê wan nahesidim.

Kurd miletekê mezin e. Divêt di nêv kurdên sax de bi hezaranan kes hebûna ko ez jê behesidiyama û min bixwesta ko ez wekî wan bim yan ji wan çêtir bim.

Ez li kurdekî digerim ko bihesidimê.

Heger ez behsa hinek kesan bikim û bibêjim ka ez ji wan dihesidim yan ne dê mebesta min bigewdetir bibe.

Ez ji serokê Kurdistanê Mesûd Barzanî nahesidim ji ber wî wekî rêberê kurd yê herî naskirî nekariye siyaseteka wisa kurdistanî bimeşîne ko ez bihesidimê. Digel hemî derfetên ko jê re derketin wî nekarî ji qalibê hersê wîlayetên taxa jêrî ya Kurdistanê derkeve û ew di nêv xirûcir û karên îdarî yên wê taxa biçûk de fetisî û hêdî-hêdî pusulaya xwe ya rêberekê stratejîk winda dike. Kurdistan ji wî re taxa jêrî ye û divêt ew bizane ko taxa jêrî taxa jêrî ye û ne Kurdistan hemî ye.

Hîç zimanzanekê kurd yê ko ez bihesidimê nîne. Korî Zanyarî Kurdistan yan jî bi navê xwe yê nû Akademiya Kurdistanê li Hewlêrê qewareyekê vala ye û bi çend ”memûrên siyasî” yên ko tê de kar dikin ne zimanê kurdî bi pêş dikeve û ne jî plan û stratejiyek bo zimanê kurdî têt danîn.

Desthilatdarên Kurdistanê meseleya ”zimanê yekgirtî” kirine derdê xwe û tu dibêjî qey miletê kurd û zaravayên zimanê kurdî wan çêkiriye heta ko ew bikarin hinek zaravayan ji halê rakin û yekî li ser yê dî ferz bikin.

Peymaneka neteweyî di nêvbera miletê kurd de heye û ew peyman jî li ser pirzaravatiyê hatiye ava kirin. Yê ko bixwaze van zaravayan têkbide yan ji halê rake ew dê berî her tiştî peymana neteweyî ya miletê kurd têkbide û bibe muxerribê peymana neteweyî ya miletê kurd.

Kirmancî, soranî, zazakî û hewramî hemî jî zaravayên kurdî ne û desthilata taxa jêrî ya Kurdistanê heger rê ji pêşketina zaravayên kurdî re xweş bike dê peymana neteweyî bêt parastin û heger desthilatdarên taxa jêrî ya Kurdistanê ji bo parastina berjewendiyên xwe yên siyasî bixwazin soranî li ser kirmancî ferz bikin û soranî tenê bikin zimanê resmî û perwerdeyê mimkin e ko ew bikarin li taxa jêrî muxerribiyê bikin lê belê hikmê wan dê her li taxa jêrî bimîne û ew dê bi ser jî nekevin.

Dema ko ez li medyaya kurdî dinêrim hîç rojnameyek, kovarek, televîzyonek yan dezgeheka medyaya kurdî nîne ko ez bihesidimê û bibêjim ko xwezî ez birêveberê filan dezgeha medyayê bûma. Rêveberên hemiyan jî ”memûrên siyasî” ne û xudanên esasî yên wan dezgehan jî ne hewqasê medenî ne ko rê bidin medyayeka profesyonel û azad heta ko mirov bibêje ”ax, xwezî ez midûrê filan televîzyonê bûma, da min filan kar baştir bikira” ji ber birêveber bixwazin bikin jî ”xudan” rê nadin û tenê doza meddahî û borîzaniyê dikin.

Ez li kurdekî digerim ko bihesidimê. Xwedê kurdên ko ez bihesidimê zêde bike û ne xem e bila hesûdiya min jî zêde bibe.

-----------------------------------

Nivîskar: ARIF ZÊREVAN
Weşandin: 2007-09-08
Xwendin: 7208