Nefel

[ ÇARŞEM, 2024-12-04 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Tirkiye dixwaze têkçûna siyaseta xwe ya li başûr li bakur telafî bike

HEWLÊR, 23/6 2007 — Tirkiye bêçare ye. Hêzên kemalîst û mîlîtarîst yên tirkan bêçare ne û ew bi tehdîdên li ser başûrê Kurdistanê û bi terora li bakurê Kurdistanê dixwazin kaosekê çêkin û dibêjin qey ji kaosa ko wan organîze kiriye dê rêyeka felatê ji wan re bête dîtin.

Têketina başûrê Kurdistanê û nehiştina qewareyê siyasî yê Kurdistanê xeyal e û general û kemalîstên tirkan vê baş dizanin. Bombebarankirina hinek deverên li ser tixûbê bakur û başûrê Kurdistanê jî terorîzm e û Tirkiye ti xêrê ji terorîzma ko ew bi destê hêzên xwe yên eskerî dike yan jî bi navê Partiya Karkerên Kurdistanê dike nabîne.

Serokwezîrê tirkan Recep Tayyip Erdogan bi xwe kuştinên vê dawiyê yên eskerên tirkan yên ko bi navê PKK-ê tên kirin bi prosesa hilbijartinan ve girêdide û dibêje têkiliya van bûyeran bi hilbijartinên giştî yên Tirkiyeyê ve heye.

Vêca çi esker bi xwe bikin û çi jî bi navê PKK-ê bên kirin yan jî PKK bi xwe bike ti têkiliya van bûyeran bi doza neteweyî ya kurdî ve nîne û serê werîsê vê terorê hemiyê di destê generalên tirkan û rêberê PKK-ê Abdullah Ocalanî de ye.

Piştî ko hêzên kemalîst yên tirkan rê li ber serokkomariya wezîrê derve Abdullah Gulî girt siyaseta Tirkiyeyê mecrayê xwe guhort û hilbijartinên giştî aktuel bû. Partiya AKP-ê û Recep Tayyip Erdogan wisa bawer dikin ko 22-yê tîrmehê di hilbijartinan de ew dê bi hejmara dengan xurttir bibin û dê qedrê gotina wan li hemberî kemalîstan û eskeran zêdetir bibe.

Ji bo ko hejmara parlamenterên AKP-ê kêmtir bibe vê carê generalan û rêberê PKK-ê Abdullah Ocalanî rê da DTP-ê ko bi navê namzetên serbixwe bikeve hilbijartinan û DTP li gor xwe hêvî dike ko 25–30 kursiyan wergire lê belê di realîteyê de mimkin e ko DTP 15 kursiyan jî bi dest ve neîne.

Hêviya desthilata başûrê Kurdistanê ew bû ko DTP digel Kadep, Hak-Par û kesên serbixwe yên kurd koalîsyoneka kurdî ava bike û li seranserê bakurê Kurdistanê bi yek dengî beşdarî hilbijartinan bibe û bi qasî 40–50 kursiyan qezenc bike. Lê belê wekî hemî caran vê carê jî DTP-ê bi ya Abdullah Ocalanî û generalan kir û rê neda ti namzedên ko ne di kontrola wan de bin. Yanî bi ihtimaleka pir mezin heger DTP bi çend kursiyan bikeve parlamentoya tirkan jî dê piştgiriya xeta kemalîst bike û li dijî AKP-ê helwêstê wergire.

Nivîsara hevseroka DTP-ê Aysel Turgluka kemalîst ya ko di rojnameya Radikalê de derket diyar dike ka DTP dê siyaseteka çawa bi rê ve bibe û ka DTP dê çawa parêzvaniya kemalîzmê û nasyonalîzma tirkîtiyê bike.

Ji ber vê siyaseta kemalîst ya DTP-ê desthilata başûrê Kurdistanê duayan ji AKP-ê re dike û dixwaze ko AKP li seranserê Tirkiyeyê û bakurê Kurdistanê bi ser keve ji ber tenê AKP dikare zend û bendên hêzên eskerî û kemalîstan bişkêne.

Hêzên eskerî yên tirkan ji bo ko tehdîdên xwe yên li ser başûrê Kurdistanê zêde bikin hersê wîlayetên bakurê Kurdistanê Sêrt, Şirnex û Hekarî wekî “herêma ewlekariyê” îlan kir û li ser tixûbê bakur û başûrê Kurdistanê eskerên xwe kom dikin.

Heger armanca tirkan têketina başûrê Kurdistanê be rê ji wê re nîne. Heger armanca tirkan rêlibergirtina têkiliyên başûr û bakurê Kurdistanê be ew têkilî ne bi rêya deverên çiyayî ye. Di vê serdema enformasyon û teknolojiya modern de têkiliya herçar parçeyên Kurdistanê digel hev bi rêya medyayê ye, bi rêya ticaretê ye, bi rêya seferên hewayî û balafiran e û bi gelek rêyên neçiyayî ye.

Vêca heger mantiqek ji vê şidet û terora ko hêzên eskerî yên tirkan li bakurê Kurdistanê pêk tînin re hebe ew jî ew e ko tirk bi navê tehdîd û êrişên li ser başûrê Kurdistanê dixwazin bakurê Kurdistanê saxlem bikin yan ne ew dizanin ko başûr ji destê wan derketiye.

-----------------------------------

Nivîskar: ARIF ZÊREVAN
Weşandin: 2007-06-23
Xwendin: 6161