KURDISTAN, 9/5 2007 — Bîstûnehê nîsanê li Hewlêrê konferansa şeşemîn ya Kombenda Kawa bo Çanda Kurdî çêbû û di konferansê de min behsa kar û xebata Kombenda Kawayê kir. Ez teksta axaftina xwe ya di wê konferansê de li jêrê belav dikim.
***
Birêz Fazil Mîranî sekreterê polîtbîroya PDK-Iraq
Birêz parêzgarê Hewlêrê!
Birêz nûnerê parlementoya Kurdistanê
Birêz serokê zanîngeha Selahedînê
Endam û layengerên Kombenda Kawa
Amadebûyên birêz, rewşenbîr û xebatkarên herçar parçeyên Kurdistanê
Spasî û bixêrhatina we dikim bo konferansa şeşemîn ko di bin dirûşmeya "Geşkirina rewşenbîriya neteweyî" de tête li dar xistin.
Di salvegera 109an ya rojnamegeriya kurdî de, em li Hewlêra paytext dest bi konferansa xwe ya şeşan dikin. Berî salekê di vê mehê de me konferansa xwe ya pêncan li dar xist û niha em sala xwe ya heştan temam dikin. Em yekem dezgeha rewşenbîrî bûn ko birêz kak Fazil û şehîd Franso Herîrî ew vekirin – niha zêdeyî 200 komele û rêxistinên girêdayî karûbarê rewşenbîrî û mafên mirovî û jinan û karê xêrxwazî û aborî û zanistiyê hene.
Kombenda Kawa sala 1974an li paytexta Lubnanê li Bêrûtê li ser şop û rêbaza dibistana bedirxaniyan ya çandî û siyasî hat damezirandin. Kombend li mişextiyê hate dinyê weke tilûrekî bêgane ji ber zulm û zorê û hate vî parçê giranbuha ji welatê me yê dîrokî û dê Hewlêra ko em hembêz kirin di bîranîna me û nifşên nû de jî her bimîne.
Belê! Ji erkên me ye û weke wefadariyekê em spasiya xwe pêşkêşî berpirsên vî parçî yê ko ev derfet ji me re peyda kir, bikin. Her weha ji mafê me ye ko em hevpişkên azadiyê û avakirin û bihêzkirina semyanên neteweyî weke çanda neteweyî bin neko hevpişkên deselat û samanê bin!
Karê me yê destpêkê çapkirin bûye, yekem kitêba me çap kir ya lehengê kurdê Sovyêtî Fiyodor Lîtkin bû, yê ko mêrxasiyeke mezin di şerê cîhanî de li dijî faşîstan nîşan da.
Xuşk û birayên birêz!
Em hêjî li ser rêbaza xwe ne, daxwaz dikin ko armancên xwe yên serekî pêkbînin:
— Pêşvebirina çanda kurdî bi naverokeke mirovî û demokiratîk, berdewamkirina xwendina rêbaza Barzanî bi rengekî vekirî û nûjen, gengeşe û dûvçûna ezmûna başûrê welêt di nav de deverên erebkirî, çespandina çareseriya federe ji pirsgirêka kurd re di çarçoveya mafê çarenivîsê de, şopandina pirsgirêkên neteweyên Kurdistanê yên din, teror-islama siyasî, erkên tevgera neteweyî û rastî û asoyên wê, pirsên jinan li Kurdistanê, karûbarên gencan, pêwendiyên kurdan bi gelên din re bi taybetî ereb, jiyana kurdan li diyasporayê, pirsên ewlekariya neteweyî, danûsitendin di navbera ronakbîrên herçar parçeyên Kurdistanê de, ciyê kurdan di pêşveçûnên cîhanî û globalîzmê de, hewildan bo yekkirina gotara siyasî ya kurdî, şopandina ezmûna neteweyî kurdî li her cih û warekî, çareserkirina pirsgirêka zimanê standard û zaravan, gotûbêjkirina li dor pêşveçûnên ezmûna vî parçeyî û pêşketinên wê yên aborî û civakî û lihemberderketina şaşîtiya peydebûyî ji encama verêjên têkiliyên îstîhlak û qezenca zû û peydebûna çînên nûh.
— Karê çandî-neteweyî yê kurdî bi naveroka mirovî û demokiratîk yê ko em pêktînin eniya pêşî ya here giring û tirsnak e di jiyana gelê me de û paşeroja wî, di hember kesên ko dixwazin dîroka me çewt derxînin li hundir û derve anjî me tune bikin û zimanê me ji holê rakin û gotara me ya siyasî tevlîhev bikin, erkê me xwendina rabirdû bi dîtinek rexneyî ye û destnîşankirina erkên dema niha û pêşdîtina asoyên paşerojê ye, lihevkirin û hevkarî di navbera rewşenbîr û siyasetmedaran de.
Tiştê ko di sala buhurî de pêkhat, hilbet kêm e ji ber gelek sedemên ne di destê me de, lê bi kurtî em dikarin wisa bibêjin:
— 58 sêmîner, bi tevahî 267 semîner. Bi beşdariya 3500 kesî, tevahiya amadebûyan 25 500 beşdarvan.
— Sê heleqeyên lêkolînî: Rojhilata Navîn ya nû, Hizra neteweyî û xwendineke neteweyî ji daxuyaniyên serok Barzanî re. Em nabêjin festîval ji ber ko me biryar daniye vê termê bi kar neyênin piştî ko hinekan ew bêwate kir.
— 13 hijmar ji kovara Hawara Nû, bi tevahî 28 hijmar.
— Projeya avakirina komeke folklorî.
— Civîneke giştî ji komîteya rawêjkaran re + 26 civînên desteya nivîskaran û komîteya kargêr + 12 civînên hevbeş.
— Beşdarbûna di pêşangeha kurdî-cîhanî ya kitêban de li Hewlêrê.
— Birêxistina karekî hevbeş bi wezareta xwendina bilind û zankoya Selahedînê re (tevlî pêşkêşkirina spasiyeke germ ser pêşwazîkirina xwendekarên ji parçeyên dinê Kurdistanê).
— Pêşkêşkirina protokola rêkxistin û karê hevbeş ji wezareta rewşenbîriyê ya hikûmeta herêma Kurdistanê (bersiv heta niha jî tuneye).
— Kûrkirina Kurdistaniya Kombendê bo cara yekem û daneserheva vejanan û ev gelek pirsgirêkan çareser dike.
Pêwîstî û karê sala bê:
— Piştgirtina bernameya me ya salane ya ko dê di civînên komîteya rawêjkar û ya birêvebir de were destnîşan kirin, ew jî dewlemend e û asoyên berfireh ji hevkariyê bi xwe digire.
— Amadebûna elîtê çi bi beşdarî anjî amadebûn, tevlî berpirsên parlementoyê û rêxistinên Hewlêra paytext ji hemî şepol û neteweyan nexasime yên parêzgar.
Beşdariya komîteya rawêjkar di pêşkêşkirina pêşniyar û têbîniyan de.
— Pêşxistina ragihandinê, nimûneya sempozyuma dawî û spasiya KTV û pêşniyara amadebûna tv û rojnameyan di kar û çalakiyên Kombendê de.
— Bicîanîna soza hikûmetê di avakirin û zêdekirina piştgiriyê tevlî spasiya birêz serokê hikûmetê di derbarê piştgiriya wî de.
— Pêşkêşkirina projeyên rewşenbîrî ji hêlên pêwendîdar (seroketiya herêm, parlemento û hikûmet) re ser rêkxistin û korî zaniyarî Kurdistanî û destûra herêm û pêşniyarên berê yên hefteyên rewşenbîrî derbarê avakirina zanîngeheke neteweyî û serrastkirina rêçik û naveroka boneyên neteweyî û vejandina hinek ji wan û amadekirina hevcivîneke neteweyî çandî sala dahatî bi boneya 30-saliya Kombenda Kawa bo Çanda Kurdî.
Em wêneyekî zindî ji danûsitendina çandî û neteweyî ne, vê wêneyê biparêzin.
Spas! |
