SWÎD, 7/1 2006 — Pêşbînîkirdinî rûdawekanî sallî 2006 û çonêtî berdewambûnî pirrosey siyasî le Rojhellatî nawerrast, be Êraq û Kurdistanewe, karêkî asan nîye. Le layekewe pêdeçêt tundirrewî hêze îslameyekan û hêrişî kwêrane bo ser xellkî bêtawan, siyasetî serkutkirdinî fermanrrewakan, rûberrûbûnewey nêwan hêzî dîmukrasîxwaz û dij be dîmukrasî û gorrankarî, fişarî hikumetî Emrîka bo berdembûnî gorrankarî siyasî, abûrî û ferhengî le nawçeke da debine mayey geşbînî ya naumêdî beramber Rojhellatî nawerrast.
Em sallîş, herewek sallanî rabirdû, gorrankarî û hellwîstî siyasî le dij ya bo piştgîrî ew gorrinkariyane pabend in be birryarî serok Bush bo ladanî rijêmî Sedam Hisên le Êraq, şerrî dij be têror û layengîrî pirrosey dîmukrasî le nawçey Rojhellatî nawerrast da.
Êraq em sallîş, le ber dû ho, cêy serekî gorranî siyasî, abûrî û ferhengî debêt le nawçeke da. Yekem: Nûsînî desturêkî nwê ke tê da pêkhate serekiyekanî willateke deyanewêt bibête rêkewtinameyekî aştî bo berdewambûnî pirrosey siyasî le layen zorîney gelanî Êraqewe pesend kira. Hellbijardinî Encûmenî niwêneran hengawî serekî paş pesendkirdinî destur bû. Le çend hefte û mangî dahatû da karî giring tenha pêkhênanî hikumetêkî nwêy hawbeş nabêt, bellku astî wefay siyasî bo ew rêkewtiney debête pallpiştî ya têkdanî pêkhênanî ew hikumete, çunke serbarî hellbijardin û qisekirdin derbarî dîmukrasî le Êraq da pirrosey dîmukrasî be çendîn sallî dîkeş nagate ew astey ke tenha encamî hellbijardin birryar le ser pêkhênanî hikumet û kar û pirrogiramî siyasî bidat.
Duwem: Serkewtinî Hawpeymanî Kurdistan le rêkxistinewey siyasetî Kurdistan, dozînewey çaresey guncaw bo meseley yekîdareyî le Kurdistan, amadekirdinî dezge û mîkanîzmî guncaw bo xistinegerrî pirrosey gerranewey Kerkûk û nawçe be erebikirawekanî dîkey ke debête hoy diyarîkirdinî sinûrî desellatî û cugrafî Kurdistan, awedankirdinewey Kurdistan be şêweyekî bernamerrêzî, pesendkirdinî desturî Kurdistan karîgerî rastexoyan debêt bo serkewtinî ya sernekewtinî siyasetî serleniwêdirustkirindwey dewllet le Êraq da û behêzkirdinî egerî be dîmukrasîkirdinî Êraq. Ew dû pirroseyeş karîgerî diyariyan debêt le ser meseley têror, asîş û serqamgirî.
Le ser astî willatanî dirawisêy Êraq û Kurdistan, gorrinkarî le Turkiya da herwek çendîn sallî ribirdû debêt. Yekêtî Ewrupî le ser fişarî xoy bo gorrînî binerretî sîstêmî siyasî turkî berdewam debêt. Em pirroseye le paş birryarî Yekêtî Ewrupî bo wergirtinî Turkiya wek endamî kandîdkiraw le sallî 1999 da, le pêş birryarî Emrîka bû bo "gorrînî rijêm" le Êraq da destî pê kird. Yekêtî Ewrupî, be pesendkirinî Turkiya û bestinewey bew pirroseye, birryarî "gorrînî sîstêmî kemalîzm" î da le Turkiya.
Dekrêt em pirroseye wek diyardey le gorrinanî dezgekanî kemalîzm û paşmawekanî le Turkiya da bibîntirêt, bellam le gorristanêkî ke kem kes biçête gorristan û pirsey serexoşî çunke beencamgeyandinî gorrînî sîstêmî siyasî le serxo û be hawkarî siyasetmedarî turkî dekrêt nek be şerr û rûberrûbûnewey serbazî. Eme tewaw pêçewaney pirrojey Emrîkî ye le Êraq da, bellam çawerrwan dekrêt heman akamî hebêt: Serleniwêdirustkirdinewey dewllet le Turkiya da le çiwarçêwey be endambûnî Turkiya le Yekêtî Ewrupî da. Hêzî siyasî Kurdistan le bakûr debêt rêçarey guncaw bidoznewe bo çonêtî sûdwergirtin lem gorrinkariye binerretiye le Turkiya da. Le yek dû sallî dahatû da siyastmedarî kurdî bakûr pêwîstiyan be piştgîrî û komekî Kurdistanî başûr debêt bo darriştinî stratîjî dirêjixayen le biwarî beşdarî le gorrînî sîstêmî siyasî le Turkiya da. Kurdî bakûr debêt be wîrdî le ezmûnî siyasî başûr bikollnewe û xalle giring û serekiyan le ber çaw bigrin.
Pêşbînî dekrêt Êran em sall bikewête jêr fişarî berdewamî emrîkî û ewrupî derbarey pirogramî çekî etomî. Em fişare, hawirrî legell helbijardinî Ehmedînejad wek serokkomar ke berdewam herreşe le Îsrayil û Emrîka dekat, kardanewey nêgetîvî le ser gorrankarî siyasî le Êran da debêt. Lem qonaxe da rijêmî Êran pêşêlî mafî mirov, mafî azad û mafî gelanî Êran dekat bo parastinî sîstêmeke le gorrinkarî nawxo. Le heman kat da destkewtekanî Kurdistanî başûr karîgerî rastexoy debêt, û herwek ta êstaş bû, le ser dawakarî Kurdistanî rojhellatî, parastinî mafî gelî Kurdistan lew parçeye da, bo beşdarîkirdin le pirrosey siyasî le Êran da û bo rênegirtin le xebatî ferhengî û siyasî. |
