DIYARBEKIR, 7/7 2006 — Her miletekî xwedî çand û hêjayiyên cûda ye. Bêşik ev hêjayiyên wan di nava pêvajoya dîrokî de ji ceribandina çalakiyên wan yên madî û manewî peyda bûne û gehîştine heta îro jî. Pêdeçûn û pêşkevtina îro, li ser vê bingehê û bihûriyê hatiye avakirin. Ji ber vê, divê em dîroka xwe baş bizanin û rast têbigîjin. Her gav bîra xwe ya dîrokî teze bikin û pêş bixin. Ew miletên ko xwedî bîra bihurî û dîroka xwe nebin yan jî bîra wan a netewî lawaz be, dê dahatuya wan jî nedîyar be.
Bo me kurdan jî bîranîna kesayetiyên civakî û netewî, dê bîra me ya dîrokî teze bike û pêş bixe. Di vê çorçovê de bi derengî be jî bîranîna serokê PDKT Faîq Bucak, xwedîlêderketina hêjayiyên netewî ye û gavekî erênî ye. Divê ev cûre civînên bîranînê bo hemû serok û şexsiyetên kurdan bêne sazkirin.
Faîq Bucak, di sala 1919 de yanî di destpêka Tevgera Qoçgirîyê de li gundê Hadro ya Soregê ji dayikê bûye û di salên çalakiyên tevgera Azadî û Xoybûnê de xortekî save bû. Hemû tengasiyên civaka kurd yê wê demê tesîreke giran li ser fikr û jiyan wî kirîye. Lewma rewşa wan rojan di helbesta xwe de weha tîne ziman: Ne nan e, ne dan e, ne şîv û taştê / Ho rebîyo! Ev qas derd û bela ji kû tê / Dewlemendî li me girt êdin em bûne xezan / Hiş serê me da nema, belê, mane gêj û nezan”.
Ew di jîyana xwe ya civakî de pir çalak bû û ji ber helwêsta xwe ya li dijî neheqî û rêbaza têkoşîna wî, di nav hevalên xwe de bi navê Gandî hatibû navkirin. Wî pirsgirêkên şexsî ji xwe re nedikir xem, nedibû xemxurê şexsê xwe, lêbelê di jîyana xwe de ji bo bi mîlyonan însanên weha xemxur bû. Faîq Bucak, di bîr û bawerîyên xwe de zelal û xwedî şexsiyetek saxlem bû û di nav civata kurd de bi rêzdarî dihate pêşwazîkirin. Ji ber van xususiyetên xwe, ji bo partiyekê wek serokekî îdeal dihate qebûlkirin.
Li piştî demekî dûr û dirêj a bêdengiyê, ji ber tesîra tevgera azadîxwaz a Barzanî, li bakurê Kurdistanê jî liv û tevgereke kurdperwer dest pê kiribû. Bi teşwîq û hewildana Fehmî Bîlal (Firat) jî, di 11yê temûza sala 1965ê de Partîya Demokrat a Kurdistana Tirkiyê tête damezrandin.
Bo serokatiya partiyê teklîf li Faîq Bucak tête kirin. Di destpêkê de ji ber sedemê nehazirbûnê, vê teklîfê, du caran red dike. Ji bo îqnakirina wî, Fehmî Bîlal du caran diçe Ruhayê, mala wî. Piştî ko Faîq Bucak damezrênerî qebûl dike, bi tevî hevalên xwe ji nû ve li ser bername û nîzamnameyê dixebitin. Li ser daxwaza Faîq Bucak, di bername û nîzamnameyê de hinek guhartin çêdibin. “Pêşgotina Partiyê” di wê xebatê de li ser bernameyê tête zêdekirin. Faîq Bucak, di 21ê tebaxa 1965 de li Dîyarbekirê di otêla Turîstîk Palas de bi sondxwarinê li tevî partiyê dibe û di heman civînê de Seîd Elçî serokatiya giştî dewrê wî dike û bi xwe jî dibe sekreterê giştî.
Neh meh piştî damezerandina Partîya Demokrat a Kurdistana Tirkîyê, di bihara 1966an de serokê giştî Faîq Bucak, bi nameyekê damezirandin û çalakbûna partiyê bo serokê giştî yê Partiya Demokrat a Kurdistana Iraqê (PDKI) Mistefa Barzanî agadar dike. Bi rastî jî damezirandina PDKyan li parçeyên dî yên Kurdistanê de, ji ber tesîra tevgera Barzanî bû. Faîq Bucak bi xwe jî di bin vê tesîrê de bû û dilxwazê tevgera Barzanî bû. Ji ber vê yekê bangewazî li gelê kurd dikir û digot: “Were kurdo bilezê / Felata me pir nêz e / Alam daye Barzanî / Xoybûna me dixwazê / Serokê milletê me ye / Lewra rûmeta me ye”.
Lê hezar mixabin ko serokatiya Faîq Bucak jî wek Komara Mahabadê kurt ajot; ew serokê hêja yê zana û bi bîrûbawer ji aliyê dijminê dilreş ve di 5ê tîrmeha 1966an de tête şehîdkirin. Bi şehîdbûna Faîq Bucak re, di rêvebiriya partiyê de valayiyek gewre çêbû. Lewra Faîq Bucak, di nav civaka kurd de merivekî pêbawer û rêzdar, netewî û şorişger dihate naskirin û dikarî bi şexsiyeta xwe ya pêbawer, bi rêya xebata partiyê di navbera qirnên nû û rewşenbîrên netewî de pirek pêk bîne û bi vê pirê xelkê kurd û qirnên nû bikşîne nav xebata netewî ya partiyê. Lê mixabin hêzên tarî û dilreş, emrê di vê rê de zû qut kirin. Piştî şehîdbûna Faîq Bucak, "serokatiya giştî" ji partiyê hate rakirin û Seîd Elçî cardin bû sekreterê giştî yê partiyê.
Di roja 5/7/2006 de pêşiyê li Soregê bi beşdarbûn endamên malbat û dost û hevalbendên wî merasimekî bîranînê li ser gorê Faîq Bucak hate diristkirin û mewlid hate xwendin. Di dema vê merasima bîranînê de mistekî axa Kurdistana azad û ala rengîn li ser gorê wî hate raxistin. Belê, wê gave çavê hemû mêvanan tije hêsir bûn. Heman demî gorên Ferîd Uzun û Mistefa Remzî Bucak jî hatin zîyaretkirin. Pişt re jî heman rojî di Otêla Prestîj a Diyarbekirê de bi beşdarbûna grubekî 300-350î kesan civîneka bîranînê hate diristkirin. Gorbihişt serok Faîq Bucak, di vê civînê de jî bi axaftina hevalên wî yên partiyê û kesayetiyên ciyawaz hate bîranîn û hemû axaftvanan pêdivîya rêxistinbûn û yekîtiya gelê kurd anîn ziman. |
