Nefel û nimînendetî
Nefelê dest bi karê nimînendetiyê kiriye û bûye nimînendeya (agenta) hinek nivîskaran. Nefel şirketeka ticarî ye û vî karî ji bo qezenca xwe û nivîskaran dike. Nefel dê lêbixebite bi bihayekê herî baş berhemên nivîskarên kurd bazar bike û bifiroşe da Nefel û nivîskar bi hev re jê kar bikin.

Nefel û peyman
Ji bo ko em jî, wekî hemî miletan, bibin xwidan rê û resm Nefelê digel gelek nivîskarên kurd peymaneka nivîskî imza kiriye û di wê peymanê de her tişt diyar e. Ji bo vî karê xwe Nefelê heta niho encameka (respons) pir baş wergirtiye û diyar bûye ko nivîskarên kurd dixwazin ji bêpeymanî, bêqanûnî û tevliheviyê xelas bibin. Ew dixwazin ko hinek hebin berdevkiyê û bazarkirinê ji wan re bikin. Nefel jî bi serbilindî dê vî karî bike û her erkeka bikeve ser milê Nefelê ew dê bi cih bîne.

Heger ko tu jî nivîskar bî û berhemeka te hebe, hingê kerem bike û bila Nefel bibe nimînendeya te jî. Ji bo ko Nefel bibe nimînendeya te formûlera peymana nimînendetiyê dagire û digel du nisxeyên berhema/ên xwe ji Nefelê re verêke. Navnîşan ev e:

Nefel
Sandfjärdsgatan 10, 11 tr
120 57 Årsta - Sweden

Nefel du karan bi hev re dike

1) Nefel nimînendetiya berhemên nivîskarên kurd dike û jê re bikiran peyda dike. Her çi kesê ko bixwaze berhemeka nivîskarekê/a kurd bi çapeka dîjîtal, çi di Internetê de be û çi bi awayekê dî be, çap bike û biweşîne dikare bi Nefelê re têkiliyê dane da mafê bikaranîna wan berheman bikire.

2) Nefel bi xwe lêdigere ko imkanan peyda bike da ew bi xwe wan mafan bikire û bi çapeka dîjîtal çap bike û biweşîne. Her ji niho ve Nefelê mafê bikaranîna gelek berheman kiriye.

Bêguman em dê gelekê kêfxweş bibin heger hinek weşanxane, dezgeh û kesên dî jî bixwazin mafê bikaranîna berhemên nivîskarên kurd bikirin, da wan biweşînin. Heger tu jî bixwazî mafê bikaranîna berhemên nivîskarên kurd bikirî, kerem bike û ji Nefelê re e-posteyekê verêke: info@nefel.com

Mafê telîfê (copyright)
Piştî ko Internet û teknîkên dijîtal û elektronîk li seranserê cihanê bi awayekê berfireh belavbûyî, berpêyê xwegihandina enformasyonê jî gelekê fireh bûye û peydakirina enformasyonê bûye karê saniyeyan, ne yê deqîqeyan.

Ji ber hindê îro gelekê hêsanî ye ko mirov berhemeka nivîskarekê/a kurd bêxe Internetê û ji milyonan kesan re berdest bike. Kirina karekê wiha hêsanî ye lê gelo ma heq û destûra mirovî heye mirov welê bike?

Gelek kes welê difikirin ko hema mirov çawa bixwaza û çi bixwaze mirov dikare bike û ne pêwist e ko mirov li xwidanên berheman bişêwire û destûrê ji wan bistîne. Bêguman ev fikreka bêbingeh û pûç e. Çawa ko mafê mirovî nîne ko mirov, bêyî destûr, pirtûka nivîskarekî/ê ji nû ve wekî pirtûk li ser kaxezê çap bike welê jî mafê mirovî nîne ko mirov versiyonên wê yên dîjîtal û elektronîk jî ne di Internetê de û ne li ti deverên dî çap bike û biweşîne.

Mafê telîfê mafekê xwezayî ye û tikes ticaran nikare wî mafî ji xwidanê berhemekê bistîne. Kitêba nivîskarekî/ê, ta dereceyekê, ji zaroka wî/wê pirtir ya wî/wê ye. Bo nimûne li gor qanûnên Swêdê gava ko babek ne baş be dewlet dikare jê re bibêje tu babekê nebaş î û ji ber hindê tu bi kêrî xwidankirina zaroka xwe nayê û em dê zaroka te ji te bistînin û bidin hinekên dî da xwedî bikin. Lê belê heger nivîskarek rabe û 100 kesan jî bikuje û bibe bikujê (qatilê) xelkê cardî jî ti dewlet û ti desthilat nikare mafê telîfê yê berhema wî jê bistîne. Nivîskar bi xwe jî nikare xwe ji wî mafî berî bike û bide hinekên dî. Nivîskar dikare tenê mafê bikaranîna berhemên xwe, yanî mafê wan yê weşandin û çapkirinê belaş yan bi pereyî bide hinekên dî.

Heta niho piraniya nivîskarên kurd mafê bikaranîna berhemên xwe bêyî ko ti peyman hebin dane weşanxaneyên kurdî. Heta wê dereceyê ko hinek caran hinek weşanxane li ser pirtûkan dinivîsînin ko mafê telîfê jî yê weşanxaneyê ye. Carekê ev ne mimkin e. Mafê telîfê tenê yê nivîskarî ye û yê bikaranînê jî dikare yê weşanxaneyekê be. Ji ber hindê weşanxaneyên ewropî, pirê caran, navê nivîskar û weşanxaneyê bi hev re li hember nîşandeka mafê telîfê (©) dinivîsînin.

Agahdariyeka bivênevê
Em dizanin ko gelek kurd fêrî belaşiyê bûne. Lê belê gotineka kurdan ya pêşiyan heye, dibêje »erzankiro, hebandiro«. Xêr di malê erzan û belaş de nîne û nivîskarên kurd jî nikarin heta qiyametê bi keda xwe ya ideal belaş berheman binivîsînin û weşanxane jî nikarin belaş bixebitin.

Ji îro û pê ve em destûrê nadin ti kesê ko berhemên nivîskarên kurd yên ko nimînendetiya xwe dane Nefelê bi ti awayî, bêyî destûr, bi kar bînin. Ji ber hindê ti kes nikare van berheman yan hinek beşan ji van berheman wekî mîkrofîlm, kaset, video, cd, cd-rom, dvd, ePirtûk (e-book), Internet, antolojî, materyalê dersê, Print On Demand û hemî awayên elektronîk û dîjîtal biweşîne yan bi kar bîne.