Nefel

[ ÎNÊ, 2024-04-19 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Ciwanên kurd ji bo pêdiviya kê tên kuştin

STENBOL, 19/5 2011 — Heroj ciwanên kurd li serê çiyayan an jî li gund û bajaran tên kuştin. Gelo ev ciwan ji bo çi tên kuştin? Bi rastî ji bo azadiya Kurdistanê tên kuştin? Tu hezar welatan jî ava bikî, tu dê çi bidî wan ciwanên ko binax bûne?

Gelo di şertên îro de, ji bo azadiya herçarparçeyên Kurdistanê jî hêjaye ko xwîna ciwanekê tenê yê kurd bê rijadin? Wijdana mirovan çawa hinde kor bûye ko dikarin li ser kuştina mirovan siyasetê bikin, bibin xwedanpile, meqam, hikûmran û xwedanrûmet? Mirovê ko ew bi xwe rasterast bedena xwe nede ber devê guleyan, bêyî ko wijdana wî biêşî behsa kîjan “şerê azadiyê” dike? Ji zarokên feqîran çi têt xwestin?

Şerekê qirêj di nêvbera hêzên hikûmraniya tirkan bi xwe de heye û gelo ji bo çi zarokên kurdan dibin qurbana vî şerî?

Li bîra me hemiyan e, piştî ko rêberê PKK-ê Abdullah Ocalan di 1999-ê de hat girtin, wî di hemî îfade û beyanên xwe de diyar kir ko şerê ko heta hingê ji aliyê PKK-ê ve hatiye kirin şerekê xelet e û beyan kir ko dê rêxistina wî, wekî biryareke stratejîk heta dawîyê dest ji şerê çekdarî berde. Ji bo çi di sala 2004-ê de careka dî pêdiviya PKK-ê bi şerî çêbû digel ko Abdullah Ocalanî gotkoibû wan 20 salan şerekê nelazim kiriye. Abdullah Ocalanî hingê got: “Êdî heta hetayê em dest ji şer berdidin”, ma kurdekî tenê jî got “na em dixwazin şer bikin”.

Sala 2004-ê PKK-ê bi navê Kongra–Gel, kongreyek pêk anî û got dê birayara destjêberdana şer bi awayekê fermî îlan bike, lê bi lezûbez qasid Ocalanî, Mahmut Şakar ji Îmralîyê bi destûra eskerên tirkan çû Qendîlê û biryara kongreyê ya betalkirina şerî betal kir û biryara şerî da derxistin. Osman Ocalan, Nizamettin Taş û hemî gruba ko ji PKK-ê qetyayî şahidê vê bûyerê ne.

Her Ocalan li Imraliyê, di prosesa hevdîtinên xwe yên digel eskerên tirkan de digot wan ji wî xwest ko ew hêza PKK-yê bikêşe derveyî sînor bo “bakurê Iraqê” û wî jî got baş e. Lê dibêje subayekê (serbazek) ji wî re got: “Qederê 500 kesan bila di nav xaka Tirkiyeyê de bimînin dê lazim bibin.”

Serbazê tirk ji Abullah Ocalan re dibêje “500 çekdarên PKK bihêle dê bo me lazim bibin” ew jî dibêje baş e. Ev îfadeyên Ocalan in. Gelo ev ciwanên kurd li ser vê “lazimiyê” tên kuştin?

Opresayonên li himberî Ergenekonê – dewleta kûr li aliyekê, ji sedema plangeriya kodetayê, di meha sibata borî de 64 jê general dora 180 serbazên payebilind yên ordiya tirk di yêk runiştinê de hatin girtin û zindanî bûn. Ordiya tirkan xwe wekî avaker û xwediya Tirkiyeyê dibîne û qet navê vê pozîsiyona xwe ji dest jî berde û bi her awayî dixwaze hikûmraniyê Tirkiyeyê di destê xwe de bigire.

Li himberî vê jî, kî pozîsyona AK Partiyê çawa dibîne bila wesa bibîne; dixwazî bila “peşvero-dincî”, “muhafazekar-tirkçî”, “dîktator” an jî “demokrat-lîberal” be, Ak Partî jî bi her awayî dixwaze inîsiyatifa eskeran ya li ser serweriya Tirkiyeyê kêm bike û ya xwe xurt bike. Esker bi riya şer û pevçûnan “kozê” destê xwe xurt dikin, pêşiyê li guhorînên demokartîk digirin. Pêwîstiya eskeran ji şer û pevçûnan heye an naxwe ti wateyeka wan li ser desthilatdariya Tirkiyeyê namîne.

Ji êrişa Oramarê heta Raşadiye û herî dawiyê êrişa li Kastamonuyê li konvoya Recep Tayyip Erdogan hatî kirin, erişeke tenê ya PKK-yê nîne ko bi hindek belge û delîlan destekê tarî yê generalên kodatekar di nav de nebe. Bo nimûne general Mustafa Bakici-yê ko heftiya borî li mintiqeya Şirnexê 12 ciwanên kurd dayî kuştin yek ji wan eskeran e ko destê wî di nav plangeriya têkbirina AK Partiyê de ye. Berî wan li Dersimê jî 7 ciwanên dî yên kurd hatin kuştin, general Galip Mendi yê ko operasyona Dersimê jî kirî navê wî di nav balyozcî û ergenekonciyan de derbas dibe. Cihê erişa ko li konvoya Tayyip Erdogan hatî kirin eve 6 meh e ko cihê perwerdehiya komandoyên taybet e. (Binêrin, Emre Uslu, 17/ 06/ 2011 Taraf-Today’s Zaman)

Vêca gelo ciwanên kurd ji bo çi “lazimiyê” tên kuştin? Bi rastî li ser pêwîstiya azadiya kurd û Kurdistanê tên kuştin an jî hêzên tarî yên hikûmranên Tirkiyeyê bo wan emelên xwe yên tarî didin kuştin? Berî herkesî divêt kurd destê xwe danin ser wijdana xwe û bersîva pirsa “ka ciwanên kurd ji bo pêdivêyiya kê tên kuştin?” bidin. Gelek xerîb e, ji bo emelên qirêj û tarî heroj zarokên kurdan tên kuştin û kes nabêje çima? Toz û dûmana van planên qirêj û bixwîn wijdan li mirovan jî tarî kiriye.

-----------------------------------

Nivîskar: MIHEMED EVDILA mihemedsanri@gmail.com
Weşandin: 2011-05-19
Xwendin: 7929