Nefel

[ ŞEMÎ, 2024-04-20 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Piçek îqtidar

STOCKHOLM, 16/2 2008 — Bi salan e ko kurd li hemberî rejîmên despot yên dagirkerên Kurdistanê liberxwe didin û tekoşîna mafên xwe yên demokratîk û rewa didin. Li cîhekî ko piçekî jî nermahiyeke bi navê demokrasiyê hebe, ew dikin qêrîn û hewar, ji ber ko rê li ber fikirên wan, zimanê wan û xweîfadekirina wan a neteweyî tê girtin. Ji ber ko ew ”tekoşer in”!

Teva hemû astengiyan jî kurd li gora çapa xwe hin sînoran gav dikin û bi awayekî dengê xwe digîhnin dinyayê. Nemaze jî bi pêşdeçûyina teknîkê re kurdan hemleyeke baş kir û ji vî îmkanî jî îstifade dike/kiriye. Ji ber ko ”zîrak in”!

Ev kurdên ko bi salan e li hemberî zilm û zor û serdestiya zaliman şer kirine/dikin, gelo gava ko îmkan têkeve/dikeve destê wan (dê) bi kîjan awayî hereket dikin/bikin?

Heger em ji vê pirsê hereket bikin û çend nimûneyên piçûk werbigirin ber çavên xwe, dê tabloyeke çawa derkeve pêşberî me?

Wek nimûne: Mêrik/jinik li ser navê kurdan dezgehan ava dike, lê di serî de difikire ko ew ê çawa di wî dezgehî de cîhê xwe weha bi qawet bike ko ebedî li serê wî dezgehî bimîne... Ji ber ko ”demokrat in”!

Partî û rêxistinan ava dikin, di serî de li wan kesan digerin ko bikarin ji wan re şelafiyê bikin û destên xwe bi ser hevdu din… Ji ber ko ”pluralîst in”!

Li mirovan digerin ko xulamtiyê ji wan re bikin... Ew tu carî ji mirovên bi şexsiyet hez nakin ko bikarin fikrên xwe bibêjin. Hedefa wan a pêşî ew e ko wan kesên xwedî fikir û helwêst in, tasfiye bikin… Ji ber ko ”kolektivîst in”!

Tu bala xwe didiyê ko ew bû serokê/a komeleyekê, derhal hal û hereketên wî/wê hatin guherîn. Mesele çi yeee? Bû tiştekî ya! Ji ber ko xwedî ”selehiyet in”!
Şevekê, festîvalekê yan jî şehîyekê li dar dixin, tu bala xwe didiyê ko wan bi destên dost û mihubên xwe girtin û enîşka xwe rê xelkê da. Ji ber ko ”rêber in”!

Dibin weşanger û gava nivîskarek dihere ber deriyê wan, ji ber ko ew ”îqtidar” di destî de ye, ew dikarin bi mehan kitêba wî/wê kesê/î di nav destê xwe de bistirê û bersivê jî nede wan bê ew ê çap bike yan neke. Mesele çi ye? Mêrik/jinik karek ji destî tê ya! Ji ber ko ”entel in”!

Programên TVyê çê dikin, tu bala xwe didiyê ko ew di seriyê pêşî de li wan kesan digerin ko bikarin li bilûra wan bixe. Ji ber ko esker in!

Rojname û kovaran derdixin, destên xwe li derûdora xwe dipelînin. Dibin edîtorê/a kovar, rojname yan jî malperekê, tu bala xwe didiyê ko bû ucûbeyeke/î ecêb. Bi wê minasebetê kêfa xwe li serê xelkê û nivîsên wan diqewitînin. Ew bi wî awayî bawer dikin ko ew ê ”îqtidara” xwe xurttir bikin ko sîran di serê civatê de biçikînin... Ji ber ko ”biryardar in”!

Lîsteya wan heta bi sibehê dirêj e.

Heta ko mixafelet bin, demokratên herî mezin in, lê gava piçek îqtidar dikeve destên wan, dibin dîktatorên herî rezîl…

Piçek ”selehiyet” dikeve destê wan, ew xwe li ser serê xelkê dinepixînin. Ji bona piçek îqtidar û navûdeng, dikarin her tiştî bikin.

Car hene ko ji bona wan tu prensîp û hêjayî namînin û xwîna wan dikeve çavên wan.

Mirov dibêje qey ew lok in û mirov li gora wê qîmetê dide wan, lê dibe roja dinê, tu bala xwe didiyê ko ew di nav garanê de ne. Mirov hetanî sibehê wan li serê civatê dîne jî ew ê xwe li nav çekalan biqewimînin…

Yanî bi vê maneyê, car hene ko mirov şikiriya xwe bi dijminê xwe tîne. Bi rastî jî ez gelek caran meraq dim ko qaweta wan di destê hin kurdan de bûya, wan dê çi bikiraya? Ya sitar û hew!

-----------------------------------

Nivîskar: ENWER KARAHAN enwerkarahan@hotmail.com
Weşandin: 2008-02-16
Xwendin: 5370