Nefel

[ ÎNÊ, 2024-04-19 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Kurdên binxetê ji bîr nekin – biryara îdama Beşar Esed jî hakimekî kurd dê bide

STOCKHOLM, 12/3 2007 — Îro sê sal e ko kurdên li Sûriyê ji bona mafên xwe yên bingehî serê xwe hildan. Ji sala 1946-an ve, sala ko dewleta Sûrî hat damezirandin, du milyon kurdên li Sûrî ji hemî mafên xwe bêpar in. Dewleta yek partî, yek netewî ya diktaorî ya Şamê nasnama kurdan bi resmî qebûl nake.

Dewleta Sûriyê û serokkomarê wê Beşar Esed wekî bavê xwe tu heqî naxwaze bide kurdan. Belê, dewleta Sûrî 17-ê nîsanê dibe 61-salî lê belê tu guherandinek di rejîma xwe ya faşîst de nekiriye!

Kurdên binxetê hertim li hewara me de bûn. Qencî û welatparêziya kurdên rojava wekî tê zanîn gelek in: Hemî kurdên siyasî ji Îran, Iraq û Tirkiyê ev 60 sal zêdetir e, şevên dereng û tarî li deriyên kurdên Qamişlo, Dêrik, Tirbespiye xistine.

Di nav feqîrî û hejariyê de jî hertim wan kurdên parçên dî bi dilê fireh û germ qebûl kirine, ciyê xwe dane wan, xwarin û çaya qaçax dane mêvanan. Gelek caran bi tifingan ketine şerên giran, mesela li Kurdistana Iraqê, li nav kadroyên mezin ên Partî û Yekitiyê de kurdên Sûrî cî girtine.

Dewleta Sûrî ya faşîst salên xwe yên dawî derbas dike. Siyaseta Şamê siyasetekî ters e. Sûrî li cem Îran û welatên diktator cî digre. Neyartiya Emrîkayê dike. Îro li Pentagonê hinek mirov ketine musabeqê: Gelo dewleta Emerîka sala 2007-an zûtir li Îranê bixe an li Sûrî bixe?

Zehftirîn dibêjin ko Emerîka vê havînê dê li Îranê bixe û paşê muxalefeta Sûrî xurt bike ji bo kurê Hefiz Esed ji ser kursiya xwe biçe. Belê wan rojan li Bexdayê di sewiyekî nizim de emerîkî, iraqî, sûrî û îranî civiyan. Lê sohbetên di navbera dîplomatên îranî û emerîkî de dijwar derbas bûn.

Li gor hinek çavkaniyan dîplomatên sûrî zehf bêdeng bûn. Şeytan hertim bêdeng in! Dewleta Sûrî bi her awayî alîkariya terorîstên Iraqê dike. Sûrî naxwaze Iraq aram bibe. Ditirse ko Iraqeke aram dê dewleteke kurd bide dirist kirin. Lê ew siyaseta Sûrî şaş e!

Iraq aram bibe û nebe dewleta kurdî dê li Iraqê çêbe! Û di nêzîk de Kurdistana binxetê (Sûrî) dikare bi başûrê Kurdistanê re bibe yek.

Hinek dikarin bêjin ew xeyal in. Berî sê salan kesî bawer nedikir rejîma Sedam zû bikeve, Sedam dê îdam bibe û hakimê ko biryara îdama Sedam bide dê kurdek be.

Li Sûrî jî guherandin dê çêbin. Peykerên Hefiz Esed dê bêne xwar, kurê wî Beşar dê li ciyê sûcdaran rûne. Dibe ko hakimê li Şamê jî dîsa kurd be!

Inşallah dîrok min zû bi heq derxe. Çil milyon kurd divê şehîdên Kurdistana binxetê û wê roja dirokî ya 12-ê adarê ji bîr nekin!

-----------------------------------

Nivîskar: KURDO BAKSÎ
Weşandin: 2007-03-12
Xwendin: 8532