Nefel

[ ŞEMÎ, 2024-04-20 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

augmentin
augmentin
Wêneyê başûrê Kurdistanê di serê kurdan de reş dibe

STOCKHOLM, 20/2 2006 — Kurdistan yek welat e û kurd jî yek milet e. Qewareyê siyasî û îdarî yê ko li başûrê Kurdistanê çêbûye hêvî û heyecaneka mezin da hemî kurdên li hemî derên dinyayê. Nemaze kurdên bakurê Kurdistanê û kurdên li derveyî welatî, başûrê Kurdistanê di serê xwe de pir îdealîze kir û hêviyeka pir mezin pê ve girêda. Kurdên parçeyên dî got qey başûr cihê xewna wan ya hezarsalan e û ew dê bibe bingehê avakirina kurdistana mezin.

Ev çendmehek e ko kurdên parçeyên dî hêdî-hêdî ji xewna xwe hişyar dibin û hêdî-hêdî fêm dikin ko dew brayê mastî ye û başûrê Kurdistanê jî ne ew qeware ye ko bikare bibe bingehê avakirina kurdistaneka mezin. Kurdên başûr jî çi kesên siyasî bin û çi jî xelkê wê be di dinyayeka berteng ya ko ji sê wîlayetan pêk têt de dijîn û ew ji bilî wê taxa biçûk ya Kurdistanê li ti parçeyên dî yên Kurdistanê nafikirin.

Herçend tehl jî be realîteya başûrê Kurdistanê îro ev e.

Realîteya başûrê Kurdistaê ev e ji ber desthilata siyasî ya başûrê Kurdistanê ji bilî hinek gotinên sloganwarî planeka amadekirî ji bo paşeroja miletê kurd li parçeyên dî yên Kurdistanê nîne.

Realîteya başûrê Kurdistanê ev e ji ber desthilata siyasî ya başûrê Kurdistanê ji aliyê aborî ve başûrê Kurdistanê terkî însafa şirket û dewleta Tirkiyeyê kiriye û başûr îro bûye welatekê şelandinê û şirketên tirkan ti fabrîke û bingehên xizmetê bo kurdên başûr ava nakin û pereyên neqdî yên Kurdistanê yekser transferî Tirkiyeyê dibin.

Başûrê Kurdistanê piraniya kontraktên xwe yên jinûveavakirinê dide şirketên tirkan û nemaze tirkên nijadperest û nêzîkî hêzên eskerî yên dewleta tirkan. Armanca stratejîk ya desthilata başûrê Kurdistanê diviya ew bûya ko şirketên kurdên bakurê Kurdistanê xurt bike da kurd hem li başûr û hem li bakur bi hev re xurt bibin lê belê îro berevajiyê wê diqewime û şirketên kurdên bakur bi çavên zîq li ticareta kurdên başûr û tirkên nasyonalîstên dijminên kurdan dinêrin û heroj zêdetir dilê wan ji başûr sartir û reştir dibe.

Min li başûrê Kurdistanê bi dehan şirketên kurdên bakur dîtine û xudanên wan yek tenê jî ji rewşa xwe nerazî ne û hemî jî dibêjin desthilata îdarî ya Kurdistanê bi enqest probleman ji şirketên kurdan re derdixe û karên şirketên tirkan bi hêsanî bi rê ve diçe. Sebebekê vê jî dikare ew be ko komîsyonciyên başûr ji şirketên tirkan rehettir dikarin rişwetê wergirin.

Desthilata başûrê Kurdistanê ji bo bêdengkirina hinek şexsiyetên bakur çend kontraketek daye şirketên dost û zarokên wan şexsiyetan lê belê wê jî bi dehcarî di difin û pozê wan re tîne û nahêle ko ew şirketên kurdan jî xêrê ji karê xwe bibînin.

Ew kurdên ko ji bo serdanê û dîtinê diçin başûrê Kurdistanê cara pêşiyê bi çavên kor li her tiştî dinêrin û alaya Kurdistanê û navê Kurdistanê wan hêvîgeş dike. Piştî cara didoyê û sêyê hêdî alaya Kurdistanê û navê Kurdistanê bala wan nakişîne ji ber ew dizanin li başûr rişwetxwer ji ti welatên dî ne kêmtir in, ji ber ew dizanin li başûr parastina mafên qanûnî yên hemwelatiyan ji welatên cîran ne baştir e û ji ber ew dizanin ko polîsê kurd dikare wan bêyî sebeb bi hefteyan bigire û bêxe kuneka tarî de û nehêle haya kesê jê hebe.

Pêşmergeyê Kurdistanê, pêşmergeyê wê Kurdistana azad bêyî sebeb di seytereyekê (check point) de heqareteka wisa li kurê rêberê kurd Seîd Elçî yanî milyaketê Xwedê Fuad Elçî kir û wisa lê da ko Fuad Elçî çûna Kurdistanê li xwe heram kir û her cara ez wî li Stenbolê yan li cihekê dî dibînim ew ji min re dibêje başûr ne li gor te ye. Ne we be ko tu dînîtiyekê bikî û zarokên xwe û mala xwe bibî wê derê.

Komserekê polîsê Kurdistanê, yanî komserê Kurdistana azad digel zebaniyên xwe 7-ê vê mehê li xwaringeha otêla Avestayê teroreka çetewarî ya wisa anî serê min û Mihemed Sanri, Ehmed Zekî Okçuoglu û hevalekê dî ko hindik mabû bi behaneya şîşek tîkeya goştî me herçaran bikuje û lekeyeka reş bêxe ser dîroka Kurdistana azad û wisa bike ko ti caran desthilata siyasî ya Kurdistanê û Xwedê bi xwe jî nekare û nezane îzah bike ka ji ber çi polîsê Kurdistanê em kuştin.

Mihemed Sanri yanî kolumnîstê Nefelê û sernivîskarê kovara Serbestiyê Mihemed Evdilayî Kurdistan li xwe heram kir û vegeriya Stenbolê û dibêje hêdî careka dî ew naçe Kurdistanê.

Li başûrê Kurdistanê prosesekê destpê kiriye. Ew jî prosesa reşkirina destkeftên siyasî û neteweyî yên kurdan li cem kurdên parçeyên dî ye, prosesa jihevdûrxistina kurdên başûr û kurdên parçeyên dî ye. Ji hemî kesê zêdetir kurdên başûr û nemaze desthilata siyasî ya başûrê Kurdistanê li hemberî vê prosesê xudan berpirsiyarî ye û heger gunehekê vê prosesê jî hebe ji hemî kesê zêdetir gunehê birêveberên siyasî û îdarî yên başûrê Kurdistanê ye.

-----------------------------------

Nivîskar: ARIF ZÊREVAN
Weşandin: 2006-02-20
Xwendin: 6844