Nefel

[ ÎNÊ, 2024-04-19 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Erdogan bakur safî neke Barzanî başûr safî nake

STENBOL, 2/11 2011 — Serokê Kurdistanê Mesûd Barzanî dê van rojan serdana Tirkiyeyê bike û digel serokkomarê Tirkiyeyê Abdullah Gul û serokwezîr Recep Tayyip Erdoganî bicive. Heta ko Tirkiye doza miletê kurd li bakurê Kurdistanê di çarçeweyeka maqûl de safî neke divêt ne li hêviyê be ko desthilata Kurdistanê ji bo Tirkiyeyê şerê kurdên bakur bike.

Partiya Karkerên Kurdistanê bi hemî xêr û şerên xwe ve produkteka dewleta Tirkiyeyê ye û ji hemî kesî û ji hemî welatan zêdetir Tirkiye bi xwe berpirsa çareserkirina problema xwe ya digel PKK-ê ye.

Lewra jî heger bi rastî Tirkiyeyê bivêt problema hebûn û nebûna PKK-ê safî bike divêt pêşiyê ew bi xwe biryara xwe bide û paşê arîkariyê ji mitefiqên xwe yên wekî Emerîkayê, Ewropayê û başûrê Kurdistanê bixwaze.

Ji ber ko Tirkiyeyê ji roja ewilî ve PKK û rêberê wê Abdullah Ocalan wekî emrazekê li hemberî xurtbûna doza miletê kurd li bakurê Kurdistanê bi kar anîne di nêv demê de PKK bi xwe jî bûye parçeyeka veneqetîn ya çareserkirina doza miletê kurd li bakur û Tirkiyeyê.

Kîn, dijminahî û nefreta Tirkiyeyê ya van demên dawiyê ji PKK-ê ne ji ber wê yekê ye ka çima PKK heye. Problema esasî ya Tikriyeyê ew e ko PKK hêdî ne di kontrola wê tenê de ye û destê dijminên Tirkiyeyê Îranê û Sûriyeyê di nêv PKK-ê de xurt bûye. Heger PKK di bin kontrola Tirkiyeyê tenê de be û şerê Tirkiyeyê neke Tirkiye bi xwe dixwaze gerîlayên wê li başûrê Kurdistanê hebin da kengê bixwaze wan li dijî rikeberên xwe bi kar bîne.

Siyaset hesab û kitab e. Li vê dinyayê ne tirk tenê dijîn û ne tirk tenê dikarin tesîrê li PKK-ê bikin. Herçend PKK di qewareyê global de li aliyê mîhwera xelet ya Sûriyeyê û Îranê be jî di qewareyê herêmî yê Rojhilata-nêvê de firseta lehîstina rolekê jê re heye û têkbirina PKK-ê bi metodên eskerî zehmet e.

Serokwezîrê Tirkiyeyê Recep Tayyip Erdoganî bi xwe jî heta berî hilbijartinên 12-ê hezîranê hemî hesabên xwe li ser lihevkirina digel rêberê PKK-ê Abdullah Ocalanî kiribû û bi rêya MIT-ê digel berpirsên bilind yên PKK-ê jî mizakere dikir. Piştî hilbijartinan û bûyera kuştina 13 eskeran li Farqînê, Erdoganî got “PKK ne semîmî” ye û got bila PKK û BDP hêdî ne li hêviya “niyeta paqij” ya hikûmetê û dewletê bin.

Bi doza KCK-ê û binçavkirin û girtina bi hezaranan terefdar û endamên BDP-ê bi tuhmeta têkiliya wan digel KCK-ê hikûmeta Tirkiyeyê dergehên diyalogê digel BDP-ê û PKK-ê girt û xwe xist rewşeka teng de. Heger hikûmeta Tirkiyeyê vê siyaseta xwe berdewam bike ti kes nikare arîkariya wê bike û ya ko serokê Kurdistanê Mesûd Barzanî jî bikare ji Erdoganî re bibêje dê ev be: “Cehnima serê te û PKK-ê kirî. Hon çi ji hev dikin wisa li hev bikin”.

Lê belê doza miletê kurd li bakurê Kurdistanê ji hirsa rikeberiya serokwezîrê Tirkiyeyê Recep Tayyip Erdoganî û rêberê PKK-ê Abdullah Ocalanî mezintir e. PKK û Ocalan beşek ji problemê ne. Divêt Tirkiye xwe ji çareserkirina doza miletê kurd hemiyê re amade bike. Tirkiye ji bo qanûneka esasî ya nû amadekariyê dike. Di qanûna esasî ya nû de divêt mafên miletê kurd bên binecih kirin û wekheviyeka siyasî, kulturî û îdarî ya adil bêt tesîs kirin ko ew jî bi sîstemeka federal dikare bêt pêkanîn.

Serokkomar, serokwezîr û wezîrê derve yê Tirkiyeyê di vê serdana serokê Kurdistanê Mesûd Barzanî ya Tirkiyeyê de şûna ko jê re bibêjin ka di meseleya PKK-ya çekdar de arîkariya eskerî bi me re bike divêt bibêjin ka di warê çareserkirina siyasî de rê nîşanî me bide. Hingê serokê Kurdistanê Mesûd Barzanî dikare ji wan re bibêje:

— Doza miletê kurd dozeka neteweyî ye, PKK û şerê wê teferuateka vê dozê ye. Li Iraqê dîktatorê berê Sedam Hisênî xwest bi tinekirinê, enfalan, û kuştinê me qir bike lê bi ser neket. Miletê ereb û miletê kurd bi qanûneka esasî ya nû ji bo sîstemeka federal li hev kir. Parlamentoya federal li Bexdayê heye û Parlamentoya Kurdistanê li Hewlêrê heye. Wezareta derve û Wezareta parastinê mişterek e û girêdayî hikûmeta federal ya li Bexdayê ye lê belê li herêma Kurdistanê jî me hêzeka pêşmergeyan û polîsên herêmî hene û kurd bi xwe walî, qeymeqam, serokên belediyeyan hildibijêrin û bacê kom dikin.

Serokê Kurdistanê rexneyên dijwar li siyaseta PKK-ê dike, jê re dibêje dest ji şerê çekdarî berde û xebateka siyasî û sivîl bike, ji BDP-ê re dibêje here Parlamentoya Tirkiyeyê û li wêderê siyasetê bike. Heger Tirkiye bi xwe amade be ko digel PKK-ê li hev bêt serokê Kurdistanê ji her kesî zêdetir dikare rêyên lihevhatinê ji herdu aliyan re bibîne. Divêt Tirkiye û medyaya wê dest ji hêviyên vala û daxwazên piştgiriya eskerî berdin.

Wekî min li jorê gotî PKK bi xêr û şerên xwe ve produkteka dewleta Tirkiyeyê ye û berî her kesî Tirkiye jê berpirs e. Divêt Tirkiye ti caran ne li hêviyê be ko serokê Kurdistanê hêzên pêşmergeyên Kurdistanê rêke ser gerîlayên PKK-ê.

Heger Erdogan bi xwe ne amade be ko doza miletê kurd li bakurê Kurdistanê safî bike divêt ne li hêviyê be ko serokê Kurdistanê Mesûd Barzanî problema gerîlayên PKK-ê li başûrê Kurdistanê bi metodên eskerî safî bike.

-----------------------------------

Nivîskar: ARIF ZÊREVAN zerevan@nefel.com
Weşandin: 2011-11-02
Xwendin: 11862