Nefel

[ ÎNÊ, 2024-04-19 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Tirk tiştên jixwezêdetir dixwazin

STOCKHOLM, 20/11 2007 — Gotineka pêşiyên kurdan heye dibêje “ji kerê ketiye û hê jî dike hop-hop”. Serhatiya tirkan û dewleta wan ya kemalîst û mîlîtarîst jî wekî “yê-ji-kerê-ketî” ye. Sovyeta berê hilweşiya, dîwarê Berlînê hilweşiya, şerê sar nema, Sedam Hisên û Iraqa berê nema û tirk hê jî dibêjin qey Tirkiye û bakurê Kurdistanê heta ebedilebed dê ji tirkan tenê re bimîne û 25 milyon kurd dê ne xudanê welatê xwe bakurê Kurdistanê û şirîkê Tirkiyeyê jî bin.

Em berê behsa daxwazên îrrasyonel yên tirkan û dewleta wan bikin.

1. Tirk ji emerîkiyan re dibêjin: Di şerê Iraqê de me piştgiriya Sedam Hisênî kir û rê neda we ko hon eskerê xwe di ser welatê me re derbasî başûrê Kurdistanê û Iraqê bikin. Heta niho zêdetirî 3 000 eskerên we li Iraqê hatine kuştin û sebebekê wê jî em in. Em li Iraqê arîkariya we nakin û me navêt ko dewleteka kurdî jî li başûrê Kurdistanê çêbe. Lê belê hon û kurdên başûr ji ber me ve herin û şerê PKK-ê li Qendîlê bikin. Tirk bi xwe newêrin û naxwazin herin Qendîlê û şerê PKK-ê bikin lê belê ji kurdan û emerîkiyan dixwazin. Mirov ecêbgirtî dimîne gelo PKK dijmina Tirkiyeyê ye yan dijmina başûrê Kurdistanê û Emerîkayê ye.

2. Tirkiye dixwaze li bakurê Qibrisê dewleteka serbixwe ji bo çendsedhezar tirkîaxêvên wêderê çêke û heger jê bêt dixwaze ko tirkmenên li başûrê Kurdistanê jî dewleteka otonom hebe lê belê naxwaze ko kurdên başûr ti dewlet hebin û jixwe qet naxwaze behsa hebûna miletê kurd li bakurê Kurdistanê jî bêt kirin. Tirkiye dixwaze kurdên bakur wekî “tirkên esilkurd” bi nav bike û dibêje li Tirkiyeya siyasî ya îro tenê yek milet heye û ew jî miletê “tirk” e û dibêje ew kesên ko bi nijade xwe “kurd” jî bin wekî milet “tirk” in.

3. Tirk ji kurdên başûr dixwazin ko bibin dijminê kurdên bakur û hemî têkiliyên xwe ji bakurê Kurdistanê qut bikin. Tirk dixwazin ko kirmancî li başûrê Kurdistanê qedexe be û qet û qet naxwazin ko başûrê Kurdistanê alfabeya latînî jî bi kar bîne da ti têkiliya kurdên başûr û bakur bi wê rêyê çênebe. Lê belê heger ji tirkan bêt ew dixwazin hemî welatên Kafkasyayê bikevin bin hikmê Tirkiyeyê de tenê ji ber ko zimanên wan û tirkan ji eynî grupê ne. Azerbeycanê ji bo nerazîbûna xwe li hemberî tirkan zimanê tirkî li Azerbeycanê qedexe kir û divêt fîlmên tirkî di televizyonên Azerbeycanê de bi dublaja azerî bên nîşan dan.

4. Tirk dixwazin ko Emerîka û dinya dengê xwe ji Îranê û Sûriyeyê re nekin û dibêjin Îran çekên nûkleer çêke jî û desthilata wê wekî ya Sedam Hisênî herçend dîktatorî jî be û piştgiriya terorê jî bike bila ti kes dengê xwe jê re neke. Tirkiye endama Natoyê ye lê belê pitgiriya dewletên dijminên Natoyê Îranê û Sûriyeyê dike û dibêje bila Nato jî ji bo xatira çavên tirkan gotineka hişk ji Îranê û Sûriyeyê re nebêje. Û heman Tirkiye ji Natoyê dixwaze ko nehêle Iraq parçe bibe û nehêle ko PKK jî li başûrê Kurdistanê hebe. Yanî tirk ji aliyekî ve qebra Natoyê dikolin û ji aliyê dî ve li hemberî başûrê Kurdistanê daxwaza piştgiriyê ji Natoyê dikin.

Mirov dikare daxwazên îrrasyonel yên tirkan yên di gelek warên dî de jî wiha rêz bike lê belê ev çar nimûne têra wê yekê dikin ko mirov fêm bike ka tirk çiqasê tiştên jixwezêde ji dinyayê dixwazin.

Tirk çi dixwazin bila bixwazin lê belê realîteya vê dinyaya nû ne li gor daxwazên wan e û ew jî mecbûr in ko sîstema nû ya dinyayê qebûl bikin.

Ti mecbûriyeta Emerîkayê û Natoyê û Yekîtiya Ewropayê nîne ko her bi çi bihayî be yekîtiya axa Tirkiyeyê biparêzin. Ti mecbûriyeta Emerîka û Ewropayê nîne ko ji tirkan re bibêjin hon çi ji kurdan dikin bikin û me îş pê nîne. Emerîka, Ewropa û dinyaya derve çawa qebûl dikin ko li Iraqê dewleteka federal hebe û miletên cida azad bijîn û xwe îdare bikin wisa qebûl dikin ko li Tirkiyeyê jî guhortinek çêbe û kurdên bakur jî bigihîn mafên xwe û xwe îdare bikin.

Formê îdarî yê bakurê Kurdistanê û başûrê Kurdistanê dikare ji hev cida be lê belê li bakur jî bêyî federasyonekê kurd û tirk nikarin bi hev re bijîn û heta niho Emerîka û Ewropayê ji kurdên bakur re negotine çima hon daxwaza federasyonê dikin. Dinyaya derve rexneyan li PKK-ê digire lê belê li dijî federasyonê yan şiklekê nû yê îdarî yê Tirkiyeyê û bakurê Kurdistanê dernakeve.

Digel hemî guhortinên ko di van 15–20 salên dawiyê de li dinyayê çêbûyîn tirk hê jî di xewna xwe ya berê de radizin û dibêjin "me nedît, me nebihîst, em pê nehesiyan û haya me jê nîne".

Yan tirk dê siyaseta xwe ya “nedît û nebihîstê” berdewam bikin û dijminahiya xwe û miletê kurd û paşê jî dijminahiya xwe û dinyayê berdewam bikin heta ko kurd û dinya li wan û dewleta wan tên xezebê û wê parçe dikin.

Yan jî tirk berî her kesî dê têkiliyên xwe digel miletê kurd û nemaze digel miletê kurd li bakurê Kurdistanê û Tirkiyeyê serast bikin. Ji bo vê jî divêt dewleta tirkan ya îro hilweşe û dewleteka nû li ser esasê Kurdistan û Tirkiyeyeka federal ava bibe. Paşê jî divêt Tirkiye û Kurdistana federal ya nû digel siyaseta Emerîka û Ewropayê jî xwe organîze bike û mitefiqa wan be û ne dijmina wan be.

Bi hop-hopa berê tirk nikarin di vê dinyaya nû de bijîn.

-----------------------------------

Nivîskar: ARIF ZÊREVAN
Weşandin: 2007-11-20
Xwendin: 6280