Nefel

[ ÇARŞEM, 2024-12-04 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

»Dersên şerîetê« ya Kamiran Alî Bedirxan

HELSÎNKÎ, 19/10 2012 — Kitêboka »Dersên şerîetê« ya Dr. Kamiran Alî Bedirxan piştî 75 salan ji nû ve hat weşandin. Cara yekem ev kitêba biçûk sala 1938ê li Şamê hatibû belav kirin.

Di kitêbê de nivîskar riknên (stûnên) baweriyê, ferz û heramiyên îslamê bi kurmanciyeke sivik û zelal dide nasîn: nimêj, rojî, zekat, hec; destnimêj, sinet û hwd.

Di kitêbê de herwiha pêşgotineke şîretker ya nivîskar bo mezinên kurdan heye. Dîsa helbesta Kamiran Alî Bedirxan ”Lavelav” ya di hejmara 3 ya Hawarê de belavbûyî li destpêka kitêbokê hatiye bicihkirin. Bo diyarkirina hunera helbestvaniya wî, dixwazim wê li vê derê neql bikim:

”Xudan mal î, xudan perde / cihê te giş, hemî erd e. / Bi awazê tena denga / Te xulqandî, te kir ava. / Tu hem derd î, tu hem darû / Te kir me ro, te kir şev ro / Te na xafa, te na xurde / Tu davêjî dilan perde.”

Li destpêka kitêbê birêz Mihemed Jiyan pêşgotineke informatîv li ser jiyan û berhemên Dr Kamiran Alî Bedirxan heye. Em baş dizanin ko mixabin Kamiran Bedirxan di bin siya birayê xwe yê mezin Celadet Alî Bedirxan de maye. Lê xebatên rêzimanî û zimannasî yên Celadet Alî Bedirxan bo kurmanciya nûjen qonaxeke gelek giring bin jî, ji aliyê hunerî û edebî ve Kamiran Bedirxan qet ne kêmî wî ye – eger ne pirr di ser wî re be jî.

Ez bi xwe Kamiran Alî Bedirxan herî zêde bi wergerên wî yên ji çarînên Omer Xeyam nas dikim. Lê Mihemed Jiyan di pêşgotina xwe de diyar dike ko Kamiran Bedirxan hem Qur’an û hem jî Incîl kiribûn kurdî. Mixabin agahiyên ko ew li ser van herdu berhemên hêja dide pirr kurt û kêm in. Em ji Hawarê ji hin beşên Qur’anê bi wergera Kamiran Alî Bedirxan agadar in. Lê di pêşgotina M. Jiyan ya li ser »Dersên şerîetê« jî diyar nabe ka wergerên Qur’anê û Incîlê yên Kamiran Alî Bedirxan li derekê mane yan jî winda bûne.

Belavkirina ji nû ve ya »Dersên şerîetê« jî yek ji xebatên gurr yên weşanên Dîwanê ne ko par li Stenbolê dest bi jiyana xwe ya weşankariyê kiriye û heta niha zêdeyî deh kitêban bi kurmancî, zazakî û tirkî weşandine. Giraniya berhemên Dîwanê edebî û dînî ne. Wê herwiha dest bi weşandina kovareke mehane ya dînî-edebî ya bi navê Peyam jî kiriye.

Dr Kamiran Alî Bedirxan: Dersên şerîetê, 40 rûpel, Dîwan, Stenbol 2012
Xwestin: diwankitab@gmail.com, Zeyrek Mah Itfaiye Cad. No: 17/3 Fatih Istanbul, Turkey, Telefon: 0212 5344830

-----------------------------------

Nivîskar: HUSEIN MUHAMMED husein.muhammed@gmail.com
Weşandin: 2012-10-19
Xwendin: 9846