Nefel

[ ÇARŞEM, 2024-12-04 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Rûsya rezîl e lê belê Beşar rezîltir e

STOCKHOLM, 11/2 2012 — Gava ko doktorê çavan kor be emê çi bikin! Wextê ko mirovek dibe doktor ji bo pêkanîna mesleka xwe sonda exlaqî dixwe. Lê belê li cem kesekî ko kurê dîktatorê berê Hafiz Esed be exlaqê doktoriyê peyda nabe ji ber ew kes xwe ji exlaqê doktoriyê giringtir û mezintir dibîne.

Kêm kesan li cihanê wekî Beşar Esed exlaqê mirovatiyê û doktoriyê dane ber lingan. Di dema protestoyan de li Sûriyeyê mirovên ko birîndar dibin xwe dispêrin nexweşxaneyan. Beşarê rezîl emir dide ko wan birîndaran, çi zarok çi jin, li nexweşxaneyan bikujin. Hinek kes jî di ambulansan de tên kuştin. Min bûyerên hewqasê neinsanî piştî Hitler tenê di fîlmên Hollywoodê yên li ser mafyayê de dîtine.

Gelek rojnamevanên cihanê ji min dipirsin çima rejîma Sûriyeyê hewqasê zalim e? Bersiva min zelal e: Rejîma be‘sê hertim wisa bû lê cihanê nexwest wê zilmê bibîne.

Rejîma be‘sî û faşîst ya Beşar Esed ketiye ber taya mirinê û nizane çi bike. Ji ber panîka tirsa xwe ajan û milîsên dîktatorê Şamê heroj bi sedan mirovan dikujin. Bi qetliama roja sêyê sibatê ya li Humisê drakula Esed binê dawiya rejîma xwe îmza kir.

Ji meha adarê ya sala borî ve li Sûriyeyê dibe ko zêdetirî 10 000 kesan ji bo daxwaza mafên xwe yên demokratîk hatibin kuştin. Hejmarên saxlem di destê min de nînin lê belê qetliama şeva îniyê li cihanê dengekî mezin da. Bi rêya Youtubê, twitterê û Facebookê teferûatên wê komkujiyê gehişt ber destê dezgehên medyayê yên cihanê.

Opozîsyona Sûriyeyê ne tenê raya cihanê qezenc kir. Herwiha daxwaza hemwelatiyên Sûriyeyê bi dijwarî li Konseya Ewlekariyê ya Neteweyên Yekbûyî hat minaqeşe kirin. Ji xeynî Çîn û Rûsyayê hemî welatên di wê organê de xwest ko Beşar Esed dest ji desthilatê berde.

Ji ber berjewendiyên xwe yên aborî hem Çîn û hem jî Rûsyaya rezîl çavên xwe ji zilma Şamê re digirin. Kuştina bi hezaran zarokan û jinan li Sûriyeyê qet wan herdu welatan naêşîne. Jixwe ti hêviya min ji welatê sosyalîst Çînê nîne lê belê ez ji Rûsya, Putin û Medvedev gelekê aciz bûm bi taybetî li ser meseleya Sûriyeyê.

Piştî roxandina sosyalîzmê li Moskovayê me got qey Rûsya dê rûmetê bide mafên hemwelatiyên xwe û mafên neteweyên di bin zilmê de. Wax, wax, ez çiqasê xelet fikirî me. Rûsya bi Putin dîsa ketiye ser rêya yakpartîbûnê, dîktatoriyê û rezîlbûna li cihanê.

Li vê dinyayê çiqas dîktator yan zelamên wekî Putin nexweş hebin Rûsya piştgiriya wan dike. Lîsteya hevalên xirab yên Rûsyayê gelek dirêj e. Putin û Medvedev ji aliyekî ve malzemeyan didin Îranê da reaktorên nukleer yên atomê çêke û ji aliyê dî ve heta duh-pêr hevaltiya Kim Il Sung, Qeddafî, Mubarak, Ben Alî û Sedam dikir. Ango, Rûsy ali demokrasiyê nagere, ne ji bo xwe û ne ji bo neteweyên dî.

Aniha dinya hemî li Rûsyayê û Çînê bûne yek û rejîma Beşar îro-sibe dê here. Heger Rûsyayê li dijî demokrasiya Sûriyeyê vetoya xwe bi kar neaniya dibe ko basên xwe yên eskerî yên li Sûriyeyê winda nekira. Lê belê niha li Behra Spî bi gelek awayan dawiya rola Rûsyayê hat. Kî bikeve cihê Beşar ez bawer nakim ko ew bihêle rojekê jî basên eskerî yên Rûsyayê li ser Behra Spî li sinorê Sûriyeyê bimînin. Herwiha rêya gazê û petrolê li Behra Spî û Rojhilata-navîn ji bo Rûsyayê têt girtin.

Hinek rojnameyên cihanê ji bo vetoya Rûsyayê ya li Konseya Ewlekariyê sedemekî nîşan didin: hilbijartinên serkkomariya Rûsyayê li meha adarê de. Vladimir Putin dî careka dî ji bo serokkomariyê bibe kandîdat yanî berdendam. Ew dê kursiya xwe bi Medvedev biguhore! Ji ber ko Putin bi bihayê 3.5 milyar kronên swêdî kontrakteka firotina balafiran bi Beşar Esed re îmza kiriye naxwaze ko li dijî dîktatorê Şamê tiştekî bike. Putin dibêje ”heger ez îhaleya Sûriyyeê winda bikim dê bi hezaran rûs bêkar bimînin û dengê xwe nedin min”. Rûyê Rûsyayê û Putin ev e lê belê dinya xelkê Sûriyeyê bi tenê nahêle.

Meha sibatê hertim di dîroka Sûriyeyê de xirab bû. Berî sih salan di didoyê sibata 1982-yê de Hafiz Esedê babê drakulayê niha bajarê Hemayê bi buldozeran xirab kir û bi hezaranan mirov kuştin.

Ew dem dema şerê sar bû û îmkanên bikaranîna Internetê nebûn. Îniya derbas bûyî, sêyê mehê kurdê wî xwest wekî babê xwe bike lê belê dinya hatiy eguhortin. Beşar Esed bi ti awayî nikare dîktatoriya xwe berdewam bike. Li gor agahdariyên min ew nareve bo welatên derve. Beşar û malbata wî dê mecbûr bibin ko çîrok û dîroka malbata xwe wekî ya Sedam Hisên yan jî wekî ya Qeddafî xelas bikin.

Ji bo doktor û drakulayê dîktator yê li Şamê ji bilî vê alternatîvê ti rêyên dî nemane.

-----------------------------------

Nivîskar: KURDO BAKSÎ kurdo.b@hotmail.com
Weşandin: 2012-02-11
Xwendin: 13899