Nefel

[ ÇARŞEM, 2024-12-04 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Berhem Salih mala kurdan li Swêdê xirab kir

SWÊD, 17/10 2011 — Hikûmeta herêma Kurdistanê bi fermana hêjmara 2557 ya 13/10 2011-ê bi îmzeya serokwezîrê herêma Kurdistanê Dr. Berhem Salih ji bo damezirandina Hêriş Xule Ezîz Ferhan wekî nûnerê hikûmeta herêmê li Swêdê biryar da (Nefel 13/10 2011).

Wexta min ev nûçe xwend hem gêj bûm hem jî aciz bûm.

Ez Hêriş Xule Ezîz Ferhan nas nakim. Ji xwe problem jî ew e. Eve 30 sal zêdetir e ko li Swêdê dijîm û heta niho beşdarî bi hezaran civîn, protesto û şahiyên kurdan bûme lê belê min rojekî ew braderê ko hikûmetê wekî nûnerê xwe li Swêdê tayîn kiriye nedîtiye û hevalên min jî kes wî nas nake.

Wî kesî rojekê li cihekî resmî axaftinek nekiriye. Ti caran ew kes di kar û xebata kurdên li diyasporayê de bi dûrbînan jî nehatiye dîtin. Lê belê li gor agahdariyên ko ketine destê min ji ber ko babê wî pêşmergeyekî zîrek û çalak bû hikûmeta Kurdistanê ev nûneratiya giring da wî. Pêşmergetî tiştek e û karê lobîîzmê li derve tişteka dî ye.

Divêt ez hinek agahdariyan bidim xwendevanan ka çima ez hewqasê aciz im. Sala 1992-yê li Swêdê û hinek welatên dî nûneratiyên hikûmeta federal ya Kurdistanê (KRG) hatin dameziradin. Nûneriya KRG-ê ya li Skandinavyayê bû para Taha Berwarî (PDK) û Arie Reza (YNK) bû cihgirê wî.

Piştî çend salan YNK-ê Burhan Habib xist şûna Arie Reza lê Taha Barwarî heta 2008-ê nûneratiya hikûmetê kir. Mirov dikare li ser KRG û wan salan gelek tiştan bibêje lê KRG-ê kar dikir.

Piştî KDP-ê li Swêdê dor hat YNK-ê da nûnerekî destnîşan bike. YNK sê salan nûneratiya hikûmetê ya li Swêdê vala hişt û li kesekî digeriya da tayîn bike. Van sê salan ne ofîsa KRG-ê hebû û ne jî nûnerê hikûmetê. Ma ev ne eybeka mezin e?

Li Swêdê ji 100 hezarana zêdetir kurd hene û Swêd endama Yekîtiya Ewropayê ye. Li diyasporayê kurdên herî siyasî û aktîv li Swêdê dijîn. Li Silêmanî, Hewlêr, Qamişlo û Diyarbekirê têgeha ”kurdên Swêdê” belav bûye û têt nas kirin.

Li Parlamentoya Swêdê 6 parlamenterên esilkurd hene. Hejmara nivîskarên kurd yên li Swêdê ji hejmara nivîskarên li Kurdistanê zêdetir bû. Pênc televîzyonên kurdan ji Swêdê bi rêya satelîtê weşanê dikin. Bi hezaranan pirtûk û CD bi kurdî li Swêdê derketine.

Yanî gerek Swêd ji bo hikûmeta Kurdistanê giring be. Heger serokwezîr Berhem Salih nezane ko Swêd ji bo doza kurdan giring e divêt ew biryara xwe ya ji bo nûnerê hikûmetê yê li Swêdê careka dî raşav bike.

Heger ew giringiya kurdên Swêdê û qîmeta Swêdê dizane û digel wê jî kesên nezîrek tayîn dike hingê têt wê maneyê ko Berhem Salih li gor biryara 2557-ê kar nake. Ew biryar dibêje nûnerê KRG-ê dê ji bo ”xurtkirina têkiliyên herêma Kurdistanî û Swêdê” kar bike.

Vêca heger ev tayînkirin tenê ji bo xatiran be ev biryareka xelet e. Berpirsiyarên kurdan di van rojên dîrokî de divêt biryarên rast bidin. Ji bo xatirê dê û babê kesekî biryarên xelet nedin. Di nav YNK-ê de an jî di nav kurdên dî yên Swêdê de bi sedan kesên zîrek hene ko danûstandinên wan hem digel kurdên vêderê û hem digel swêdiyan bi xwe xurt in û têkiliyên wan bi siyasetmedar û medyaya Swêdê re pir baş in.

Bi baweriya min divêt hikûmeta federal ya Kurdistanê bi lez vê biryara xwe biguhore. Yan ne mala lobîyê û karê dîplomatîk yê kurdan li Skandînavyayê xirab bû.

-----------------------------------

Nivîskar: KURDO BAKSÎ kurdo.b@hotmail.com
Weşandin: 2011-10-17
Xwendin: 12435