Nefel

[ ÇARŞEM, 2024-12-04 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Çima dostên kurdan bêşans in

SWÊD, 29/1 2011 — Seroka partiya sosyaldemokratên Swêdê Mona Sahlinê di hilbijartinên Swêdê yên di 19-ê îlona 2010-ê de qezenc nekir. Ji ber wê yekê jî medya swêdî û sosyaldemokratên hesûd fermana wê rakirin.

Sahlin sala 2007-ê bû seroka sosyaldemokratan û di sisyaseta Swêdê de yek ji wan kesên herî navdar e. Sala 1985-ê ket Parlamentoya Swêdê û çend salan piştre bû wezira piyasa kar û hêdî hêdî bû wezira wekhevî û entegrasyonê. Demekî cihgira serokwezirê Swêdê bû.

Lê aniha di meha adarê de dest ji posta xwe berdide ji ber ko sosyaldemokrat di hilbijartinê de bi ser neketin.

Ez ji bo Mona Sahlinê gelekî xemgîn im. Li gorî min Mona Sahlin siyasetmedareke zîrek e û dosteke kurdan ya herî hêja ye. Ji 20 salan zedetir e ko bi hemî awayî piştgiriya kurdan dike, hem bi axaftin, hem bi çalakiyan alîkariya kurdan dike.

Wek seroka sosyaldemokraten hem di şahî û hem di şînê de ew bi kurdan re bû. Newroz bi kurdên diasporayê (nefiye) re pîroz kiriye, di bîranînên Halepceyê de bi dehan caran mûm pexistiye, serdana Kurdistanê kiriye û di sedan protesto û semînerên kurdan de beşdar bûye.

Min Mona Sahlin sala 1992-ê nas kir û pişte wan danûstandinên min ji bo mafên kurdan pê re berdewam kir. Herwiha ez haqê rola gelek kurdên ko di partiya sosyaldemokratan de aktif in jî naxwim. Ewan jî dawa kurdî bi serfirazi bi Mona Sahlinê dan nas kirin û fahm kirin.

Lê belê, gava behsa sosyaldemokratan û dostên kurdan bikim divêt behsa du kesên din jî bikim û ew kes di jiyana Mona Sahlinê de jî giring in: Serokê sosyaldemokratan yê berê rehmetî Olof Palme û wezira derve ya Swedê rehmetî Anna Lindh.

Palme jî di qada navnetewî de di wextekî zahmet de dostekî kurdan yê herî baş bû lê mixabin di sibata sala 1986-ê de i li ser cada Sveavägen li Stockholmê hat kuştin û hê jî qatilê wî nehatiye girtin. Olof Palme sala 1980-ê got ko divêt Tirkiye, Îran, Iraq û Sûriye heqê xweîdarekirinê (otonomiye) bidin kurdan. Ew gotin di heypeyvînekê de ji mamê min Mehmûd Baksi re got û ew heypeyvîn di Aftonbladet belav bû.

Yek ji wan hevalên Mona Sahlinê ya herî nêzîk Anna Lindh bû. Wek têt zanîn Anna Lind heta sala 2003-yê wezîra karên derwe ya Swedê bû. Anna Lind dosteke kurdan ya herî baş bu û wê Diyarbekir ziyaret kir û li Enqereyê piyê xwe da erdê û got:

— Li Tirkiye bi kêmasî 20 milyon kurd hene. Divêt zimanê wan resmî be û divêt nasnameya wan bêt qebûl kirin.

Di destpêka salen 2000-ê de kêm siyasetmedarên di hikûmeten ewropî de pirsa wan mafên kurdan ji Enqareya zalim dikir. Lê mixabin, Anna Lindh bi destê xortekî yugoslav di nehê îlona 2003-yê de hat kuştin.

Belê dostên kurdan bêsiûd in û zêde najîn. Kî dikare professorê fîzîkê Andrej Saharov ji bîr bike! Wî û xanima wî Elene Bonner hêj di salên 1970-yê de piştgirî dan kurdan. Saharov sala 1975-ê xelata aştiyê ya Nobelê girt lê belê nedikarî ji Sovyetê derkeve.

Dema ko perestroyka gehişt Sovyetê û Saharaov azad bû temenê wî têrê nekir. Sala 1989-ê dema dema ko dikarî ji bo mafên kurdan baştir xebatê bike wefat kir. Heyf ko Saharov di van salên dawiyê de ne li vê cihanê ye. Divêt kurd Saharov qet ji bîr nekin.

Belê, ez dikarim lîsteya dostên kurdan yên bêşans zêde bikim lê divêt mirov pirsekî dî bike: Çima em kurd bêşans in?

Ew gotina berê ya kurdan bila rast derneke. Ji xeynî çiyayên dostan kurdan divêt dostên dî jî hebin û divêt em jî xwedî li wan dostan derkevin.

Ez dê wezîfa xwe ya spasiyê ji bo Mona Sahlinê bi cih bînim. Roja 25-ê adarê jê re xaliyeke dîwaran ya ji Kermanşahê bikim diyarî ji bo ko ew jî kurdan ji bîr neke. Û her cara ko li xaliyê mêze kir netewa kurd bê bîra wê.

-----------------------------------

Nivîskar: KURDO BAKSÎ kurdo.b@hotmail.com
Weşandin: 2011-01-29
Xwendin: 13903