SELAHEDÎN, 6/9 2005 - Hemû êvarên duşemiyê seet 08:15 li gor dema Amedê di Kurdistan TV de programa giftûgoyî ya bi navê RONÎ, zindî tê pêşkêşkirin. Program hewl dide ko herî zêde cî bide bakûrê Kurdistanê û tê de tevî kurdên bakûr, çi wek mêhvanên li stodyo û çi jî bi telefonê be, pirseka rojê ya bakûr giftûgo bike û roniyê bide ser aliyên wê yên cida.
Ji ber ko li bakûr qada herî germ siyaset e, lewra RONÎ jî zêdetir li ser pirên siyasî radiweste û her heftiyê mijareka siyasî çi li bakûr be, çi jî têkiliya wê bi bakûr re hebe, dike mijara prgramê û tevî siyasetvanekî ji bakûr li stodyoya Kurdistan TV ya Hewlêrê û hin mêhvanên din jî yên ji bakûr, yan jî ji beşên din, bi telefonê, 60 deqîqeyan li ser wê mijarê radiwestin. Helbet bi saya rewşa başûr û ji ber ko gelek kurdistanî li wir dimînin, yan jî tên diçin, dîtina mêhvanan ya her heftiyê jî zêde ne serêşî ye.
Beriya ko dest bi weşanê jî bike, li derve û hundirî welat, RONÎ bi gelek siyasetvan, ronakbîr, rojnamevan û nivîskarên zêdetir ji bakûr û beşên din yên Kurdistanê re jî şêwirî û dîtin û nêrînên wan yên li ser programeka weha girtin, li ber roniya van şêwiran jî, naverok û armanca xwe destnîşan kir. Di van şêwiran de xuya bû ko gelek hizr, dîtin û nêrînên cida û li dor mijarên cida ji bakûrê welat û beşên din jî, ji ber nebûna programeka televizyonî ya weha bêdeng mane û bi rastî jî ji wan re platforkema azad ko bi azadî xwe tê de bînin ziman, gerek e. Li ser vê bingehê RONÎ ji dayik bû.
Her çi qas îmkanên teknîkî rê nedin jî ko weke pêwîst e programeka têr û tejî bête amade û pêşkêşkirin, lê belê dîsa jî RONÎ avêtina gava yekê ya ber bi armanceka dûr ve ye û roja îro hebûna derfeteka weha ko bakûrî karibin xwe tê de îfade bikin, ji nebûnê çêtir e, lewra jî weke çawa programê bi alîkariya siyasetvan, ronakbîr, rojnamevan û nivîskarên piraniya wan ji bakûr dest pê kir, niha jî ji bona berdewamî û baştirbûna xwe, RONÎ carek din jî bangê li hemû temaşavanên xwe bi taybetî jî li bakûr dike ko bi dîtin û nêrîn, nirxandin, rexne û pêşniyazên xwe alîkariya programa xwe bikin û bi riya adersên Kurdistan TV yên cida, bigihînin programê.
Helbet dema ko RONÎ giraniyê dide ser bakûrê Kurdistanê, ev yek nayê wê maneyê ko mijar û bûyerên li beşên din yên Kurdistanê jî jê re ne balkêş in, na, RONÎ di heman demê de giringiyê dide başên din yên Kurdisanê jî û di çend xelekên xwe de li ser rojhilat û rojavayê Kurdistanê jî rawestiya ye û cî daye mijar û mêhvanên ji wan beşan jî, ji ber di koka xwe dixwaze programek kurdistanî be û li pirsên hemû beşên welat xwedî derbikeve, lewra ev banga alîkariyê ji bo temaşavanên hemû beşên Kurdistanê û yên li her dereka dinê ye jî.
Temaşavan dikarin ji programê re mijarên cida ko qabilî giftûgoyê bin, pêşniyaz bikin, herweha li gor baweriya xwe mêhvan û kesên ko beşdarî programê jî bibin, bidin nasandin, bila piştrast bin ko hemû dîtin û pêşniyaz dê girîng bêne wergirtin û çi qasî mimkin be jî dê cihê xwe yê di programê de bigirin. Ji bilî wê her temaşavanek di dema weşanê de jî dikare zindî bi telefonê tevlî programê bibe û dîtin û nêrînên xwe di derheqa mijarê de bîne ziman, di çend xelekên dawî de jî bi beşdariya temaşavan ya bi riya telefonê hem program dewlemnd bû, hem jî xuya bû ko hizr û dîtin û nêrînên dixwazin dengê xwe bilind bikin, li hemû beşên welat pir in û program dikare bibe kanaleka dengê wan.
Tevî hemû kêmanî û astengiyên cida yên ko hene jî, RONÎ dixwaze bibe pireka di nêvbera kurdan de û sînorên di nêvbera beşên Kurdistanê de hatine çêkirin nas neke, ji bo vê yekê jî çi qasî jê bê dê hewl bide û dê xemsariyê neke, helbet ji bo biserxistan vê armancê jî li hêviya alîkariya we tevan e.
|
