STOCKHOLM, 4/6 2005 — Di dîroka neteweyan de hin tarîx mîna sembolên cuda yên ji bo hêjahîyên giring di jîyan û hafizaya wan neteweyan de cîhê xwe digrin. Tarîxên wisa dibin perçeyeke giring ya dîroka wan neteweyan. Neteweya kurd, bi nivîsandina dîroka xwe ya têkoþşîna azadî, demokrasî û serxwebûnê ve mijûl e. Nîvîsandina dîroka rastî ya netewa kurd berdewam e. Û ev dîrok jî ji alîyê kurdan ve tê nivîsîn.
Çarê Hezîranê, di nivîsandina vê dîrokê de êdî bû qonaxeke giring ya pêvajoya azadîya gelê kurd û demokrasîya civata Kurdistanê ko bi destê kurdan ve tê avakirin.
Îroj, di 4ê Hezîrana 2005an de Parlamentoya nûhilbijartî ya Kurdistana Başûr yekem rûniþştina xwe pêk anî û birêz Ednan Miftî mîna serokê Parlamentoya Federal ya Herêma Kurdistanê hilbijart. Bi vê yekê re jî demeke nû ya ber bi avakirina civateke azad û demokratîk li Kurdistana Başûr dest pê kir. Ji xwe mêvanên beşdar û sewîyeya bilind ya nûnerîya wan mêvanan, di serî de jî nûnerîya sekreterê Neteweyên Yekgirtî, giringîya vê civênê re têra xwe şahidî dikin.
Îroj di eynî demê de 13-salîya civîna yekem ya yekem Parlamentoya hilbijartî ya neteweya kurd e. 13 sal berê îroj, Parlamentoya ko yekem car bi rayên azad yên gelê kurd ve li Kurdistana Başûr ko di 19ê Gulana 1992yan de hilbijartibû, dest bi karê xwe kir û birêz Cewher Namiq mîna yekem serokê yekem parlamentoya hilbijartî ya gelê kurd hatibû destnîşankirin. Loma jî dûbarebûyîna 4ê Hezîranê mîna tarîxa civînên yekem yên herdu parlamentoyên pêşî yên hilbijartî, êdî di hafize û dîroka gelê kurd de bû navê qonaxek giring û dê wisa jî cîhê xwe bigre. Ango, êdî 4ê Hezîranê ji bo civata kurd dê mîna roja serketina azadî û demokrasîyê, mîna roja destpêkirina xebata civateke demokratîk ya li gora îradeya gelê kurd bê bibîranîn.
Di vê roja giring de, li cîhê xwe ye ko mirov bi kurtayî be jî, gihiştina vê qonaxê bi giştî binirxîne, da ko pêvajoyeke çawa li pişt vê qonaxê maye, bê tesbîtkirin.
Di civîna yekem ya parlamentoya yekem a Kurdistana Başûr de, di 4ê Hezîrana 1992yan de, ez bi xwe jî li wê derê mîna mêvan amade bûm. Bê guman ev yek ji bo min bextewarî û serbilindîyeke mezin bû û yek ji wan bûyerên ko di jîyana min de xwedî cîheke taybetî ye. Min wê demê hem li Kurdistan Pressê û hem jî li Berbangê his û qenaetên xwe anîbû ziman. Li jêr şertên gelek dijwar de, li jêr tehdît û êrişên piralî de, li bin sîya bêtecrubetî û nakokîyên hindurî de, 4ê Hezîrana 1992yan bû gava yekem ya avakirina civateke demokratîk li ser bingeha raya azad ya gelê kurd. Divê neyê ji bîr kirin ko di wê demê de statuya Kurdistana Baþşûr ne zelal bû û pejirandineke navneteweyî ya hiqûqî ji bo van hilbijartinan bi awayeke resmî nedihat dîyarkirin.
Civîna yekem ya Parlamentoya dûyem jî îroj bi rêya kanalên TV yên kurdan yekser hate belavkirin û ji dûr ve be jî min xwe bi hisên xwe ve li wir dît. Di navbera herdu civînan re 13 sal derbas bûbûn. Hin tehdît û dijwarîyên 1992yan tunebûn, yan xûya nedibûn. Bêtecrubetîya berê jî bi gelek alîyên xwe ve ji holê rabûbûn. Tehdîda hikûmeta merkezî ya Iraqê, di şexsê Seddam Huseyîn de, cîhê xwe, di şexsê birêz Celal Talabanî de ji beşdarîya hikûmeta merkezî ya Iraqa Federal re hiştibû. Ne bi tenê ev tiþþşt, lê her weha meşþruîyeta hilbijartinan û Parlamentoyê hem di hiqûqa navxweyî ya Iraqa Federal de hem jî qada nevneteweyî de hatîye pejirandin.
Lê di herdu civênên yekem yên Parlamentoya Federal ya Herêma Kurdistanê de, hêvî û daxwazên ko bi rêya axaftinan gihişt civata kurd û raya giştîya cîhanê, bi naveroka xwe ve ji hev cuda nebûn.
Hêvî û daxwaz her ew bûn ko:
Divê her kes xwedî bi azadî û demokrasîyê derkeve.
Destkeftên neteweyî bên parastin.
Rêz ji îradeya azad ya gelê kurd re bê girtin.
Nakokîyên siyasî bi qaîdeyên demokrasî yên hevdem bên çareserkirin.
Berjewendîyên neteweyî berîya her berjewendîyeke din bên nirxandin û li gora wan helwest bên girtin.
Ev dubarekirina hêvî û daxwazan dîyar dikin ko bidestxistina azadîyê, bicîhkirin û xurtkirina demokrasîyê ne karên hêsan in û ne jî karên yek-du rojan in. Ji bo wan hêjahîyan xebat û îrade pêwîst e, sebir û tehamul pêwîst e.
Civîna yekem ya dûyem parlamentoya hilbijartî hêvîyên ji bo van xisûsîyetan xurttir dike.
Vê civînê dîyar kir ko îradeya sîyasî ya gelê kurd cîhê van xisûsîyetan di nav xwe de xurttir û kûrtir kirîye.
Civîna yekem ya Parlamentoya duyem li neteweya kurd pîroz be.
Civîna yekem ya Parlamentoya duyem li xebata avakirina civateke azad û demokratîk pîroz be. |
