Nefel

[ ÇARŞEM, 2024-12-04 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

lexapro and pregnancy first trimester
lexapro and pregnancy risks inetapakistan.azurewebsites.net
Bi vê qûşê tu nagihê Mûşê

STOCKHOLM, 13/6 2006— Di 5ê meha 6ê de Cebheya Rizgariya Niştimanî ya sûrî kongreya xwe ya damezrîniyê li Londinê li dar xist.

Berî wê kongreyê Encumena Niştimanî ya Kurdistanî- Sûrî jî kongreya xwe ya damezrîniyê di rojên 27-29ê gulanê li Brukselê li dar xistibû.

Tiştê hevbeş ê herdu kongreyan bi hevûdu girêdide ew bendê pêşiyan e yê min ji nivîsa xwe re kiriye sernivîs. Lezê li min nekin dê ez ê ji we re şirove bikim.

Di daxuyaniya xwe de ya dawiyê Encumena Niştimanî ya Kurdistanî- Sûrî nivîsiye ko di roja yekê de û piştî minaqeşeyên dûr û dirêj li ser reşnivîsa Mîsaqê, komîteyeke ji 13 kesan hat avakirin (ez yek ji wan bûm) di gel hin kesên çavdêr ko ne kurd bûn (tiştê ez dizanim tenê kesekî ereb li gel me hebû, bi karê nivîsînê mijûl bû. Vêca heger hinek veşartî hebûn, bi rastî haya min bi xwe jê tune bû). Erkê wê komîteyê siyaxeta dawî ya mîsaqê bû. Piştî karekî ne hêsan (demeke kurt û pilepila komîteya amadekar ji bo lezlêkirin û şeliqandina mîsaq û destûrê. Min di nîvîsa xwe de ya bûrî ya li ser kongreyê gotibû ko çi karekekî cidî ji bo kongre bi rêk û pêk here dawiyê nehatibû kirin). Yek ji guhartinên herî girîng ew bû ko nav ne (Encumena Niştimanî ya Kurdî- Sûrî) lê (Encumena Kurdistanî- Sûrî) be. Mîsaqa Encumena Kurdistanî- Sûrî, bi sîxeta ko me li ser li hev kir, pêşkêşî kongreyê bû û bi piraniya dengan kongreyê mîsaqa Encumenê Kurdistanî- Sûrî pejirand.

Heger mirov daxuyaniya kongreyê ya dawî bixwîne dê bibîne ka ew kesên vî îşî dikin çend çalak û pehlewan in. Ew ji xwe re dibêjin: Ero, mademkî ew kesên ko li dij navê Encumena Niştimanî ya Kurdistanî- Sûrî bûn ji kongreyê vekişiyan dê em vegerin ser bazara xwe ya berê, em dê li navê xwe yê eslî vegerin. Dibe ko hinekan ji wan re gotibin ma ne Xwedê giravî biryara kongreyê bû, ma qey hon hirmeta kongreyê nagirin? Ez di wê baweriyê de me ko ew dê bêjin: Ma kongre çi ye? Kongre em in û em jî bi keyfa xwe ne, em çi navî bixwazin em dê li encumena xwe daynin. Sedam Hisênî di dema bitriya xwe de digot: Ma destûr çi ye? Me destûr daniye û em dê destûrê bigihorin. Ma gelo jê hêsantir heye?!

Ji xopên din yên mirov di daxuyaniyê de dixwîne bi giranbihayî nêrîn li rola rêxistinên kurdî yê beşdarî kongreyê bûn, rola wan ya mezin di siyaxeta mîsaq û destûrê de. Ji wan 6 rêxistinên bi nav kirî 4 in ên xwe ji kongreyê vekişandin; Yekîtî (Hesen Salih), Azadî, PYD û Partiya Demokrat a Pêşverû ya Kurdî (Ezîz Dawê). Di daxuyaniyê de behsa xwevekişandina wan rêxistinan tune ye.

Heger Encumena Niştimanî ya Kurdistanî- Sûrî bi vî rengî dest pê kiriye, ez bawer im ko dawiya wê dê ji her kesî re diyar be.

Em herin Londinê û li daxuyaniya kongreya Cebheya Rizgariya Niştimanî ya sûrî bixwînin. Daxuyanî amajeyê bi sitemkarî û zordestiya li hevwelatiyên kurd bûye dike û dibêje: divêt ev zordestî rabe û çare ji encamên wê (zordestiyê) re bên danîn di çarçewa yekîtiya niştimanî û mafên hevwelatiyê de. Mafên siyasî, çandî, aborî û civakî ji van hevwelatiyên kurd re wê di destûra nû de bên te´yîn kirin.

Li gorî agahdariyên min çi kes û rêxistinên kurdî ji bilî Selah Bedredînî beşdarî wê kongreyê nebûn. Hêzên sûrî yên sereke di Kongreyê de Ebdilhelîm Xedam û Ixwan ul-Mislimîn bûn. Di gel ko danûstandina Ixwan ul-Mislimîn bi Xedamî re ne bi dilê opozisyona sûrî ye lê çi kesî rexnên tûj neavêtin wan. Em dizanin ko beşekî pir mezin ji tevgera siyasî ya gelê kurd li Sûriyê û Ixwan ul-Mislimîn jî li gel opozisyona sûrî ne. Lê ne li gel Xedamî ne.

Vêca ez ê gotina Selah Bedredînî di ”Konfiransa Waşintonê” ya kurdên Sûriyê li gorî nivîsa wî "Civîna Brûkselê – sûde û ziyanên wê" di Nefelê de (26/5 2005) bînim bîra wî: ”Min got: Em hatine da beşdar bibin di civîna kurdên Amerîkayê de yên ko ji tiliyên herdu destan ne zêdetir in û yên vexwendî bi du caran qasî sazkeran e, û ji nişkave me bangin bihîstin ko civînê mîna ”kongreke netewî” dihejmêrin, û ev tişt nayê pejirandin ji ber ko beşdar miletê kurd li Sûriyê temsîl nakin, ya rasttir jî ko ew hema hema û bê xwendineke hûr hatine vexwendin, û hê jî em bi dizî û eşkere dibihîzin ko hindek hene hewil dikin ko bibin alternatîvek ji tevgera siyasî ya kurdî li welêt re, û ev xêzeke sor e nabe ko derbas bibe, û partiyên kurdî – tevî hemî rexne û têbîniyên me derbarê karên serkirdayetiyên wan – dîsa stûna herî bi hêz ya tevgera netewî kurdî ne”.

Pirsa min ew e gelo Selah Bedredîn ji tevgera siyasî ya gelê kurd li Sûriyê kê temsîl dike? Gelo beşdarîbûna wî di gongreya Xedam û Ixwan ul-Mislimîn de çi qazancê digihîne gelê kurd li Sûriyê?

Ez naxwazim di vê nivîsê de behsa Xedam û Ixwan ul-Mislimîn bikim. Du nivîsên min li ser wan di vê kolumnê de hene; Qirdikê sersalê û Xefka dîn û siyasetê. Ez careke din dixwazim bînim bîra Selah Bedredînî ko ew di wê nivîsa xwe de dibêje: ”Di vî biwarî de, ez li vir dubare dikim derbarê rêzlêgiritna mafên yên din û azadiya wan hemiyan di girêdana civînan de bo piştgiritna kêşeya kurdên Sûriyê û pirsgirêka guhertina dîmokrasiyane, li her deverê lê bi şertê ko ziyanê negihînin doza netewî û welatperweriyê”.

Kongre di dawiyê de encumeneke niştimanî ji 26 kesan û sekretariyeke giştî ji 10 kesan nîşan kir, Selah Bedredîn jî yek ji wan 10an e.

Ez xweş bawer im ko Selah Bedredîn ji min çêtir dizane ko programa Î´lana Şamê, ji bo gelê kurd li Sûriyê bi gelekî ji programa Ixwan ul-Mislimîn û Xedamî çêtir e, lê ew texmîn dike ko Ixwan û Xedam dê çenteyekê di hikûmeta xwe de bidênê û dizane ko nanê wî di nav opozisyona Î´lana Şamê de tune ye.

Vêca heqê me tune ye em ji Encumena Niştimanî ya Kurdistanî - Sûrî û Selah Bedredînî re bêjin: Bi vê qûşê hon nagihên Mûşê?!

-----------------------------------

Nivîskar: Selam Nûman
Weşandin: 2006-06-13
Xwendin: 19193