Nefel

[ ŞEMÎ, 2024-11-23 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

NIVÎSAR

Muhayyel Turkiye Cizre’de Medfundur

» Cizîra Botan bû Cizîra kavil

CIZÎRA BOTAN, 16/9 2015 — Piştî hilbijartinên heftê hezîranê AKP-ê bi temamî pişta xwe daye kurdan û li pêla nijadperestîya "tirkî" siwar bûye. Kîna berpirsên AKP-ê hewqasê zêde ye ko şêwirmendê serokkomarê Tirkîyeyê Burhan Kuzu dikare behsa "sekitandina" kurdan bike.

Burhan Kuzu ko di heman demê de hiqûqnas e û berê nûnerê AKP-ê yê komîsyona amadekirina qanûna esasî ya nû bû, heftê vê mehê di hesabê xwe yê twitterê de bi tirkî wiha nivîsî:

— Hemî bêşerefên ko dixwazin vî welatî parçe bikin bêguman dê cezayê ko heq kirine ji vî miletî wergirin. Heta niho bi hezaranan terorîst hatin sekitandin. Dê berdewam bike.

— 2000 terorîst hatin kuştin; zêdetirî 500 ji wan teslîm bûn û nêzîkî 800 ji wan jî birîndar in. Ev paqijî dê berdewam bike. Xelk qetîyen destekê nade PKK-ê.

— Divêt fehsa terorîstên ko hatine sekitandin bêt kirin. Dê xuya bibe ko qismekê mezin ji wan sunetnekirî ne. Hişyar be brayê min yê kurd, di bextê te de me vêcarê hişyar bibe.

Haletê ruhî yê gelek tirkan wekî yê Burhan Kuzu ye û lewra serokê beledîyeya qezaya Gundogmuş ya Antalyayê, Mehmet Ozeren jî li gor malpera T24.com.tr li merkeza bajêr li ser panoyeka reklamê bi tirkî anonseka wiha belav kir:

— Ho gelê kurd yê misilman. Yan cardî dengên xwe bide HDP-ê û bibe dijminê min û heqîr be, yan jî li dij derkeve û bibe alaya dilê min. Lê belê ji bîr neke ko ez çiqasê li hemberî brayê xwe xudanmerhemet bim li hemberî dijminên xwe jî wisa cebbar im. Miletê tirk şûrê Xudayê min yê li hemberî kafiran e. Tu hezar salan bûyî brayê min. Nebe xulamê dijminên îslamê û nebe dijminê min. Ji taxima xaçperestan bipirse ka min çi bi serê wan anîye û dema ko ew nekarin min te li hemberî min dadixin meydanê. Biryar ya miletê kurd e ko me hêjî hêvîya xwe jê qut nekirîye.

Di tarîxa Tirkîyeyê de hertim tirkan "îslam" wekî hacetekê ji bo kontrolkirina kurdan bi kar anîye û AKP jî bi navê "îslamê" û bi navê "bratîya dînî" dixwaze ko kurd dest ji mafên xwe yên neteweyî berdin.

Mirov îro ji serokkomarê Tirkîyeyê bi xwe jî bipirse dê bibêje tirşteka dî ko ew ji bo kurdan bike nemaye û wî kurdbûn li Tirkîyeyê serbest kirîye û kanaleka TV jî bi kurdî heye. AKP û dewleta Tirkîyeyê qet xwe nadin ber barê perwerdeya kurdî li dibistanan û xwe nadin ber wî barî ko kurdî jî wekî trikî bibe zimanê resmî. Jixwe li gor AKP-ê û Erdogan guneh e ko kurd behsa otonomîyê jî bikin.

Piranîya caran dewleta Tirkîyeyê û tirk dijminahîya xwe li hemberî miletê kurd yan li hemberî mafên miletê kurd bi "terorîzma" PKK-ê ve girêdidin û dibêjin ew li dijî PKK-ê ne û ne li dijî kurdan in. Bêguman ev ne rast e û PKK hêceta tirkan e.

Ev mantiq û mejîyê kesên wekî Burhan Kuzu û Mehmet Ozeren e ko dihêle dewleta tirkan heşt rojan li ser hev ablokeyeka temam dane ser bajarê Cizîra Botan ê li bakurê Kurdistanê bi hêceta hinek ciwanên çekdar yên PKK-ê 120 hezar kurdên sivîl ceza bike û xelkê sivîl bikuje.

Piştî têkçûna serhildana Agirîyê ya Îhsan Nûrî Paşa tirkan 19-ê îlona 1930-ê li ser çîyayê Agirî nivîsî: "Muhayyel Kurdistan Burada Medfundur." Yanî "Kurdistana xeyalî li vêderê hatiye binax kirin."

Bi qenaeta min hikûmeta Tirkîyeyê di vê hefteya borî de "dewleta Tirkîyeyê" di serê kurdan de hilweşand û hêdî gelek zehmet e ko kurdek Tirkîyeyê wekî dewleta xwe bihesibîne herçend berpirsên HDP-ê behsa "tirkîyeyîbûnê" bikin û serokwezîrê Tirkiyeyê Ahmet Davutoglu bibêje "Tirkiye dewleta kurdan e jî". Lewra bi rehetî mirov dikare bibêje:

— Muhayyel Turkîye Cîzre’de Medfundur. Yanî Tirkîyeya xeyalî li Cizîrê hat binax kirin û hêdî ew dewlet di mejîyê kurdan de têkçûye.

-----------------------------------

Nivîskar: LEWENDÊ BOTÎ
Weşandin: 2015-09-16
Xwendin: 23318